1 Bo ghakindapo amasiku mabili ku kaba inyegha mukaya aka Kana mubuyo bwa Galileya. Wepe ung’ina wa Yesu akabako kula kula, 2 sona u Yesu na bamanyili bake bakitisiwa kunyegha yila. 3 Bo ubwalwa bwa mafilu bwamala, ung’ina wa Yesu akamubusya akati, "Ubwalwa bwa mafilu bwamala."

4 U Yesu akamwamula akati, "We mukolo, choni cho ukumbusya sisi. Akabalilo kangu kakali katakwanite." 5 Umayi wa Yesu akababusya aba mbombo bala akati, "Bomba bubu chosi cho akubabusya."

6 Papipi bakabikapo isonda sya mabwe sikisi syo sitakaba namisi, syo aba yuda bakabombelagha pakusukusulila ukuyana nimiteto yabo iyakwiswepesya. Isonda yosi yikayana bubu nindobo fayivi pamo sikisi. 7 U Yesu akababusya aba mbombo bala akati, "Isusya isonda isi na misi." Bakisusya mupaka pamwanya. 8 Po akababusya akati, "Losulu semba amisi mupe usongo uwa lusekelo." Po bakasemba amisi nukumupa, 9 bo u songo wa lusekelo aghonja amisi, gho ghachenja ukuba bwalwa bwa mafilu. Atakamanya ko bukafuma, (loli abambombo bo bakasembelelagha amisi bakasimanya); Po u songo yula akamwitisya umwene nyegha, 10 po akamubusya ukuti, "Mundu wesi pakwanda akubapa ubwalwa bwamafilu ubwisa, pala abandu bang’wa ngani, akubapa ubwalwa bwa mafilu ububibi, loli uwe wasungite ubwalwa bwa mafilu ubwisa mupaka ulu!"

11 U Yesu akabomba chiswigho cha bwandilo mukaya ka Kana mu buyo bwa Galileya, mula mula momo akalangisya ubughindikiwa bwake, sona na bamanyili bake bakamusubila.

12 Panyuma pake akabuka mu Kapelinamu, poka nu mayi wake, naba wamwabo, na bamanyili bake nukwikala kula kula amasiku amapala bubu.

13 Bo akabalilo ka Ulusekelo lwa Pasaka lwa ba Yuda lwapalamila, u Yesu akabuka ku Yelusalemu. 14 Po mu Nyumba ya Chala akabagha abandu bakughulisya ing’ombe, ing’osi ni ngunda, sona akabagha bo bakachenjanagha indalama bikile pa tundalati. 15 Po u Yesu akapota ululisi pakuba lukomo, akabakisyamo bosi mu Nyumba ya Chala, poka ni ng’osi ni ng’ombe syabo. Akapenulannya utundalati twa bo bakachenjanagha indalama, sona indalama syabo sikanyambana. 16 Po akababusya bo bakughulisya ingunda akati, "Fifumyemo ifindu ifi muno. Mutakayipele inyumba ya Tata ukuba munalo!" 17 Abamanyili bake bakakumbukila Amasimbo aghakuti, "Ulweke lyangu pa nyumba yako lukwaka mumwangu ngati mulilo."

18 Abayuda bakamulalusya u Yesu bakati, "Chiswigho chiki cho ungabomba ukutulangisya ukuti uli namaka agha kubombela sisisi?"

19 U Yesu akabamula akati, "Mongolannya Inyumba ya Chala iyi, po ngwisa pakuyisenga sona amasiku matatu."

20 Po aba longosi ba Chiyuda bakamubusya bakati, "Inyumba ya Chala yikasenya ifinja fote sikisi pakuti yisengiwe, Imba uwe ungasenga pamasiku matatu bubu?"

21 Loli Inyumba ya Chala yo u Yesu akayughagha, ghukaba mubili wake. 22 Bo asyuka kubufwe, abamanyili bake bakakumbukila ukuti akayugha sisisi, sona bakasubila amasimbo na masyu gho u Yesu akayughagha.

23 Bo u Yesu akali ali mu Yelusalemu pakabalilo ka pa lusekelo lwa Pasaka, abingi bakamusubila bo batesya ifiswigho fyo akabombagha. 24 Loli u Yesu atakasubila ukuti ikale nabo, pakuti akabamanya abandu bosi mo babelile, 25 sona atakalondagha ukuti yumo asimikisye isya bandu, pakuti akasimanya mwene syo sili mumoyo wa mundu.