1 Panyuma pa isi, u Yesu akendelagha mu Galileya. Atakalondagha ukwendanika mu chigaba cha Yudeya pakuti abalongosi ba Chiyuda bakalondagha pakumughogha. 2 Akabalilo ka Lusekelo lwa fisakasa ulwa Chiyuda lukaba papipi, 3 po aba wamwabo ba Yesu bakayugha nawe bakati, "Fumako kuno ubukaghe mu chigaba cha Yudeya, umwakuti bope bo bakukukonga batesye imbombo syako syo ukubomba. 4 Nayumo umundu yo akufifa cho akubomba, pala akulonda ukuti amanyikwe pabwelu. Pala akubomba ifindu ifi, ubaghile wilangisye wemwene kuchisu chosi ichapasi." 5 (Bope na ba wamwabo batakamusubila.)

6 U Yesu akayugha nabo akati, "Akabalilo kangu akisa katakwanite, loli ku kwinyu akabalilo kosi kisa bubu. 7 Abandu aba mu chisu ichapasi batangababenga umwe, loli bambengite pakuti ngusimikisya ukuti imbombo syabo mbibi. 8 Umwe bukagha ku lusekelo. Une ndakubukako chifukwa chakuti akabalilo kangu akisa katakwanite." 9 Bo ababusya sisisi, akasyala mwene muchigaba cha mu Galileya.

10 Loli bo aba wamwabo babuka ku lusekelo kula, po wepe u Yesu akabuka. Atakabuka umwakubonekela, loli umwakubwama. 11 Abalongosi aba Chiyuda bakamulondagha pa lusekelo lula lula. Bakalalusya bakati, "Imba umwene angaba ali kwighi?"

12 Kukabako ukuteketelana ukukulu ngani nisya Yesu muchilundilo mula mula. Abandu bamo batingi, "Mundu mwisa." Abangi batighi, "Awe, akubasobesya bubu abandu" 13 Loli atakabako nayumo yo akamuyughagha pabwelu pakuti bakaboghopagha abalongosi ba Chiyuda.

14 Bo ulusekelo lwa fika pakati, u Yesu akingila mu Nyumba ya Chala nukwanda pakumanyisya. 15 Abalongosi ba Chiyuda bakaswigha ngani nukuti, "Imba umundu yuyuyu akafimanya buli buli ifindu fyosi fififi pakuti umwene atamanyile?"

16 U Yesu akabamula akati, "Ifimanyisyo fyo ngubamanyisya te fyangu nu lwangu, loli fikuma kuyo akanduma. 17 Umundu wesi yo akulonda pakubomba fyo u Chala akulonda, akwisa pakumanya pala fyo ngumanyisya fikufuma kwa Chala pamo nguyugha nu bulaghili ubwangu une nemwene. 18 Umundu wesi yo akuyugha nu bulaghili bwake mwene, akwilondela mwene amapalo. Loli wesi yo akumulondela amapalo yo akanduma yo wabwanaloli, sona ubumyasi butalimo mumwake. 19 U Mozesi akabapa indaghilo. Imba temomumo? Loli nayumo umundu mumwinyu yo akukonga indaghilo. Imba choni cho mukulonda pakungogha?"

20 Po ichilundilo chikamula chikati, "Uli nimbepo imbibi! Imba we wenu yo akulonda pakukughogha? 21 U Yesu akamula akati, "Ngabomba ichiswigho choka, po mwebosi mukaswigha. 22 U Mozesi akalamula pakusilimula abana binyu abalumyana, (napo atakaba we Mozesi yo akandisya, loli abanyenya binyu), po umwe mukusilimula abana binyu abalumyana pisiku lya kutusya. 23 Pala umulumyana akusilimuliwa pisiku lya kutusya, ukuti indaghilo sya Mozesi sikaleke pakunanganika, imba mukungalalila chifukwa chakuti ngaposya umundu pisiku lya kutusya? 24 Mutakalonganaghe pakutesya akabonekele ka mundu, loli mulongeleghe mubwanaloli."

25 Abandu bamo aba mu Yelusalemu bakayugha bakati, "Imba uyu te weyo abalongosi ba Chiyuda bakulonda pakumughogha? 26 Tesya lelo akuyugha pabwelu, loli abene batakuyugha nachimo. Imba chingaba chakuti abalongosi basimenye ukuti we Kilisitu? 27 Loli twebosi tumenyeko ko u mundu uyu akafuma, bo u Kilisitu akwisa, nayumo umundu yo akwisa pakumanya ko akafuma.

28 Bo u Yesu akumanyisya mu nyumba ya Chala, akayugha na masyu gha pamwanya akati, "Naloli mumenye, sona mumenyeko nako fumite. Une ndisile nu bulaghili ubwangu nemwene. Loli yo akanduma wabwanaloli umwe mutamumenye, 29 loli une mumenye pakuti ngafuma ku kwake, sona weyo akanduma."

30 Po bakalondagha pakumukola, loli atakabapo nayumo uwakumupalamasya pakuti akabalilo kake kakaba katakwanite. 31 Loli abandu abingi mu chilundilo chila bakamusubila ukuti, "Bo u Kilisitu akwisa, imba akwisa pakubomba ifiswigho ukukila fyo umundu uyu akubomba?"

32 Aba Falisayi bakifwa syo ichilundilo cha bandu chikuteketelana nisya Yesu, po abene na balongisi ba baputi bakabatuma abasilikali bamo pakumukola. 33 U Yesu akati, "Ngwisa pakuba numwe pakabalilo akapimba, po ngwisa pakubuka kwa yo akanduma. 34 Mukwisa pakundonda, loli mutakwisa pakunyagha pakuti ko ngubuka mutangafikako."

35 Abalongosi ba Chiyuda bakalalusannya bene bene bakati, "Imba akulonda ukubuka kwighi ko tutangamwagha? Imba akulonda pakubuka muchisu chaba Giliki cho abandu bitu bakwikala umwakunyambana, nu kubamanyisya aba Giliki? 36 Akayugha ukuti mukwisa pakundonda, loli mutakwisa pa kunyagha, ‘sona ko ngubuka, mutangafikako.’ Imba akung’anamula choni’?"

37 Isiku lya bumalilo ilya pamwanya ngani ilya lusekelo, u Yesu akimilila nukuyugha nisyu lya pamwanya ukuti, "Umundu wesi yo ali ni nyota ise kukwangu nukung’wa! 38 Pakuti amasimbo ghakuti, "Umundu wesi yo akusubila une, isoko sya misi agha bumi sikwisa pakwendagha ukufuma mumwake." 39 U Yesu akayughagha nisya Mbepo, yo abandu bo bakamusubila bakisa pakupokela. Pakabalilo kala kala u Mbepo akaba atapeghiwe pakuti u Yesu akaba akali pakupokela ubughindikiwa.

40 Bo ichilundilo cha bandu bamo bifwa amasyu ghaghagha, chikayugha chikati, "Naloli umundu Musololi yula."

41 Abangi bakati, "Uyu we Kilisitu." Loli abangi bakati,

"Umupoki yula atangafuma muchigaba cha Galileya! 42 Amasimbo ghakuti u Kilisitu akwisa pakuba luko lwa Devedi nukuti akwisa pakupapiwa mu Betelehemu mukaya ko u Devedi akikalaghamo." 43 Po ichilundilo cha bandu chikagabingana chifukwa cha Yesu. 44 Bamo bakalondagha pakumupalamasya, loli atakabapo nayumo umundu uwa kumupalamasya.

45 Bo abalindilili ba nyumba ya Chala bala banyokela, abalongosi ba baputi na ba Falisayi bakabalalusya u Yesu bakati, "Imba choni cho mutisile nawe?" 46 Abalindilili bakamula bakati, "Nayumo umundu yo ayughitepo ngati mundu uyu!"

47 Aba Falisayi bakalalusya bakati, "Imba numwe abasimbwile?" 48 "Imba alipo weka pakati pa balongosi pamo pakati pa ba Falisayi amusubile? 49 Loli ichilundilo cha bandu ichi cho chitasimenye Indaghilo sya Mozesi, chocho chighuniwe."

50 Yumo mu ba Falisayi bala akaba we Nikondemu, yo kale akabuka kwa Yesu. Akayugha nabo akati, 51 "Imba indaghilo situ sikutwitikisya pakumulonga umundu, bo tutamwifwile akuyugha mwene cho abombite?"

52 Bakamwamula bakati, "Imba nuwe bubu ukufumila muchigaba cha mu Galileya? Londelesya mu Masimbo batesye, po bakwisa pakwagha ukuti nayumo umusololi yo angafuma muchigaba cha mu Galileya."