1 Panyuma pa isi, u Yesu akabuka mu Yelusalemu, chifukwa kukaba ulusekelo lwa Chiyuda. 2 Mu Yelusalemu papipi nu mulyango wa ng’osi, mukaba ichisiba, cho mu Chihebeli bakatingi Betisayida, chikasyunguliliwa utusyenga fayivi. 3 Mo mukalambalala abandu abingi ngani ababine, abafwamaso, balemale na bachikwefu. 5 Po akabapo umundu yumo pala pala, yo akabina ifinja sate eyiti. 6 Bo u Yesu amutesya alambalile pala pala, po akamanya ukuti abina akabalilo akatali ngani, akamulalusya akati, "Imba ukulonda ukupola?"

7 Umubine yula akamula akati, "We Malafyale, nde nu wakundwibika mu chisiba, po amisi ghakuyungana, pala nguti ndwibemo, ngwagha uyungi adwibitemo kale."

8 Po u Yesu akamubusya akati, "Nyamuka, nyamula ubulili bwako endagha." 9 Papapo na papapo umundu yula akapola, akanyamula ubulili bwake akanda pakwenda. Sisisi sikabombiwa pisiku lya kutusya, 10 po abalongosi aba Chiyuda bakamubusya umundu yo akapola ukuti, "Ipano lisiku lya kutusya, indaghilo situ sitakutwitikisya ukuti unyamule ubulili bwako."

11 Loli akamula akati, "Umundu yo akambosya une, akambusya akati, ‘Nyamula ubulili bwako endagha.’ "

12 Bakamulalusya bakati, "Mundu yuki yo akubusisye ukuti nyamula ubulili bwako endagha?"

13 Loli umundu yo akapola atakamumanya yo akamuposya, chifukwa u Yesu akaleghannyapo pakuti pabuyo bula pakaba ichilundilo cha bandu.

14 Panyuma pake u Yesu akamwagha mu nyumba ya Chala, nukumubusya ukuti, "Tesya, wapola utakabombe sona imbibi, ukuti ichibibi chingakuwila uwe."

15 Umundu yula akabuka nukubabusya abalongosi ba Chiyuda, ukuti we Yesu yo akamuposya. 16 Po pachifukwa ichi abalongosi aba Yuda bakanda pakumufwima u Yesu, pakuti akabomba imbombo pisiku lya kutusya. 17 U Yesu akabamula akati, "U Tata wangu akubomba imbombo akabalilo kosi, po nune bubu ngubomba."

18 Pachifukwa ichi, bakalondagha ngani pakumughogha u Yesu, chitakaba chifukwa chene chakuti akananga ululaghilo ulwa lisiku lya kutusya, loli chifukwa cha kuyugha ukuti u Chala we Tata, po akwipela mwene ukuti bayane nu Chala.

19 U Yesu akamula akati, "Naloli ngubabusya umwe ukuti u Mwana atangabomba nachimo pamwene, loli syene syo asitesya u Wise akubomba, pakuti syo u Wise akubomba syo syo wepe u Mwana akubomba. 20 Pakuti u Wise amughanite u Mwana nukumulangisya fyosi fyo akubomba umwene. Po akwisa pa kumulangisya imbombo ingulu ngani ukukila pa isi, ukuti mukwisa pakuswigha. 21 Pakuti ngati mo u Wise akususikisya abafwe nukubapa ubumi, momo wepe nu Mwana akupa ubumi kubo akulonda. 22 U Wise atakumulonga nayumo umundu, loli amupile ubulaghili bosi ubwa kulongela u Mwana, 23 nukuti bosi ba mughindike u Mwana ngati mo ba mughindikile u Wise. Umundu wesi yo atakumughindika u Mwana, atakughindika nu Wise bubu, yo akamutuma.

24 "Naloli ngubabusya umwe, ukuti bosi bo bakwifwa amasyu ghangu nukumusubila yo akanduma, bali nu bumi bwa bwile na bwile. Batakwisa pakulongiwa, loli balobokako kubufwe nukwingila mu bumi. 25 Naloli une ngubabusya umwe, akabalilo kakwisa sona kisile kale, ko abafwe bakwisa pakwifwa isyu lya Mwana wa Chala, po bosi bo bakwifwa bakwisa pakuba nu bumi. 26 Pakuti ngati mo u Wise ali nu bumi pa mwene, momo akumupela u Mwana wake ukuba nu bumi bwake mwene, 27 sona amupile ubulaghili bwa kulongela pakuti Mwana wa Mundu. 28 Mutakaswighaghe pa isi, pakuti akabalilo ka kwisa ko bosi abamumapumba bakwisa pakwifwa isyu lyake, 29 nukufumamo, po bosi bo bakabombagha inyisa bakwisa pakusyuka kubufwe nukuba nu bumi, loli bosi bo bakabomba imbibi bakwisa pakusyuka kubufwe nukulongiwa.

30 "Ndangabombapo nachimo pa nemwene. Ngulonga bubu namo une nifwila, po ubulongi bwangu bwanaloli pakuti ndakubomba ubwighane bwangu, loli ubwighane bwa yo akanduma une.

31 "Pala ngwisimikisya ne mwene, ulusimikisyo lwangu te lwa naloli. 32 Loli pali yumo yo akusimikisya nisyangu, po ngumanya ukuti syo akusimikisya sya bwanaloli. 33 Umwe mukatuma indumi kwa Yohani, po asimikisya ubwanaloli. 34 Po une ndakupokela ulusimikisyo lwa mundu, loli ngubabusya sisisi ukuti mupokiwe. 35 U Yohani akaba ngati nyale, yo yikakagha nu kubala, sona umwe mukalonda ukuhoboka pakabalilo akapala nu bwelu bwake. 36 Loli une indi nu lusimikisyo ulukulu ngani ukupota u lwa Yohani. Pakuti imbombo syo u Tata wangu akamba malisye, imbombo syo timbombe tisinyimile ubumboni ukuti Utata andumite une. 37 Sona u Tata yo akanduma weyo akasimikisya isya une. Umwe mwe mutifwilepo lumo isyu lyake, pamo ukutesya kope mutamutesisyepo lumo akabonekele kake, 38 lyope nisyu lyake litalimo mumwinyu pakuti mutakumusubila yo akanduma. 39 Ukubusikisya amasimbo pakuti mukwinong’ona ukuti momo mukwisa pakubwaghamo ubumi bwa bwile na bwile, agha gho masimbo gho ghakusimikisya isya une, 40 loli umwe mukukana ukwisa kukwangu ukuti mube nu bumi.

41 "Ndakulonda amapalo gha bandu, 42 loli mbamenye mo mubelile, sona simenye ukuti mutamughanite u Chala mumyoyo yinyu. 43 Une nisile mwilita lya Tata wangu, loli umwe mutambokelite une, pala yumo akwisila mu bulaghili bwake mwene, umwe mukwisa pakumupokela. 44 Imba mungasubila buli buli pala mukupokela amapalo mwebene bene, sona mutakwiyula pakulonda amapalo gho ghakufuma kwa Chala mwene? 45 Mutakinong’onaghe ukuti une ngwisa pakubapa inongwa kwa Tata, awe. U Mozesi yo mukumusubila, weyo akwisa pakubapa umwe inongwa. 46 Pala mu kamusubila u Mozesi, po musubile une pakuti umwene akasimba nisya une. 47 Loli pala mutakusisubila syo akasimba, imba mungasubila buli buli syo nguyugha?"