1 Bo u Malafyale asimanya ukuti aba Falisayi bifwile ukuti u Yesu akukaba nu kubosya a bamanyili abingi ukupoka u Yohani, 2 (napo u Yesu atakosyagha mwene, loli abamanyili bake.) 3 Akafumamo mu buyo bwa Yudeya nukunyokela sona mu chigaba cha Galileya, 4 po akabaghila ukupulusannya mu Samaliya.

5 Po akafika mukaya ka Samaliya, ilita lyake Sikali, papipi nu mughunda, gho u Yakobo akamupa u mwana wake u Jozefu. 6 Ichisiba cha Yakobo chikaba mula mula, po u Yesu akalita ngani nu bulendo bwake, akakila pa chisiba pala. Kakaba kabalilo bo isuba lili pa mutu. 7 Kula kula akisa u mukolo uwa mu Samaliya pa kusemba amisi. Po u Yesu akamubusya akati, "Ndete ghamo amisi agha kung’wa." 8 (Pakuti abamanyili bake bakabuka mukaya akakulu pakughula ifya kulya.) 9 Umukolo yula akamwamula akati, "Uwe we mu Yuda, une ne mu Samaliya. Po ukusuma buli buli amisi agha kung’wa?" (Pakuti aba Yuda na ba Samaliya batakwangalilana.) 10 U Yesu akamwamula akati, "Pala wa fimenye ifyabupi fya Chala nu mundu yo akusuma amisi agha kung’wa, ngali umusumite, po ngali umwene akupile amisi agha bumi." 11 Umukolo yula akati, "We Malafyale, ichakusembela ute nacho, sona ichisiba chibilite. Imba ungaghagha kwighi amisi agha bumi." 12 Imba uwe we songo ukumupota u tata u Yakobo, yo akatupa ichisiba chichi cho akang’wa mwene, sona wepe na bana bake ni fitekiwa fyake akung’wa papapa? 13 U Yesu akamwamula akati, "Umundu wesi yo akung’wa amisi agha akwisa pakuba ni nyota sona, 14 loli wesi yo akung’wa amisi gho ngwisa pa kumupa atakwisa pakuba lumo ni nyota. Amisi gho ngwisa pakumupa gha kwisa ukuba mumwake ngati yo mbwibwi ya misi nu kumupa ubumi bwa bwile na bwile. 15 Umukolo yula akayugha ku kwake akati, "We Mumanyisi, ndeteko amisi ghaghagha ukuti ndakise numilwepo lumo, pamo ukusemba amisi pano."

16 U Yesu akamubusya umukolo yula ukuti, "Bukagha umwitisye umulume wako mwise nawe kuno."

17 Umukolo yula akamwamula akati, "Nde nawe umwanalume." U Yesu akamwamula akati, "Wayugha ubwanaloli ukuti ute nu mwanalume, 18 pakuti ukasenyiwa na banalume fayivi, sona umwanalume yo uli nawe pakabalilo aka te mulume wako. Wambusya ubwanaloli." 19 Umukolo yula akayugha ku kwake akati, "We Malafyale, nasyaghannya ukuti we musololi. 20 Abanyenya bitu bakiputagha u Chala pighamba lilili, loli mwe ba Yuda mukuti mu Yelusalemu bo buyo bo abandu babaghile pakumwiputilapo." 21 U Yesu akumubusya umukolo yula akati, "We mukolo, subila une akabalilo ka kwisa ko mutakwisa pakumwiputa u Tata pighamba lilili, pamo mu Yelusalemu. 22 Umwe mwe ba Samaliya mutamumenye yo mukumwiputa, loli twe ba Yuda tumumenye yo tukumwiputa, pakuti ubupoki bukufumila mu ba Yuda. 23 Loli akabalilo kakwisa, sona kisile kale pakuti bo bakwiputa mubwanaloli bakwisa pakwiputa u Tata mwa mbepo nu bwanaloli, pakuti u Tata akubalonda bababa bo bakumwiputa. 24 U Chala we Mbepo, po bosi bo bakumwiputa, bamwipute mwa mbepo na mu bwanaloli."

25 Umukolo yula akayugha akati, "Simenye ukuti u Mesiya ayukwisa (yo we Kilisitu), bo isa, ayukutubusya fyosi."

26 U Yesu akamwamula akati, "Une ne ngukuyugha nuwe, nene."

27 Akabalilo kala kala abamanyili ba Yesu bakisa, bakaswigha ngani bo bamwagha akuyugha nu mukolo. Loli nayumo umundu yo akayugha nawe ukuti, "Imba ukulonda choni?" Pamo ukumulalusya ukuti, "Imba choni cho ukuyugha nawe?"

28 Umukolo yula akayileka isonda yake, akanyokela mukaya nu kuyugha na bandu ukuti, 29 "Sa kuno mutesye umundu yo ambusya fyosi fyo ngabombagha. Imba atangaba we Kilisitu?" 30 Po bakafumamo mukaya mula nukubuka kwa Yesu.

31 Pakabalilo kakako abamanyili bake bakamusuma u Yesu bakati, "We mumanyisi, lyangapo."

32 Loli u Yesu akabamula akati, "Indi nacho ichakulya cho mutachimenye." 33 Po abamanyili bake bakanda pakulalusannya bene bene ukuti, "Imba alipo yumo yo amwisile ni chakulya?"

34 U Yesu akabamula akati, "Ichakulya changu ko kubomba u bwighane bwa yo andumite nu kumalisya imbombo yo akamba. 35 Imba mutakuyugha ukuti, ‘Kwasyala imyesi folo ukuti akabalilo kakwinulila ka kwane’? Loli ngubabusya ighula amaso tesya mumighunda, ifi byaliwa fyela, sona akabalilo akakwinulila kafika. 36 Yo akwinula akupokela amalipilo ghake, sona akubungannya iseke nukubuka nasyo ku bumi bwa bwile na bwile, ukuti yo akubyala nayo akwinula basekelele poka. 37 Syo abandu bakuyugha sya bwanaloli ukuti, ‘Yumo akubyala, uyungi akwinula.’ 38 Ngabatuma pakwinula mo mutakabombamo. Abandu abangi bobo bakabomba imbombo ingafu, loli umwe mwakabilapo bubu pa mbombo yabo."

39 Aba Samaliya abingi mukaya kala bakamusubila u Yesu chifukwa cha lisyu lyo umukolo yula akayughagha ukuti, "Ambusya fyosi fyo na bombagha." 40 Bo aba Samaliya bisa kukwake bakamusuma ukuti ikale nabo, po u Yesu akikala kula kula amasiku mabili.

41 Abingi ngani bakamusubila chifukwa cha masyu ghake, 42 po bakamubusya umukolo yula bakati, "Tutakumusubila chifukwa cha fyo utubusisye, loli chifukwa chakuti twiyifwila twebene ku kwake, sona tumenye ukuti uyu mupoki wa chisu ichapasi."

43 Bo ghakindapo amasiku mabili, u Yesu akabuka mukaya ka Galileya. 44 Pakuti u Yesu umwenecho akati, "Umusololi atakughindikiwa lumo mukaya kake." 45 Bo afika mu Galileya, abandu ba mula mula bakamupokela pakuti bakafitesya fyosi fyo akabomba mu Yelusalemu pa Lusekelo lwa Pasaka pakuti bope bakabapo pa lusekelo lula lula.

46 Po akanyokela sona mu Kana muchigaba cha ku Galileya, ko akaghasinda amisi pakuba bwalwa bwa mafilu. Ikambala limo likamutesya lyo umwana wake akabinagha mukaya ka Kapelinamu likaba pala pala. 47 Bo ifwa pakuti u Yesu isile mu Galileya ukufuma ku Yudeya, akabuka ku kwake nukumusuma ukuti abuke nawe mu Kapelinamu ukuti amuposye umwana wake yo akaba papipi pa kufwa. 48 U Yesu akayugha nawe akati, "Nayumo umundu mumwinyu yo akwisa pakusubila pene po mwatesya ifi manyisyo ni fiswigho."

49 Ikambala likamwamula likati, "We Malafyale, twende twebosi bo nu mwana wangu atafwile."

50 U Yesu akamwamula akati, "Bukagha, umwana wako umwanalume akwisa pakuba nu bumi."

Umundu yula akasubila syo u Yesu akayugha nukubuka. 51 Bo ali musila akubwela akakomana na bambombo bake nukubabusya ukuti, "Umwana wako umwanalume ali nu bumi."

52 Akabalalusya akabalilo ko umwana wake akapolela. Bakamwamula bakati, "Isekema yikamulekela mumasuba na kabalilo ka wanu koloko pamusanya." 53 Po uwise akakumbuka ukuti kakaba kabalilo ko u Yesu akamubusya ukuti, "Umwana wako umwanalume akwisa pakuba nu bumi." Po yuyo na bosi abamunyumba yake bakasubila.

54 Ichi chikaba chiswigho cha bubili cho u Yesu akabomba bo afuma mu Yudeya nu kufika mu Galileya.