1 Pabwandilo pakaba Amasyu, Amasyu ghakaba nu Chala sona Amasyu we Chala. 2 Ukufuma pabwandilo umwene akaba nu Chala. 3 Fyosi ifindu fikapeliwa ukwendela mumwake, pala akasoba we yuyo ngali nachimo cho chikapeliwa. 4 Mumwake mukaba ubumi, po ubumi bukaba bwelu bwa bandu bosi. 5 Po ubwelu bukabalagha muchisi, loli ichisi chikapotwa pakufifa ubwelu bula.

6 Kukabako umundu yo akatumiwa nu Chala, yo ilita lyake akaba we Yohani. 7 Akisa ngati we kamboni pakusimikisya nisya bwelu bula, umwakuti bosi basubile mumwake. 8 Umwene atakaba bwelu, loli akisa pa kusimikisya nisya bwelu. 9 Ubwelu ubwanaloli bo bukababalila abandu bosi, bukisa muchisu chapasi.

10 Yo akitisiwagha ukuti we Masyu akaba mu chisu chapasi, ichisu chapasi chikapeliwa ukwendela mumwake, loli ichisu chitakamumanya. 11 Akisila abandu ba muchisu chake, loli abandu bake batakamupokela. 12 Loli bosi bo bakamupokela nu kumusubila, akabapa ubulaghili pakuba bana ba Chala, 13 pakuba bana ba Chala batakapapiwa ukuyana namo abana bakupapiliwa chifukwa cha bwighane bwa mundu, loli bakapapiliwa mwa Chala.

14 Po Amasyu ghakanduka ukuba mundu, nu kwikala mumwitu. Tukabutesya ubughindikiwa bwake, ubughindikiwa ubwa Mwana mwene, yo akafuma kwa Tata iswile nichisa nu bwanaloli.

15 U Yohani akasimikisya nisya yuyo, nu kukolela ukuti, "Uyu weyo ngamuyughagha yo ngati, ‘Uyu weyo akungonga pa nyuma pangu, weyo we songo ngani ku une, akabako kale bo nune ngali ndapapiwe.’" 16 Ukufuma mu kwisula ni chisa chake, twebosi tupokelite ulusayo pamwanya palunine. 17 Pakuti akatupa indaghilo ukwendela mwa Mozesi, ichisa nu bwanaloli fyo fikisa nu Yesu Kilisitu. 18 Nayumo umundu yo amutesisyepo u Chala, loli u Mwana mwene, yo we Chala, sona akaba papipi ngani nu Wise, weyo akatufumbulila.

19 Ulu lo lusimikisyo lwa Yohani, lo aba Yuda bakabatuma abalongosi ba baputi naba Levi aba mu Yelusalemu pakumulalusya u Yohani ukuti, "Imba we wenu?" 20 Akitikisya, atakakana pakubamula, loli akayugha pa bwelu akati, "Une tene Kilisitu"

21 Bakamulalusya bakati,

"Po we wenu? Imba we Eliya?" Akamula akati,

"Awe tenene" Bakamulalusya sona bakati, "Imba we Musololi yula?"

Akabamula akati, "Awe."

22 Po bakayugha ku kwake bakati, "Imba we wenu?" "Tubusye ubwanaloli pakuti tukulonda ukuti tubuke tubabusye bo bakatutuma. Imba uwe we mwenecho ukuti we wenu?"

23 U Yohani akabamula ukuyana na masyu gho umusololi u Yisaya akayugha ukuti,

"Une ne lisyu lya mundu yo akukolela mungolongo ukuti,

‘Gholosya isila ya Malafyale!’"

24 Po abandumi bo bakatumiwa naba Falisayi, 25 bakamulalusya u Yohani bakati, "Choni cho ukosya? Pala uwe te we Kilisitu, pamo te we Eliya, pamo te we musololi?"

26 U Yohani akabamula akati, "Une ngosya na misi ghene, loli pakati papinyu imilile yumo yo umwe mutamumenye, 27 yo akwisa panyuma papangu, yo ndabaghile napo papala pakusatula utupinyilo twa sapato syake."

28 Syosi sisisi sikabombiwa mukaya ka Betaniya kubufumilo bwa lisuba ku lusoko lwa Yolodani, ko u Yohani akosyagha.

29 Ilya ningelo lyake, u Yohani akamutesya u Yesu akwisa ku kwake, po akati, "Tesya u Mwana wa ng’osi uwa Chala, yo akufumya imbibi sya muchisu chapasi! 30 Yuyuyu weyo ngayughagha ukuti, ‘Umundu yo akwisa panyuma papangu, yo mukulu ngani ukungila une pakuti akabako kale bo nune ngali ndapapiwe.’ 31 Po nune ndakamumanya, loli pakuti une ngisa pakubosyagha na misi ghene, ukuti aba Izilayeli bamumanye."

32 U Yohani akasimikisya ukuti, "Ngatesya u Mbepo akwika ukufuma kumwanya ngati yo ngunda nukwikala papake." 33 Pope ndakamumanyagha ukuti we yuyo, loli u Chala yo akanduma pakosya na misi akambusya une akati, "Yo mukumutesya u Mbepo akwika nu kwikala papake, bo we yuyo akosya nu Mbepo Mwikemo.’ 34 Po une natesya nu kusimikisya" ukuti, "Uyu weyo Mwana wa Chala."

35 Ilya ningelo lyake, u Yohani akimilila sona na bamanyili bake babili pabuyo bula bula. 36 Bo amutesya u Yesu akwenda pala pala, akati, "Tesya u Mwana wa ng’osi uwa Chala." 37 Abamanyili babili bakamwifwa akuyugha sisisi, po bakamukonga u Yesu. 38 U Yesu akaghalabuka nu kubatesya bo bamukonga, akabalalusya akati, "Imba mukulonda choni?"

Bakamwamula bakati, "Wee Labi, (cho chikung’anamula ukuti Mumanyisi) Imba ukwikala kwighi?"

39 Akabamula akati, "Twende mutesye." Po bakabuka nawe nukuya pakutesya ko akikalagha, sona bakalinda nawe isiku lyosi lila lila pakuti kakaba kabalilo ka folo koloko aka panamasuba.

40 Weka uwa bandu babili, yo akifwa syo u Yohani akayughagha nukumukonga u Yesu akaba we Andeleya, uwamwabo wa Simoni Pitala. 41 Akanda tasi pakumwagha u Simoni u wamwabo nukumubusya ukuti, "Twamwagha u Mesiya" (cho chikung’amula ukuti Kilisitu.) 42 Po akabuka nawe u Simoni kwa Yesu. U Yesu akamutesya numubusya ukuti, "Ilita lyako we Simoni u mwana wa Yohani, loli ukwisa pakwitisiwagha ukuti we Kefasi" (chikung’anamulo cha kefasi kokuti Pitala, lyo ko kuti ilyalabwe.)

43 Ningelo lyake u Yesu akinong’ona ukubuka ku Galileya. Akamwagha u Filipu nukumubusya ukuti, "Ungonge."

44 U Filipu akaba wa ku Betisayida, akaya ko u Andeleya nu Pitala bakikalagha. 45 U Filipu akamwagha u Nataniyele nu kumubusya ukuti, "Twamwagha yo u Mozesi akasimba mwibuku lya ndaghilo, sona nayo abasololi bakasimba nisyake. We Yesu wa mu Nazaleti, u Mwana wa Jozefu."

46 U Nataniyele akalalusya akati, "Imba chingafuma chimo ichisa mu Nazaleti?"

U Filipu akamula akati, "Twende utesye."

47 Bo u Yesu amutesya u Nataniyeli akwisa kukwake, akayugha akati, "Tesya umu Isilayeli uwabwanaloli. Mumwake mutalimo nabumo ubumyasi."

48 U Nataniyeli akamulalusya akati, "Wamanya buli?"

U Yesu akamwamula akati, "Ngakutesya bo wikile mukasundila ka likuyu, bo nu Filipu akali atakwitisisye."

49 Po u Nataniyeli akamula akati, "Labi, uwe we Mwana wa Chala! We Malafyale wa Isilayeli."

50 U Yesu akati, "Imba ukusubila chifukwa chakuti ngakubusya ukuti ngakutesya bo wikile mukasundila ka likuyu? Ukwisa pakutesya ifindu ifikulu ukukila pa ifi." 51 Akayugha nawe akati, "Naloli ngubabusya ukuti mukwisa pakutesya kumwanya kwighukite, sona abandumi aba Chala bakukwela nu kwika pa Mwana wa Mundu."