1 Ngumubika u Febi, umuyemba witu munyobe sinyu, sona yo mubombi uwa chipanga icha mu Kengeleya. 2 Mu mupokelele akisa mwi lita lya Malafyale, ukuyana namo chibabaghilile abandu ba Chala pakubombelana, sona mumwafwe ni findu fyo akusobelwa nafyo pakuti umwene akubafwa abandu abangi poka nune bubu.

3 ✝Mundamukileko u Pulisila nu Akwila, ababombi abanyitu mu mbombo ya Kilisitu Yesu, 4 bo bakiyipa ubumi bwabo ukuti bamboke une, te nene nemwene ngubapalisya, loli ni fipanga fyosi ifya bandu bapanja. 5 Mundamukileko sona na bandu bo bakomana munyumba syabo pakwiputa.

Mundamukileko umughaniwa wangu u Epaneto, yo akaba mundu wabwandilo muchigaba cha Asiya pakumusubila u Kilisitu. 6 Mundamukileko u Maliya, yo akiyula ngani pakubabombela umwe. 7 Mundamukileko Andoloniko nu Yuniya abanyitu* bo bakaba poka nune mujela. Abene bandu bamanyikwe ngani pakati pa batumiwa, sona bakaba babwandilo pakuba ba Kilisitu, bo nune ngali.

8 Mundamukileko u Ambiliyato, umughaniwa wangu mwa Malafyale. 9 Mundamukileko sona nu Ulubano, umubombi umunyitu mumbombo ya Kilisitu, sona nu Sitaki, yo mughaniwa wangu. 10 Mundamukileko u Apele, yo mundu umusubiliwa ngani pambombo ya Kilisitu; mundamukileko aba munyumba ya Alisitobula. 11 Mundamukileko u Helodiyoni, umunyitu.

Mundamukileko aba Kilisitu bosi aba munyumba iya Nalikisi, bo bandu ba malafyale.

12 Mundamukileko u Tilifena nu Tilifosa, abakolo bo bakwiyula ngani pambombo ya Malafyale.

Mundamukileko umughaniwa wangu u Pelesi, umukolo yo iyula ngani pambombo ya Malafyale. 13 ✝ Mundamukileko u Lufu, umusubiliwa wa Malafyale, sona nu ng’ina, yo ali ngati we mayi wangu. 14 Mundamukileko u Asingilita, u Filegoni, u Helemesi, u Patiloba, u Helima, poka na bakamu bosi bo bali poka nabo. 15 Mundamukileko u Filologa nu Juliya, sona mundamukileko u Neliya nu muyemba wake, sona nu Olimpa, poka na bandu abisa aba Chala bosi bo bali nabo.

16 Mulamunganaghe mwebene pakulangisya ulughano ulwenecho. Ifipanga fyosi ifya Kilisitu fikabalamuka.

17 Mwee bakamu bangu, ngubasuma ukuti muchebaghe na bandu bo bakugabannya, sona na bo bakubika ifipunulo musila sinyu pakumanyisya ifimanyisyo fyo filekanite na fyo mukamanyisiwa. Tilako kukwabo! 18 ✝ Pakuti abandu bababa batakumubombela u Malafyale witu u Kilisitu, loli bakafibombela ifinyenwa fyabo. Sona na masyu ghabo ghabumyasi, sona ghabusimbuli bakubasimbula abandu bo batasimenye nachimo chimo. 19 Abandu bosi bifwile nisya kwifwila kwinyu, po une nahoboka ngani chifukwa cha mwemwe. Loli ngulonda ukuti mube bamahala pachindu cho chisa, sona nukuti mutakinong’onelagheko ni mbibi. 20 Po u Chala umwenecho wa mutende akwisa pakumukanyangila pasi pa finama fyinyu. Ichisa cha Malafyale witu Yesu Kilisitu chibe numwe.

21 U Timoti, umubombi umunyitu, akubalamuka. U Lusiyasi, nu Yosoni, sona nu Sosipateli, aba Yuda abanyitu bope bakubalamuka.

22 Une ne Telitiyo, umusimbi bubu wa kalata uyu, ngubalamukila mwa Malafyale.

23 ✝Wepa nu Gayi bubu, yo ambokelite une poka ni chipanga chosi munyumba yake, akubalamuka. U Elasita, umusungi wa ndalama isya kaya akakulu ngani, sona nu mukamu witu u Kwaliti bakubalamuka.

25 U Chala aghindikiwaghe. Ali na maka pakubakasya mulwitiko lwinyu, ukuyana na Masyu Amisa agha Yesu Kilisitu gho nalumbilila, sona ukuyana nu bufumbuli ubwa findu ifyakubusyefu fyo fikafifiwa ukwanda kale. 26 Loli ipano fyafumbuliwa pabwelu ukwendela mu Ndaghilo sya Chala uwa bwile na bwile fyafumbuliwa ku bandu abaluko losi, umwakuti basubile nukwifwila.

27 Kwa Chala mwene, yo wamahala, kube ubughindikiwa ubwa bwile na bwile ukwendela mwa Yesu Kilisitu! Ameni.