1 ✝Po ngulalusya ukuti, imba u Chala akabakana abandu bake? Awe, napo papala. Pakuti une ne mu Izilayeli uwaluko lwa Abulahamu, uwa muchikolo cha Benjamini. 2 U Chala atakabakana abandu bake awe, bo akabasalila nganila ukufuma ku bwandilo. Imba musimenye syo Amasimbo ghakuyugha nisya Eliya? Po akamulalusya u Chala ukuti abafunde aba Izilayeli ukuti, 3 ✝"Malafyale, babaghoghite abasololi bako nukupongolannya ifighemo fyako, po une nasyala nemwene, sona bakughesya ukuti bangoghe." 4 ✝ Imba u Chala akamwamula buli buli? Akamwamula akati, "Nisungile nemwene abanalume seveni sabuzani, bo batamughindikitepo u Bala, u chala umumyasi yula." 5 Momo sibelile nipano, ukuti balipo bapala bubu bo u Chala akabasala mu chisa chake. 6 Loli pala mo muchisa chake, po batakasaliwa mu mbombo syobakubomba awe, pala sikaba bububu, ichisa chake ngali chitakaba chisa.

7 Po imba tungati choni? Cho aba Izilayeli bakalondagha batakachagha, loli bo bakasaliwa bakasyagha, po bo bakasyalako bakabakasya imyoyo yabo, 8 ngati mo amasimbo ghakuti,

"U Chala akabapa imyoyo yabo pakuba mikafu,

amaso ghabo ukuti ghatakatesye,

sona makutu ghabo ghatakifwe, mupaka ipano." 9 ✝Sona u Devedi akuti,

"Ulusekelo lwabo lubateghe ngati chipingo ni ngoka,

fyakubakola fibe fya kubapinga nu kufundiwa.

10 Amaso ghabo ghighaliliwe, umwakuti batakatesye;

sona akabalilo kosi imisana yabo yiname."

11 ✝Une ngulalusya sona ukuti, "Imba bo bipunula bakawila nganila?" Awe, napo papala! Loli chifukwa chakunanga kwabo, ubupoki bwisa ku bapanja, ukuti aba Izilayeli babe bakabini. 12 Loli pala imbibi sya ba Yuda sikisa nubukabi bwa lusayo ulukulu ngani muchisu chapasi, sona ukupotwa kwabo kubapela abapanja ukuba bakabi, imba lusayo lukulu luki lukwisa pakubako bo ubwingi bwa ba Yuda bukongelelako.

13 Une nguyugha numwe mwe bapanja. Une pakuba ngati ne mutumiwa pa bandu bapanja, ngwitufikisya chifukwa cha butumiwa bwangu bububu, 14 ukuti pala momo sikabelagha ndangabapangila abaluko lwangu akabini, ukuti mbapoke bamo mumwabo. 15 Pakuti pala ukubakana kwabo kuli kwa kusayana ni chisu cha pasi, imba ukupokeliwa kwabo kwisa kuba buli? Loli ubumi ukufuma kubafwe!

16 Pala akamenyu akabwandilo kapeghiwa kwa Chala, kokuti chope ni chibama chosi chipaghuliliwe. Sona pala umusisi umwikemo, kokuti syope ni samba sikemo. 17 Loli pala isamba simo isya musyunguti syapalandiwa, po umwe mwe bapanja ngati samba isya misyunguti isya mungolongo mukumamatila kula kula, po mukubeghana nabo amafuta agha kufuma mwikomo lya musyunguti. 18 Po utakitufye wemwene ku kukasamba, pala ukwitufya wemwene, utakuwafwa umusisi loli umusisi ghukwafwa uwe.

19 Po mukwisa pakuyugha ukuti, "Isamba sikapalandiwa, umwakuti mamatiliwepo une." 20 Bwanaloli, bakapalandiwa chifukwa batakasubilagha, uwe ukwikala chifukwa cha kusubila, utakitufyaghe loli ghoghopaghe. 21 Pakuti pala u Chala atakasileka isamba mubuyo bwake, atayukubaleka numwe. 22 Pololi tesya ichisa cha Chala nu bukali bwake, mukali ku bo bakawa, loli ku umwe wa chisa pala mukubukilila ukwikala mu chisa chake, nukwendelela pakubomba fyo fikumuhobosya. Loli pala mutakubomba mukwisa pakupalandiwako. 23 Sona pala aba Yuda baleka ukusita ukusubila kwabo, bakwisa pakunyosiwa mubuyo bwabo bo bakabamo pakuti u Chala ali na maka pakumamatisya sona. 24 Umwe mwe bapanja muli ngati samba isya likomo ilya musyunguti uwa mungolongo lyo lipalandiwe sona lipambanite nilyenecho, limamatiliwe ku musyunguti gho ghubyaliwe, po chikwisa pakuba chipepe ngani kwa Chala pakumamatisya sona isamba kwikomo lyo lipalandiwe.

25 Mwee bakamu bangu, ndakulonda ukuti mube basita kumanya isya kubufifamu, umwakuti mutakisimbule ukuti mwe bamahala, ukuti ubukafu bwa myoyo bukisa papala ku ba Izilayeli, mupaka ukwisula kwa bapanja ku kisa kwa Chala. 26 ✝Umu momo aba Izilayeli bosi bakwisa pakupokeliwa. Pakuti amasimbo ghakuti,

"Umupoki akwisa pakufuma mu Ziyoni

sona nu kutisya ububibi bosi ubwa luko lwa Yakobo.

27 ✝Ulu lo lufingo lo ngwisa pakufingana nabo

bo ngutesya imbibi syabo."

28 Chifukwa cha kukana Amasyu Amisa, aba Yuda bakaba balughu ba Chala chifukwa cha bandu bapanja. Loli chifukwa chakuti akabasala, baba bamanyani bake chifukwa cha banyenya babo. 29 Pakuti ifyabupi fyake nu kwitisiwa kwa Chala pa mundu fitakupokiwa lumo. 30 Ngati mo umwe mwe ba panja kale mutakamwifwila u Chala, loli akubafwila ichisa chifukwa chakusita kwifwila ukwa ba Yuda. 31 Umwakuyana bubu, chifukwa cha chisa cho mukapokela, ipano aba Yuda baba basita kumwifwila u Chala umwakuti bapokele ichisa cha Chala. 32 Pakuti u Chala akabapela abandu bosi pakuba bapinyiwa abasita kwifwila, umwakuti alangisye ichisa chake pa bosi.

33 ✝Mwee, bo butali buki ubukabi ubwa Chala na mahala ghake nu bumanyi bwake! Imba we wenu yo angalingannya ubulongi bwake? Imba we wenu yo angifwisya isila syake?

34 Imba we wenu yo asimenye inyinong’ono sya Malafyale?

Imba we wenu yo angamulimbikisya?

35 ✝Imba we wenu yo amupilepo lumo ichabupi

umwakuti u Chala amulipile papo?"

36 ✝Pakuti ifindu fyosi fikapeliwa nawe, sona fili nu bumi ukwendela mumwake, sona fikubuka ku kwake, kwa Chala kube ulughindiko bwile na bwile! Ameni.