1 Mwee bakamu bangu, cho ngulonda ngani mu moyo wangu, ngwiputa kwa Chala ukuti aba Izilayeli bangapokiwa. 2 Pakuti ngubasimikisya ukuti balweke pafindu ifya Chala, loli ulweke lwabo te lwa mahala. 3 Pakuti Batasimenye mo u Chala akubayughila abandu ukuba bagholoke pamaso papake, po pakulonda pakubwikasya ubugholoke bwabo bene, bakapotwa pakwiyipa kubugholoke bwa Chala. 4 Pakuti u Kilisitu amalisya indaghilo, umwakuti wesi yo akusubila ayughiwaghe pakuba mugholoke.

5 ✝ U Mozesi akasimba nisya bugholoke bo umundu angaba nabo pakusunga indaghilo po akati, "Umundu wesi yo akukonga indaghilo akuba nu bumi." 6 ✝Loli ubugholoke bo bukufuma mulwitiko lukuti, utakayughe mu moyo wako ukuti, imba we wenu akwisa pakwingila kumwanya?’ " (Kokuti ukumwisya pasi u Kilisitu.) 7 "Pamo Imba we wenu angika mu chipanga ichikulu cho chibilite ngani?’ " (Kokuti akumusyusya u Kilisitu kubakufwa.) 8 "Loli imba amasyu ghakuti choni: Amasyu gha Chala ghali papipi numwe, ghali pamulomo wako, sona na mumoyo wako." (Ko kuti gho masyu gha lwitiko gho tukulumbilila.) 9 Pala ukwitika nu mulomo wako ukuti u Yesu we Malafyale sona nu ukusubila ukuti u Chala akamususya kubufwe, ukwisa pakupokiwa. 10 Pakuti umundu akusubila mu moyo wake nukuba mugholoke, sona numulomo wake akwitikisya mu lwitiko nu kupokiwa. 11 ✝Amasimbo ghakuti, "Umundu wesi yo akusubila mumwake, atakwisa pakukosiwa isoni." 12 Pakuti patalipo ukupambana pakati pa ba Yuda na bapanja. Pakuti u Chala we Malafyale wa bosi, sona akubasaya ngani abandu bo bakumwitisya. 13 Pakuti amasimbo ghakuti, "Wesi yo akwitisya ilita lya Malafyale, akwisa pakupokiwa."

14 Po imba abandu bangamwitisya buli yo batamusubile? Sona imba bangamusubila buli, pala batifwilepo lumo? Sona imba bangifwa buli, pala nayumo atalumbilile? 15 Sona imba bangalumbilila buli pala batatumiwe? Ngati mo amasimbo ghakuti, "Bwisa buki bo bukwisa nabandumi bo bakwisa na masyu amisa."

16 ✝ Loli te bosi bo bakitikisya Amasyu Amisa. Pakuti u Yisaya akati, "Malafyale, we wenu yo akasubila amasyu ghitu?" 17 Po ulwitiko lukwisa bo umundu ifwa amasyu, sona amasyu ghakwisa pala umundu alumbilila isya Kilisitu.

18 ✝ Loli ngulalusya ukuti: Imba batakifwa? Naloli bakaghifwa ukuti,

"Isyu lyabo likifwika pachisu chosi ichapasi,

amasyu ghabo ghakafika kumbaka ya chisu ichapasi."

19 ✝ Une ngulalusya sona: Imba kokuti aba Izilayeli batakifwisya? Pabwandilo po u Mozesi akati,

"Ngwisa pakubapela umwe abakabini na bo te baluko,

ngwisa pakubakalalisya umwe ukwendela muluko lo lulunganite."

20 ✝Sona u Yisaya akayugha nu bukifu ngani akati,

"Ngaghiwa na bo batakandondagha.

Ngibonesya kubo batakandalusya une."

21 ✝Loli nisya ba Izilayeli akati,

"Isiku lyosi ngagholosya inyobe syangu

kubo batakifwilagha,

sona nabalukani."