1 Utwe twe bamaka mulwitiko tubaghile pakubafwa abakufoka pakunyamula indamyo syabo. Tutakihobosyaghe twebene bubu. 2 Mubuyo bwake, twebosi tubaghile pakuhobosya bakamu bitu nu kubabombela inyisa, umwakuti ulwitiko lwabo lukulaghe. 3 ✝Pakuti u Kilisitu atakihobosya mwene ukuyana na masimbo aghakuti, "Umusamu gho bakamusamula nagho, ghukangwila." 4 Pakuti chosi cho chikasimbiwa kale mumasimbo, chikasimbiwa ukutumanyisya utwe, umwakuti tungaba nu lusubilo ukwendela mu bufisalyoyo nu lukasyo, lo Amasimbo ghakutumanyisya. 5 ✝U Chala yo akubapa abandu ubufisalyoyo nu lukasyo, abafwe ukuti mwifwanaghe akisa, bo mukukonga ichifwanikisya cha Kilisitu Yesu, 6 umwakuti mwebosi nisyu lyoka mu mughindikaghe u Chala, sona nu wise uwa Malafyale witu Yesu Kilisitu.

7 Pololi mupokelanaghe akisa ukuyana namo u Kilisitu akabapokelela, umwakuti u Chala apaliwaghe. 8 Pakuti ngubabusya ukuti u Kilisitu akaba mubombi pakati pa ba kusilimuliwa, ukulangisya ukuti u Chala musubiliwa, umwakuti asimikisye ipangano lyake, lyo akabalaghisya abanyenya babo, 9 ✝umwakuti na bandu ba panja bope bamughindikaghe u Chala chifukwa cha chisa chake ukuyana na masimbo aghakuti,

"Chifukwa chichi ngwisa pakumughindika pakati pa bandu ba panja.

Ngwisa pakwimba inyimbo isyakupalisya ilita lyako."

10 ✝ Sisimbiwe sona ukuti,

"Hoboka ngani mwe bapanja poka na bandu ba Chala."

11 Sona Amasimbo ghakuti,

"Mwe bandu mwe te mwe ba Yuda mumughindike u Malafyale,

sona mwe bandu abaluko losi mumughindike."

12 Sona wepe umusololi u Yisaya akati,

"Weka uwa banyenya aba Yese akwisa; pakuba mulaghili wa bandu ba panja;

po abene bakwisa pakusubila mumwake."

13 Umwenecho u Chala yo akutupa ulusubilo, abisusye nu lusekelo, sona nu mutende ukwendela mukusubila kwinyu mumwake, umwakuti ulusubilo lwinyu lwendelelaghe pakukula na maka gha Mbepo Mwikemo.

14 Mwee bakamu bangu, naloli isimenye ukuti umwe mwe bandu abisa, sona nukuti mufimenye fyosi akisa, sona nukuti mungamanyisannya. 15 Loli mwakalata uyu nasimbila nu bukifu ngani ifindu fimo, ukuti mbakumbusye. Nasimba bububu chifukwa cha chisa cha Chala, 16 pakusala pa bandu ba panja. Ambile imbombo iyakulumbilila Amasyu Amisa agha Chala ngati ne muputi, umwakuti abandu ba panja babe chakwiyipa ichakumuhobosya u Chala, sona ni chakupaghuliliwa ku kwake nu Mbepo Mwikemo. 17 Pakumamatilana kwene poka nu Yesu Kilisitu, Indi ni chifukwa icha kwitufikisya nacho chifukwa cha mbombo yo ngumubombela u Chala. 18 Ndakwisa pakutamiwa pakuyugha nisya chindu ichingi, awe loli syene syo u Kilisitu abomba ukwendela mumwangu ukuti imbafwe abandu ba panja pakumwifwila u Chala ukwendela mu masyu ghangu, sona ni mbombo syangu, 19 sona nu kwendela mufimanyilo ni fiswigho, sona na maka gha Mbepo Mwikemo uwa Chala. Po ukwandila mu Yelusalemu mupaka mu Ililiko nalumbilila ngani amasyu agha Kilisitu. 20 Amasiku ghosi ngiyula ngani pakulumbilila amasyu, ko batamumenye u Kilisitu, umwakuti ndakasenge palwalo, lo umundu yumo asengite kale. 21 Pakuti amasimbo ghakuti,

"Bo batakabusiwapo nalumo lumo nisya yo bakwisa pakumutesya;

sona bo batifwilepo nalumo lumo nisya yo bakwisa pakumwifwisya."

22 ✝Ichi cho chifukwa bwile napotwagha pakwisa kukwinyu. 23 Loli pakuti ipano na malisya imbombo yangu mufigaba ifi, sona nukuti nalondagha ngani ifinja ifingi ukuti nise pakubatesya, 24 ngulindilila pakubomba bububu losulu, bo ngubuka ku Sipeni ukuti munyafwe pa bulendo bwangu. 25 ✝Loli losulu indi pabulendo ubwakubuka mu Yelusalemu ni fyabupi ifya bandu aba Chala kula kula. 26 Pakuti ifipanga ifya mu Makedoniya nifya mu Akiya fikaba ni chisa ngani, umwakuti fikasangusya ifyabupi pakubafwa abandu abapina pakati pa bandu ababwanaloli aba Chala aba mu Yelusalemu. 27 Chikabahobosya ngani pakubomba sisisi, sona yikaba mbombo yakubafwa abapina. Pakuti aba Yuda bakagabana na bandu babo ba panja ulusayo lwabo ulwa buzimu, po bope abandu ba panja babafwaghe aba Yuda ni findu fyo bakusobelwa ifya mubili. 28 Po bo namalisya imbombo yangu iyi, sona bo nabika ifyabupi fyosi fyo bakasangulila, ngwisa pakubendela, bo ngubuka ku Sipeni. 29 Simenye ukuti bo ngwisa kukwinyu, ngwisa nu lusayo ulukulu ulwa Kilisitu.

30 Mwee bakamu bangu mwa Malafyale witu Yesu Kilisitu, sona nukwendela mu lughano lwa Mbepo Mwikemo, ngubalambilisya ukuti mube poka nune munyiputo, ukunyiputila ngani kwa Chala. 31 Munyiputilaghe kwa Chala ukuti amboke munyobe sya bandu abasita lwitiko aba mu Yudeya. Sona mwiputaghe ukuti abandu ababwanaloli aba mu Yelusalemu bitikisye imbombo yangu, 32 umwakuti mubwighane bwa Chala ningisa kukwinyu nu lusekelo, sona nukwilagha ngani pakwangala numwe. 33 U Chala, yo mwenecho wa mutende, abe numwe mwe bosi. Ameni.