1 Mwee bakamu bangu, imba mutasimenye ukuti nguyugha na bandu bo basimenye indaghilo, indaghilo yili nu bulaghili pa mundu pene po akali mumi? 2 Umwakufwanikisya, nu mukolo yo asenyiwa apinyiwa ni ndaghilo kumulume wake pene po akali mumi. Loli pala umulume wake afwa, po akusatuliwa ku ndaghilo syo sikamupinya ku mulume. 3 Pololi pala akusenyiwa nu mwanalume umunine, bo umulume akali mumi, po akwisa pakwitisiwa ukuti mulowe. Loli pala umulume afwa, umukolo yula musatuke, sona atakulowa pala akusenyiwa sona nu mwanalume umunine.

4 Mwee bakamu bangu, momo sibelile numwe, numwe mukafwa kundaghilo mu mubili wa Kilisitu, yo akasyuka kubufwe, umwakuti tumwelele iseke u Chala. 5 Pakuti bo tukali tuli kumubili, ifinyenwa ifya mbibi ifya ndaghilo fikabomba imbombo mumibili yitu, ukuti fyele iseke sya bufwe. 6 ✝Loli ipano twe basatuke ku ndaghilo, chifukwa tukafwa kucho chikatupinya utwe, po tutakubombela sona mundaghilo sya kale syo sikasimbiwa awe, loli tukubombela musila imbya iya mwa Mbepo.

7 ✝Imba tungati choni? Tungati indaghilo sikunanga? Awe! Loli pala sitaliko indaghilo, po ngali ndasimenye imbibi mo sibelile. Pakuti ngali ndasimenye ukuti ichinyenwa mbibi, pala indaghilo sitambusisye ukuti, "Utakanyenwaghe. 8 ✝Loli imbibi yikalwaghilamo ulusako mundaghilo ulwakumbelela une mufinyenwa ifyakulekana lekana. Pakuti pakusita indaghilo, imbibi yakufwa. 9 Une kale ngaba mumi bo indaghilo sitalipo. Loli bo indaghilo sisa, imbibi yikasyuka, po une ngafwa. 10 Sona indaghilo syo sikaba sya kumba ubumi, ngaghe sikunyisila nu bufwe. 11 ✝Pakuti imbibi yikalwagha ulusako, sona ukwendela mu ndaghilo, imbibi yikasimbula nukungogha.

12 ✝Pololi indaghilo yikemo, ilamulo likemo, sona ubugholoke bwisa. 13 Imba ichindu ichisa, chambelite ukuti ifwe une? Awe, napo papala! Loli imbibi yo yikambelela ubufwe ukwendela mumbombo inyisa, umwakuti imbibi yikalangisiwa ngati mbibi, sona ukwendela mwilamulo, imbibi yikalangisiwa ngati yo mbibi ngani.

14 Tusimenye ukuti indaghilo sya mbepo. Loli une ne wakumubili, ngulisiwe pakuba musya wa mbibi. 15 ✝Une ndakwifwisya cho ngubomba. Pakuti ndakubomba cho ngulonda pakubomba, loli ngubomba syo sibengite. 16 Sona pala ngubomba cho ndakulonda pakubomba, kokuti ngwitika ukuti indaghilo nyisa. 17 Po une tene nengubomba sisisi, loli mbibi yo yikwikala mumwangu. 18 Pakuti simenye ukuti nachimo ichisa cho chikwikala mumwangu, kokuti bundu bwangu ubwa mbibi. Napo ngulonda pakubomba ichisa, loli ngupotwa pakuchibomba. 19 Pakuti ndakuchibomba ichisa cho ngulonda pakubomba, loli ngubomba ichibibi cho ndakulonda pakubomba. 20 Po pala ngubomba cho ndakuchilonda pakubomba, kokuti te nene ne nguchibomba, loli imbibi yo yikwikala mumwangu.

21 Pololi ngusyagha indaghilo isyakuti, po ngulonda pakubomba ichisa, ngwagha ububibi bukubonekela mumwangu. 22 ✝ Pakuti umoyo wangu ghukuhoboka ngani ni ndaghilo sya Chala, 23 loli ngutesya ululaghilo ulunine mumubili wangu, lukulwana nu lulaghilo lwa moyo wangu, sona lwambela pakuba musya wa ndaghilo sya mbibi syo sikwikala mu mubili wangu. 24 Ne mundu umupotwe une, Imba we wenu yo amboke ku mubili wa bufwe ughu? 25 ✝Amapalo ghabe kwa Chala, yo akubomba isi ukwendela mwa Yesu Kilisitu u Malafyale witu!

Pololi une nemwene ni nyinong’ono syangu, ne musya wa ndaghilo sya Chala, loli ku bundu bwangu ubwa mbibi, ne musya wa ndaghilo sya mbibi.