1 ✝Uwe, ute na pakulyeghelapo we ukulonga abanyako, pakuti bo ukulonga abanyako, ukwisusya wemwene pakuti we mulongi ukubomba ifindu fyoka fila fila. 2 Tusimenye ukuti u Chala akulongela mubwanaloli abandu bo bakubomba ifindu fififi. 3 Po uwe we mundu bubu, ukubalonga abanyako, loli ukubomba ifindu fila fila! Imba ukwinong’ona ukuti ukwisa pakubulyegha ubulongi bwa Chala? 4 ✝ Imba uwe ukusula ichisa ichikulu icha Chala, ubufisalyoyo bwake, sona nu bwachimyeka? Imba utasimenye ukuti u Chala wa chisa pakuti akughesya pakukulongosya ukuti upinduke nukusileka imbibi syako? 5 Loli chifukwa cha bukafu bwa moyo wako, umusita kupinduka, ukwilundikila wemwene ubukali bwa Chala, pisiku lyo ubulongi bwake ubwanaloli bukwisa pakufumbuliwa. 6 ✝Pakuti u Chala akwisa pakumupa umundu wesi umufwalo ukuyana ni mbombo syake. 7 Ku bandu bosi bo bakwendelela pakubomba ubwisa, sona bakulonda ubughindikiwa, ulughindiko nu bumi, u Chala akwisa pakubapa ubumi bwa bwile na bwile 8 ✝Loli bosi bo bakwiyighana bene nukukana ukwifwila ubwanaloli, loli nukubomba imbibi, u Chala akwisa pakubakalalila nukubafunda ngani. 9 Indamyo nu kutamiwa fikwisa pakubawila abandu bosi bo bakubomba imbibi, ukwandila na ba Yuda, po sona na bandu bapanja 10 Loli u Chala akwisa pakubapa ubughindikiwa, ulughindiko nu mutende abandu bosi bo bakubomba inyisa, ukwandila na ba Yuda, po sona na bandu bapanja 11 ✝Pakuti u Chala atakutesya icheni cha mundu pakulonga inongwa.

12 Abandu bosi banangite ukusita kumanya indaghilo, bakwisa pakusimila napo batasimeye indaghilo. Sona bosi bo banangite bo basimenye indaghilo, bakwisa pakulongiwa ukuyana ni ndaghilo. 13 Pakuti te bo bakwifwa bubu indaghilo bo u Chala akubayugha ukuti bagholoke pamaso papake, loli bo bakubomba syo indaghilo sikuyugha, bobo u Chala akuyugha ukuti bagholoke pamaso pake. 14 Naloli, abapanja bate ni ndaghilo, loli bo bakubomba nu bundu bwabo ukuyana ni ndaghilo, palwabo bakulangisya ukuti bafimenye fyo babaghile pakufibomba, napo bate ni ndaghilo. 15 Bakulangisya ingalo syabo ukuti syo ndaghilo syo sisimbiwe mumyoyo yabo. Umabyebye wabo akusimikisya ukuti isi syabwanaloli pakuti inyinong’ono syabo sikubasusya pamo ukubimila. 16 Ukuyana na Masyu Amisa gho ngulumbilila, umu momo kukwisa pakubela, u Chala akwisa pakulonga inyinong’ono isyakubusyefu mwilita lya Yesu Kilisitu.

17 Loli uwe, pala ukwiyitisya wemwene ukuti we mu Yuda, pala ukusubila indaghilo, sona nukwitufikisya mwa Chala, 18 pala usimenye syo u Chala akulonda ukuti ubombe, sona umenye pakusala cho chisa chifukwa ukamanyisiwa mu ndaghilo, 19 sona pala naloli wamanya ukuti uwe we mulongosi wa bafwamaso, we nyale ya bandu bo bali muchisi, 20 we mulongosi wa bandu abalunganu, sona we mumanyisi wa bana bapala chifukwa uli nindaghilo ukughaghamo amahala nu bwanaloli bosi. 21 Uwe we kumanyisya abandu abangi, po choni cho utakwimanyisya wemwene? Uwe ukulumbilila ukuti, "Utakibaghe" po imba choni cho uwe ukwiba? 22 Ukuyugha ukuti, "Utakalowaghe" po imba choni cho uwe ukulowa? Uwe we ufibengite ififwani, po imba choni cho ukwibapo ifya munyumba ya kwiputilamo ififwani? 23 Uwe we kwitufikisya mu ndaghilo sya Chala, imba choni cho ukumukosya isoni u Chala pakunangannya indaghilo? 24 ✝Pakuti amasimbo ghakuti, "Ilita lya Chala likusamuliwa mu bapanja chifukwa cha umwe." 25 Pala ukukonga indaghilo, ukusilimuliwa kwako kwisa, loli pala utakukonga indaghilo ukusilimuliwa kwako kwa bubu. 26 Pala umundu yo atasilimuliwe akwifwila syo indaghilo sikuyugha, imba pa maso gha Chala atangaba ngati mundu uwakusilimuliwa, napo atasilimuliwe? 27 Po umundu yo atasilimuliwe, yo akukonga indaghilo akwisa pakukulonga uwe we usilimuliwe, sona uwe uli ni ndaghilo syo sisimbiwe, loli ukunangannya indaghilo. 28 Umu Yuda umwenecho te we yo angaboneka ngati mu Yuda pamaso pa bandu, sona ukusilimuliwa ukwabwanaloli, te ko kukubombiwa pamubili na pamaso pa bandu. 29 ✝Umu Yuda uwabwanaloli we yula yo mu Yuda mumoyo wake. Ukusilimuliwa kwa bwanaloli, ko kusilimuliwa kwa moyo, ko kubombiwa mwambepo, ni ndaghilo awe syo sisimbiwe. Umundu yuyuyu atakupaliwa na bandu, loli nu Chala.