1 Pololi bakamu bangu, chifukwa cha chisa cha Chala ichikulu ngani kukwitu, ngubasuma ukuti mwiyipe imibili yinyu pakuba chakwiyipa cha bumi, ubwikemo sona iya kumuhobosya u Chala, koko kwiputa kwinyu ukwa mbepo. 2 Mutakeghelelaghe ingalo sya bandu aba muchisu ichi, loli mumwitikisye u Chala ukuti andule ubumi bwinyu pakuba inyinong’ono imbya. Po mukwisa pakumanya ubwighane bwa Chala, pakumanya cho chisa, ichakumuhobosya, sona ichakufikapo.

3 Pakuti ichisa cho mbeghiwe une, nguyugha numwe mwebosi ukuti mutakipimaghe mwebene pakuba bapamwanya ngani ukukila namo mubelile, loli mube bakwiyisya imyoyo yinyu ukuyana ni chipimilo icha lwitiko lwinyu, lo u Chala abapile. 4 Pakuti ngati mo tubelile nifigaba ifingi mumubili ghoka, po ifigaba fyosi fili ni mbombo isyakulekana lekana. 5 Umwakuyana bubu, napo twe bingi, twe mubili ghoka mwa Kilisitu, sona tumamatisiwe ku munine na kumunine ngati figaba ifya mubili ghoka ifyakulekana lekana. 6 ✝Tuli ni fyabupi ifyakulekana lekana ukuyana namo u Chala akatupela mu chisa chake. Pala uli nichabupi cha kusolola, ubaghile pakubomba nacho ukuyana nu lwitiko lwako. 7 Pala ichabupi chako chakubomba, ubaghile pakubomba, pala chakumanyisya, ubaghile pakumanyisya. 8 Pala ichabupi chako cha kubakasya, ubaghile pakubomba bububu, pala kupeleka, ubaghile pakupeleka, pala mulongosi, alongosyaghe nu moyo ghosi, yo akubapelela abanine ichisa, abombe umwakuhoboka.

9 Ulughano lutakabe lwa bumyasi. Uchibenge cho chibibi, loli chikolelele cho chisa. 10 ✝ Mughananaghe nu moyo ghosi ngati mwe bakamu. Mughindikanaghe mwebene. 11 Mutakabe bakata, loli mwiyuleghe mwa mbepo. Sona mu mubombelaghe u Malafyale umwakwiyipa nu moyo winyu ghosi. 12 Muhoboke mulusubilo lwinyu, mukibe mundamyo sinyu mubukilile pakwiputa akalilo kosi. 13 Mugabanaghe na ba Kilisitu abanyinyu bo bakusobelwa. Mupokelaghe abagheni.

14 ✝Mubasaye bo bakubafwima, mubasaye sona mutakabaghune, awe. 15 Hobokagha poka na bo bahobokite, lilagha poka na bo bakulila. 16 ✝Mube nu moyo wa kwifwana na banyinyu bosi. Mutakitufyaghe, loli mwangale poka na bandu bo basuliwe.* Mutakipimaghe mwebene ukuti mwe bamahala ngani ukukila bosi.

17 Utakatanisyaghe ububibi pa bubibi. Cheba pakubomba cho chisa pamaso pa bandu bosi. 18 Pala chingabombiwa, mube mu mutende na bandu bosi. 19 ✝Mwe bakamu bangu, mutakatanisyaghe ububibi, loli mu mulekele u Chala ukuti atanisye mubukalale bwake. Pakuti amasimbo aghakuti, "Ukutanisya ko kwangu, une ngwisa pakutanisya." U Malafyale akuyugha. 20 Loli pala umulughu wako ali ni sala, umupe ichakulya, pala ali ni nyota, umupe amisi. Pakubomba bububu kokuti ukumukosya ni chibunga cha mulilo wa mababu pamutu pake." 21 Mutakitikisye ukuti ububibi bubapote, loli mubupote ububibi pakubomba inyisa.