1 Mu mupokele umundu yo ulwitiko lwake lwakufoka, loli mutakadalingane nawe pa syo akwinong’ona. 2 Umundu yumo ulwitiko lwake lukumwitikisya pakulya ifindu fyosi, loli yumo ulwitiko lwake lwakufoka, akulya inyanyi isyamani syene. 3 ✝Umundu yo akulya ifindu fyosi atakamusamulaghe yo atakulya ifindu fyosi. Sona yo akulya ifindu fyosi, atakamulongaghe yo akulya ifindu fyosi, pakuti we Chala yo akamupokela. 4 Imba we wenu uwe ukuti umulongaghe uwambombo uwa yumo? We Malafyale wake mwene yo angatumula pala akubomba akisa pamo akupotwa. Po akwisa pakubomba akisa mundasi, pakuti u Malafyale weyo amenye pakumupela ukuti abombaghe akisa.

5 Umundu yumo akwinong’ona ukuti isiku limo lya pamwanya ngani ukukila amasiku ghosi aghangi, bo abanine bakwinong’ona ukuti amasiku ghosi ghayanite bububu. Umundu wesi abombaghe ukuyana namo asimikisisya mu nyinong’ono syake. 6 Wesi yo akwinong’ona ukuti isiku limo lya pamwanya ngani ukukila amasiku ghosi, akubomba bububu ukuti amughindikaghe u Malafyale. Po yo akulya ifindu fyosi, akubomba bububu ukuti amughindikaghe u Malafyale pakuti pakubomba bububu akumupalisya u Chala. 7 Nayumo mumwitu yo ali nu bumi pamwene, nayumo yo akufwa mwene. 8 Pala tuli nu bumi, tukwisa pakuba nu bumi chifukwa cha Malafyale, sona pala tukwisa pakufwa, tukwisa pakufwa chifukwa cha Malafyale, napo tube nu bumi pamo tufwe, twe bandu ba Malafyale. 9 Pakuti u Kilisitu akafwa nukusyuka kubufwe ukuti abe we Malafyale wa bandu abumi sona na bafwe. 10 ✝Imba choni cho ukumulonga umukamu wako? Imba choni cho ukumusamula umukamu wako? Pakuti twe bosi tukwisa pakwimilila pandasi pa chitengo cha bulongelo bwa Chala. 11 ✝ Pakuti kusimbiwe ukuti,

"Po une indi nu bumi, u Malafyale akuyugha,

ifipefu fyosi fikwisa pakufughamilila,

po imilomo yosi yikwitikisya kwa Chala."

12 Pololi wesi mu mwitu akwisa pakwibelengela mwene kwa Chala.

13 Pololi, tuleke pakulongana. Mubuyo bwake, tuleke pakubomba fyo fingabapunusya abandu abangi, pamo pakubika ichisinga musila ya bandu abangi. 14 Pakumamatilana kwangu poka nu Malafyale u Yesu simenye ngani ukuti chitalipo ichindu chimo cho chinyalite pa chene bubu, loli pala umundu yo akuchipima ukuti chinyalite, po ichindu chila chila kukwake chinyalilte. 15 Pala ukumupela umukamu wako ukuti anange chifukwa cha fyakulya fyo ukulya, kokuti utamughanite umukamu yula yula. Utakamunange umukamu wako, yo u Kilisitu akamufwila, chifukwa cha fyakulya fyo ukulya. 16 Utakitisye ukuti ifindu fyo ukufipima ukuti fyisa, abandu bafiyughaghe ukuti fibibi. 17 Pakuti Ubunyafyale ubwa Chala bute nimbombo ni fyakulya ni fyakung’wa, loli ubwanaloli nu mutende, sona nu kuhoboka, fyo u Mbepo Mwikemo akupa. 18 Sona pala umundu akumubombela u Kilisitu bububu, akumuhobosya u Chala, sona nukupaliwa na bandu.

19 Pololi sa tughesye ngani pakubomba ifindu fyo fya mutende, umwakuti tukasannye. 20 Mutakakanaghe imbombo ya Chala chifukwa cha fyakulya. Ifyakulya fyosi fyisa bubu pakulya. Loli chibibi ukuti umundu alye ichindu chosi cho chingamupela umundu uyungi ukuti anange. 21 Chisapo ukuleka pakulya inyama pamo ukung’wa ubwalwa bwa mafilu pamo pakubomba cho chingamupela umukamu wako ukuti anange. 22 Usungilile syo ukusubila nisya findu fififi pakati papako nu Chala. Musayiwa umundu yo atakwilonga mwene, bo asimikisya ukuti ichindu cho akubomba, chisa. 23 Loli pala umundu akukayikila nacho akulya, u Chala akumususya bo akulya, chifukwa imbombo syake sitimilile pa lwitiko. Sona ichindu chosi cho chitimilile palwitiko chibibi.