1 Umundu wesi abifwilaghe abalaghili, pakuti butalipo nabumo ubulaghili loli bo bukufuma kwa Chala. Ubulaghili bosi bo bulipo bukimikiwa nu Chala. 2 Pololi wesi yo akususannya nu bulaghili, akususannya na cho u Chala akimika. Sona wesi yo akubomba bububu akwisa pakwipelela mwene ubulongi. 3 Pakuti abalaghili batakuboghofya bo bakubomba inyisa, loli bo bakubomba ububibi. Imba ukulonda ukuti utakoghope ubulaghili? Bomba cho chisa, po ukwisa pakupaliwa, 4 pakuti yo mulaghili mubombi wa Chala, yo akubombela inyisa. Loli pala ukubomba ichibibi, po ghoghopaghe, pakuti umulaghili atakukola upanga pabu, pakuti umwene mubombi wa Chala yo akwisa nubukalale nu kubafunda bosi bo bakubomba ububibi. 5 Pololi, mubaghile pakubifwila abalaghili, te kokuti mukoghopa ubukali ubwa Chala bwene, loli chifukwa cha mabyebye.

6 ✝Ichi cho chifukwa mukusonga umusongo, pakuti bo bakulaghila babombi ba Chala bo bakupeleka akabalilo kabo kosi pa kubomba. 7 ✝Po mubalipile fyosi fyo fibabaghile, pala gho musongo, musonge umusongo, pala gho musongo uwa katundu musonge, pala lughindiko, pamo mapalo fipeghiwe ku bandu bo fibabaghilile.

8 Mutakabe ni ngongole nu mundu, loli ingongole yibe ya lughano. Pakuti wesi yo akumughana umunine akukwanilisya indaghilo. 9 ✝Pakuti Indaghilo sikuti, "Utakalowaghe, utakaghoghaghe, utakibaghe, utakanyenwaghe" ni ndaghilo syosi isingi gho ghonganite pilamulo lyoka ilyakuti, "Umughane umupalamani wako ngati mo wighanile wemwene." 10 Pala yo amughana umupalamani, atangamubombela nachimo ichibibi. Po ulughano lukukwanilisya indaghilo.

11 Mubaghile pakubomba sisisi, chifukwa musimenye ukuti akabalilo kakwana akakuti mulamusye mutulo. Pakuti akabalilo kakupokiwa kali papipi ngani ukukila ko tukandilagha pakusubila. 12 Ubusiku buli papipi pakumala, umusanya ghuli papipi pakwanda. Po sa tusileke imbombo isya muchisi, po tufwale ifilwilo fya bwelu. 13 Sa tulangisye ingalo inyisa ukuyana na bandu bo bakwenda mubwelu ubwa pamusanya. Tutakabe bandu abapafu pamo baching’wela, tutakabe bamalaya pamo bapopo, tutakabe babwite pamo bakabini. 14 ✝Loli fwala u Malafyale u Yesu Kilisitu ngati chilwilo chinyu, po mutakinong’onele isya mubili syo ghukulonda.