1 Syosi isi ngababusya umwakuti muleke pakutagha ulwitiko. 2 Bakwisa pakubafumya munyumba sya kwiputilamo, sona kakwisa akabalilo ko wesi yo akubaghogha umwe akwisa pakwinong’ona ukuti akumubombela imbombo u Chala. 3 Po bakwisa pakubomba bububu chifukwa batamumenye u Tata, nune batamenye. 4 Loli nababusya ifindu fyosi ifi umwe, umwakuti bo akabalilo kabo akwisa, mukwisa pakukumbuka ukuti ngabasoka nisya babo.

Ndakababusya isi pabwandilo, chifukwa tukaba poka numwe. 5 Loli akabalilo aka ngubuka ku yo akanduma une, po nayumo uwa kundalusya une, ‘Ukuti ukubuka kwighi? 6 Pakuti mbabusisye fyosi ifi umwe, imyoyo yinyu yiswile nichitima. 7 Loli ngubabusya ubwanaloli, ukuti chisapo kukwinyu ukuti une ngufumapo. Pakuti pala ndangafumapo, po umwafwilisi atakwisa ku kwinyu. Loli pala nabuka, po ngwisa pakumutuma ku kwinyu. 8 Po umwene isa, akwisa pakusimikisya isya bandu ba muchisu chapasi nisya mbibi, nubwisa sona nisya bulongi, 9 bakupuba nisya mbibi chifukwa batakusubila une, 10 bakupuba nisya bwisa, chifukwa ngubuka kwa Tata, po mutakuya payundesya sona une, 11 bakupuba nisya bulongi, chifukwa umulaghili wa chisu chapasi ichi alongiwa kale.

12 Ngali indi nasyo inyingi isya kuyugha numwe, loli mutabaghile pakukiba ulu. 13 Loli bo u mbepo uwa bwanaloli isa, yo akwisa pakubalongosya ubwanaloli bosi. Atakwisa pakuyugha amasyu ghake, loli akwisa pakuyugha fyosi fyo ifwa, sona akwisa pakubabusya ifundu fyo fikwisa. 14 Akwisa pakungindika une, chifukwa akwisa pakusenya fyo nguyugha nu kubabusya umwe. 15 Fyosi fyo u Tata ali nafyo fyangu. Chifukwa chake ngayugha ukuti u Mbepo ayukusenya fyo nayugha, nu kubabusya umwe.

16 "Pakabalilo akapala bubu mutakwisa pa kundesya sona, loli pala penda akabalilo akapala muyukundesya sona."

17 Abamanyili bake bamo bakanda pakulalusannya bene bene ukuti, "Imba akung’anamula choni? Po akuyugha ukuti, ‘Kwasyala akabalilo akapala bubu mutakwisa pakundesya, ‘sona pala penda akabalilo kapala mukwisa pakundesya sona, ‘Chifukwa ngubuka kwa Tata.’ 18 Abene bakendele ukuyughisannya ukuti, Imba akung’anamula choni, ‘akabalilo kapala bubu? Utwe tutakwifwisya syo akayugha."

19 U Yesu akasimanya ukuti bakalonda pakumulalusya sisisi, po akababusya akati, Imba mukulalusannya mwebene bene po ngayugha ukuti, Kwasyala akabalilo kapala mutakwisa pakundesya sona, loli pala penda akabalilo akapala muya kundesya sona? 20 Ngubabusya ubwanaloli ukuti, mukwisa pakulila nu kusulumannya, bo ichisu chapasi chikusekela. Mukwisa pakuba ni chitima, loli ichitima chinyu chiyakuba lusekelo. 21 Bo umukolo akupapa umwana akwifwa ububafu, chifukwa akabalilo kake ka kwana, loli pala apapa umwana, akulufya ububafu chifukwa cha kusekela kwake ukuti apapa umwana pa chisu chapasi. 22 Po sili bubu numwe, aka kabalilo kinyu aka chitima, loli ngwisa pakubatesya umwe sona, po imyoyo yinyu yikwisa pakusekela, po nayumo yo akwisa pakufumya ulusekelo lwinyu.

23 Pisiku lililyo mutayakusuma nachimo ku kwangu. Ngubabusya ubwanaloli ukuti, u Tata wangu ayakubapa fyosi fyo mwasuma mwilita lyangu. 24 Ukufika ipano mutasumitepo nachimo mwilita lyangu. Musume po mukwisa pakupokela, sona ukusekela kwinyu lukwanilisiwe.

25 "Nayugha numwe ifindu ifi mufyili, loli kakwisa akabalilo ko ndakwisa pakubombesya ifyili. Ngwisa pakubabusya pa bwelu isya Tata. 26 Pisiku lililyo muya ukusumila mwilita lyangu. Po ndakuyugha ukuti nguya pakubasumila kwa Tata, 27 pakuti u Tata mwene weyo abaghanite umwe, chifukwa chakuti munganite une sona mwasubila ukuti une ngafuma kwa Chala. 28 Une ngafuma kwa Tata nisile mu chisu chapasi, pa kabalilo aka ngutila mu chisu chapasi ichi ngunyokela kwa Tata."

29 Abamanyili aba Yesu bakayugha bakati, "Akabalilo aka ukuyugha pa bwelu, utakuyughila sona mufwili! 30 Akabalilo aka, twasimanya ukuti ufimenye findu fyosi, sona ukuti utakulonda yumo akulalusye amalalusyo, isi sikutepela utwe tusubile ukuti ukafuma kwa Chala." 31 U Yesu akabamula akati, "Imba ipano po mwasubila?" 32 Akabalilo ka kwisa, sona kafikite ko mukwisa pakunyambana, umundu wesi kunyumba yake, po mukwisa pakundeka nemwene, loli une ndemwene, chifukwa u Tata ali poka nune. 33 Une nababusya ifindu ifi umwe, ukuti mube nu mutende mumwangu chifukwa cha une, muchisu mukwisa pakitamiwa loli mube bakifu! Pakuti une nachipota kale ichisu chapasi."