Agradecimento a Deus
Agradecer a Deus é louvor, adoração e reconhecimento da sua soberania. Dai graças ao Senhor porque Ele é bom — a sua misericórdia dura para sempre!
Ana ene taragl kane kane pre kamage ersre, taragl swara ta pre nomane sikrio. Ene kamage eraiglkwa i, taragl kane kane pre God agle di prisre, ye ama di wakai ye teo.
Filipai yoba pre Pol God di wakai yei togwa
Ana na ene Filipai yoba pre poglo di prika igne, na Godna ege ege di wakai yei teiga.
Te, ene ka siragl mere dinaiglkwa mo kogon siragl mere ta eraiglkwa i, ene Yaglno Kade Jisas yobama munedi prisre, yomere pamere keme mudu erio. Te, Krais kogon erumara i mina ene Neno Kade God di wakai yei te molo.
Tesalonaika yoba pre mediglmara i pre Pol gun yogwa
No ege ege ene Tesalonaika yoba mudu pre God di wakai yei tedre, ene pre kamage ere tomga. No ene pre Neno Kade God di wakai yei tomga i, i siragl pre ene mabuno siragl mere ta erikwa i, no ege ege poglo di prisre, God di wakai yei tomga. Ene mabunono tau poglo di prisre, God di wakai yei tomne diga i, yegl pre diga, ene Yaglno Kade Jisas Krais pre mediglmara i mina God kogonmo ere meglkwa i no poglo di prisre, te, ene deno muduno Jisas Krais teimara i mina yoba pere ake ple di tenamnedi kogon podo erikwa i, ama poglo di prumga. No ene mabunono suo i poglo di prisre, ama yubun ene meglmara ugwa igne ene Jisas kaima ede ikne unabedi sugl moglsre, adigl gigledi meglkwa i pre no poglo di prisre, ene pre God di wakai yei tomga pre diga.
Pol ye God di wakai yei togwa
Na ene Korin yoba ege ege poglo di pre, God di wakai yei teiga. I siragl pre God ere mogl, ye Krais Jisas kogon erumara i mina ene ere wakai kaima ere togwa.
Yegl paugwa ba nono God di wakai yei tenamga paugwa. I siragl pre nono Yaglno Kade Jisas Krais kogon erumara i mina God ye nono aimadi kamin kor moraiglmedi norsre, geglkwa mabuno nono ta si atne edekrabedi ere noro kodugwa.
Krais kuda yobuglo erumara nono akie win sumga
Na Taitus doko moglka igne, dena muduna yubun dogwa ba na ege ege God di wakai yei te pai moglka. I siragl pre soldia bitno yagl ta kuda yobuglo ersre, soldiamo auro i ede ikne u yugomugl umere mere yegl, God ege ege no omnara ede okna ogo, no Krais bogl u swara omga pre ye mokomugl sika sidre, yoba Krais kamo prisre, Krais pre pogl sinaiglmedi di wan munga. Ye kamo di wan munga i, yoba ede nuglo demene wakai erukwa i gaiglko, inge ede bage bage omere mere yegl, ye kamo ede bage bage ogwa.
Ana God ye yoba kaya mokna ere yaglsre, si nedre, eraiglmedi togwa. Tomere yegl mere God ene mabuno du ere ede podo pidre, ene yoba pere ake ple di tenaiglmedi konbauna yauro tenabuka.
God ene taragl tau mere i pi yoba pere tenaiglmedi taragl kane kane ene tenan, ene taragl i, tau i makai sidre, no i pi tenaiglmedi noribi, no i pi yoba pere tomun, ye idre, God di wakai yei tenaiglkwa.
Ene yegl ersre, enene akie mogl, giglage kaima di ikne ikne edenaiglkwa. Ba ene giglage dinaiglkwa igne, ene drano mina dikrio. Ene deno muduno bogl akie Yaglno Kade giglage di teo. Te, nono Yaglno Kade Jisas, God Kere Yugwa Yagl i kogon erumara i pre ene God Nem ege ege di wakai yei teo. Jisas kogon erumara i mina God ene taragl wakai kane kane ere togwa pre ene ege ege ye taragl mudu erukwa i poglo di prisre, ye di wakai yei teo. Te, ene God Kere Yugwa Yagl Jisas pre mitna edidre, ikne ikne mogl atne ede molo.
Ame di meglko, Jisas ye bret 5-pela ya buglo bagle suo ikra idre, kan heven ibo ede, God di wakai yei togwa. Di wakai yei tedre, bret ake buko didre, ye duglo beglkwa yoba i pi tenaiglmedi togwa. Tedre, ye buglo bagle suo ikra ama ake buko didre, yoba mudu yubu si togwa. Yubu si togo, yoba mudu neigwa, dano eruko, ye bret ya buglo bagle kawa te yogwa i, gade makai sidre, degigl gagl 12-pela gre kau sigwa.