Ajuda ao próximo
Ajudar o próximo é mandamento de Deus e expressão prática da fé. A Bíblia ensina que a fé sem obras é morta — e que servir ao menor dos irmãos é servir a Cristo.
काकरेकी जब मै भुँखाइल रहुँ, तब तुहुरे महिन्हे खाई देलो। जब मै प्यासल रहुँ, तब तुहुरे महिन्हे पिए देलो। जब मै परदेशी रहुँ, तब तुहुरे महिन्हे रना ठाउँ देलो। जब मै नङ्ते रहुँ, तब तुहुरे महिन्हे लुग्गा घलादेलो। जब मै बेमार रहुँ, तब तुहुरे महिन्हे हेरे अइलो। जब मै झेलमे रहुँ, तब तुहुरे मोरिक थेन भेँटा करे अइलो।’ तब् धर्मी जनहुँक्रे महिन्हे जवाफ दिहीँ, ‘हे प्रभु, कब हम्रे अप्निहे भुँखाइल देख्ली और खाई देली? या प्यासल देख्ली और पिए देली? कब हम्रे अप्निहे परदेशी देख्ली, और हम्रे रहना ठाउँ देली? अथवा नङ्ते देख्ली और लुग्गा घलादेली? और कब हम्रे अप्निहे बेमार या झेलमे देख्ली और अप्निहे भेँटा करे अइली?’ तब् मै, रज्वा ओइन्हे जवाफ देके कहम, ‘जात्तिके, मै तुहुरिन्हे कहतुँ, तुहुरे यी विश्वासी दादू-भैयनमेसे सक्कुहुनसे छुटिमेसे एक जहनहे ज्या-जतरा करलो, उ तुहुरे महिन्हे ते करलो।’
"तुहिन्से मगुइयाहे देऊ और तुहिन्से कर्जा लेहे चहुइयाहे मनाही ना करो।
अस्तेहेँके तुहुरिन्के ओजरार मनैनके आघे चम्के। और ओइने तुहुरिन्के मजा काम देखिँत। और स्वर्गमे रहुइया तुहुरिन्के बाबक महिमा करिँत्।"
देऊ और तुहुरिन्हे फेन देजाई। मनै प्रशस्त मात्रामे दाब-दाबके जोरसे हिलाके, अँरैना मेरके तुहुरिन्के कोनामे धारदिहीँ। काकरेकी जोन नापसे तुहुरे नप्थो, वहे नापसे तुहुरिन्के लग फेन नाप जाई।"
तब मनै यूहन्नाहे पुँछ्लाँ, "असिन हो कलेसे परमेश्वरके दण्डसे बँचक लग हम्रिहिन्हे का करे परी?" ऊ ओइन्हे जवाफ देहल, "जेकर थेन दुईथो झुल्वा बा ऊ नै रहुइयनहे एकथो दैदेहे, और जेकर थेन खैना चिज बा उ फेन ओस्तेहेँक करे।"
तुहुरिन्के सम्पति बेँचके दान दैदेऊ। अपन लग स्वर्गमे धन जमा करो, जोन कब्बु फेन नाश नै हुई। वहाँ चोर नै अइथाँ, और किरा फेन नै लग्थाँ। काकरेकी तुहुरिन्के मन वहैँ लागल पलिरहत, जहाँ तुहुरिन्के धन रहत।"
येशू कलाँ, "मोरिक आज्ञा यहे हो, कि जसिके मै तुहुरिन्हे प्रेम कर्नु, तुहुरे फेन एकदोसर जहनहे ओस्तेहेँके प्रेम करो।
केक्रो थेन यी देखाइक लग कि उ अपन संघरियनहे प्रेम करत, यिहिसे भारी आकुर कौनो तरिका नै हो कि ऊ ओइन्हे बँचाइक लग अपन ज्यान दैदेहे।
मै सक्कु बातमे तुहुरिन्हे उदाहरण देहल बतुँ, कि तुहुरे फेन अस्तेहेँके कड़ा मेहनत करके कमजोर मनैनहे सहयोग करे परत। प्रभु येशूक वचन याद रहे, कि ऊ अप्निहीँ कहल बताँ, कि लेनासे देना धन्य हो।"
अतरा कहिके ऊ ठेहुनी टेकल, और वहाँ रहल सक्कुहुनके संग प्राथना करल। तब ओइने सक्कु जाने बहुत रुइलाँ, और पावलहे उँक्वारमे लेके चुम्मा खाके बिदा करलाँ। तुहुरे महिन्हे दोबारा कबु नै देख्बो कहिके पावलके कहल बातमे ओइने गजब शोक करलाँ। तब् ओइने उहिहे पानी जहाजसम पुगैलाँ।
परमेश्वरके पवित्र मनैनहे ज्या चिजके जरुरी बतिन, ओम्ने ओइन्हे सहायता करो; पहुननहे सत्कार करो।
शायद हम्रे जन्थी कि यी बातसे कुछु फरक नै परत, पर हम्रे अपनहे किल खुशी करक लग असिके नै करना हो। हम्रे विश्वासमे पक्का रहल मनै उ मनैनके शंखा और विश्वासहे फेन विचार करे परत, जेने विश्वासमे कमजोर बताँ, ओइने यी बातहे गलत मन्थाँ।
जब तुहुरे समस्यामे परबो, तब तुहुरे एकदोसर जहनहे सहयोग करहो। अस्तेहेँके तुहुरे ख्रीष्टके नियम कानुनहे पालन करहो।
चोरी करुइया मनैया फेनदोस्रे ना चोराए; बेन ऊ अपन हाँथेलेके ईमानदारीसे काम करे, ताकि गरीब मनैनहे देहक लग ओकर थेन कुछु चिज रहिस।
तुहुरे हरेक जाने अपन किल भलाई ना खोजो, पर दोसुर जहनके भलाईमे फेन ध्यान देऊ।
हे मोरिक विश्वासी भैयो, यदि केऊ कहत कि मै प्रभु येशू ख्रीष्टकेमे विश्वास करथुँ। पर दोसुर जहनके लग भलाइक काम नै करत कलेसे उहिहे का फाइदा हुइलिस्? का असिन विश्वास उहिहे बँचाई सेक्हिस? यदि कौनो विश्वासी भैया या बाबुहे लुग्गक जरुरी बतिन। और ओइन्हे रोट्दिन खानक कमि हुइथिन। और ओइन्हे तुहुरिन्मेसे केऊ असिक किल कहि कि, "शान्तिसे जाऊ। दँदुर रहो, और पेट भरके खाऊ।" पर जोन चिज शरीरके लग जरुरी बा उ चिज यदि तुहुरे ओइन्हे नै देबो कलेसे का फाइदा हुइल? ओस्तेके जोन विश्वास भलाइक काममे प्रकट नै हुइत कलेसे उ विश्वास मुअल हो।
पर जेकर थेन संसारके धन-सम्पति बा, तभुन फेन अपन दादू-भैयनहे जरुरीमे परल देख्के ओइन्केमे ऊ नै सोगाइत कलेसे ओकरमे परमेश्वरके प्रेम रहे नै सेकी।