Ajuda ao próximo
Ajudar o próximo é mandamento de Deus e expressão prática da fé. A Bíblia ensina que a fé sem obras é morta — e que servir ao menor dos irmãos é servir a Cristo.
Mbrə ə̂në əgo mî əmə, e kô rəgo kə əmə; əgo ə̂ngû mî əmə, e tô ə̂ngû kə əmə; mə sə̂ tə tshângâ, e zâ əmə gâ lə anda nə̂ e; mə sə̂ kpɔnderɔ, e yî ləba gâ tə̂ əmə; mə sə̂ də rəka, e nâ gâ ngotə̂ əmə; mə sə̂ lə anda kânga, e nâ ə wû əmə." Bale, aə̂rɔ̂ azü nə sə kə kirə əpʉ kə ətshə ə pa: "Âgbɔ̂ Əyïngerə, gorɔ də̂ əgo mî əbə â ä wû əbə â kô rəgo nə kə əbə, wala əgo ə̂ngû mî əbə â ä tô ə̂ngû nə kə əbə? Gorɔ də̂ bə sə̂ tə tshângâ nə â ä wû əbə â zâ əbə mâ ndə ä, wala kpɔnderɔ â ä yî ləba gâ tə̂ zə? Gorɔ də̂ ä wû əbə də rəka tə̂ zə nə, wala mâ lə anda kânga nə â ä nâ ə wû əbə?" Bale, əyïngerə nə sə kə kirə əpʉ kə əndje ə pa: "Djatra əpʉ, mə pa kə e, alɔnɔ̂ ə̂në e ma ərə səkɔ kə ə̈bə̈ əngʉ əzü səye bale lə takpa tə̂ alaye əmə, əmə də̂ e mâ ərə nə kə əmə kɔ."
Kədə əzü kə yu tshuku ərə kə əbə, zä kə ətshə. Əzü â yu tshuku ködä kə əbə, drü ətshə drü ne.»
Ə̂yîəwo nə̂ e tshë ndje äwä bale rə lə ala azü, ndə kə pa əndje wu aə̂rɔ̂ aərə ə̂në e sə kə ma kɔ, ka ə mbe Abä e ə̂në tshə sə mâ lafɔ kɔ.»
E tö ərə kə azü ka Ndjapä to ndje ərə kə e. Əndje sə kə to ərə kə e ə sə kə su ngbede nə̂ e trɔ̂, əndje meme ə tu gâ tʉ. Mbrə ə̂në ərə ə̂në e sə kə za ndə kə to də ərə kə angâ e kɔ də̂ Ndjapä sə kə za ndə kə to də ərə kə e.»
Ə̂kpû azü nə yû Zââ nə ə pa: «Ndjapä yində nə ə pa ä mbrə yekɔ?» Tshə kîrə əpʉ kə əndje ə pa: «Əzü ə̂në tshə sə də əkro ləba bishi, tshə zä ə̈bə̈ nə bale kə ətshə ə̂në tshə sə sə də nə ne kɔ. Əzü ə̂në tshə sə də rəgo, tshə tö ə̈bə̈ nə kə ətshə ə̂në tshə sə sə də nə ne kɔ.»
«E kä aərə nə̂ e ə kö ngendja nə kə alayïəyo. E kö ngendja nə̂ e gâ lə angbede ə̂në ə ndɨ ndɨ tə̂ ərə ne kɔ, e bäta aərə nə̂ e mâ lafɔ mâ tə̂ ətshe ə̂në aərə yu yu tə̂ nə ne kɔ. Mâ je, əzü kə zɨ angba aərə guta gu ne wala akɔ kə gba tshelə aərə guta gu ne. Mbrə ə̂në tə̂ ətshe ə̂në aərə nə̂ e sə tə̂ nə, lɔsu e sə kə sə ndje mâ je.»
Əpʉ ə̂në mə sə kə za ama də nə kə e kɔ kə səye: e yï tə̂ e lə takpa tə̂ e, mata ə̂në mə yîndə e kɔ.
Ə̈bə̈ âgbɔ̂ kə yi tə̂ ə̂në ə ro ənə̂ sə̂ ə̂në əzü ka tə̂ ye də sorô ye nɔ̂ mbrə agbɔbəngâ nə kɔ guta gu ne.
Lə aərə nɔ̂, mə yîsə̂ nə kə e ə pa e mbrə kosəra rə ndə kə pa e tɨ alayïəyo gâ lafɔ ə li tshelə e gâ pâ əpʉ ə̂në Âgbɔ̂ Əyïngerə Jezu pâ də ə̂tə̂ ye ə pa: "Ə̂rû kə za ərə kə əzü rô ə̂rû kə sɔtə̂ ərə lə kəna əzü!"»
Mandâ əpʉ səkɔ, Palɔ nə gbə̂te də aəndje ə yû Ndjapä mbrə əndje nɔ̂. Azü nə nɔ̂ yî ama əndje lə əkɨ ə têgbɔ Palɔ nə lə əkro ye ə ɔ̂ ama ye. Əndje sə̂ də əyo tə̂ lɔsu əndje kʉ mbrə əpʉ ə̂në tshə pâ əndje sə sə kə kwatəndje ə wu ala əne ne kɔ. Mandânə, əndje gî ətshə ndjɔ gâ tə̂ ama bato nə.
E kö aərə ə̂në azü nə̂ Ndjapä sə də əgo nə kɔ kə əndje. E wüsə̂ kə ko ayirə gâ lə aanda nə̂ e.
Əzə̂ ə̂në a gbɔ ə gbɔ lə əpʉ lɔsu kɔ, a lï ndə kə pa a ru tshelə əzə̂ tə̂ kə mɔ azü ə̂në əndje gbɔ gbɔ ne kɔ, a pä prä äwä ərə ə̂në ə fʉ kʉ tə̂ əzə̂ də ə̂tə̂ əzə̂ kɔ ne.
E kö akongbɔ nə̂ angâ e lə takpa tə̂ e, â rə də̂ e sə kə mbrə ndəma âgbɔ̂ əpʉ ə̂në Kristə nə pâ kɔ.
Əzü ə̂në tshə sə kə zɨ angba, tshə zɨ̈ angba zɨ̈ kwatə̂ye ne; tshə wü əyo ə mbrə̈ kosəra də kəna ye də ə̂tə̂ ye, ndə kə pa tshə sɔtə̂ ərə ə za kə ə̈bə̈ əyïəyo.
Ndə kə pa əzü bale bale lishi gâ tə̂ ərə nə̂ ye də ə̂tə̂ ye, ərə nə̂ angâ nə də̂ tshə ko ala ye gâ tə̂ nə.
Alaye əmə, kədə ə̈bə̈ əzü kə pa əne sə də lɔsu â mbrə ə̈bə̈ ərə mbrə ndə kə pa tshə yisə̂ əpʉ lɔsu ye nə gashu ne kɔ, ə sə kə mbrə yekɔ? Lɔsu nə lï ndə kə pa ə tshɔ ətshə lə kuzu a? Kədə ə̈bə̈ aye wala ə̈bə̈ kobɔ kə sə sə də ləba ndə kə yi nə ne â sə sə də rəgo lə əlo bale bale ndə kə zɨ nə ne, â ə̈bə̈ əzü lə takpa tə̂ e pa kə ətshə ə pa: «Gü je lə blatshe! Tshekotə̂ zə wö lə ləba, zɨ̈ rəgo tshelə zə sü!» Bale, kədə tshə ko ko aərə ə̂në ə lï ndə kə pa ə mbrə ə̂rɔ̂nə kə ətshə kɔ kə ətshə ne, yekɔ də̂ amba əpʉ nə sə kə mbrə kə ətshə? Əpʉ lɔsu nə sə ndje kʉ rə. Kədə əzü kə sə də lɔsu â mbrə kosəra lɔsu nə mbrə ne, lɔsu ye nə sə mata ərə ə̂në ə tshû gâ ye kɔ.
Bale, kədə ə̈bə̈ əzü kə sə də aə̂rɔ̂ aərə tshepashɔ, â wu aye nə ə̂në tshə ma əgo ə̈bə̈ ərə kɔ â mbrə ə̂rɔ̂ nə mbrə kə ətshə ne, kə yində Ndjapä nə sə tə̂ lɔsu ye atâ a?