Ajuda ao próximo
Ajudar o próximo é mandamento de Deus e expressão prática da fé. A Bíblia ensina que a fé sem obras é morta — e que servir ao menor dos irmãos é servir a Cristo.
किल्हैकि हुंह थिअ भुखअ अर तम्हैं दैनअ मुल्है खाणां लै। ज़ेभै हुंह नचिशअ थिअ, तम्हैं पणैऊंअं मुखा पाणीं। हुंह त परदेसी अर तम्हैं किअ मुल्है आपणैं घअरै रहणा लै छ़ांदअ। हुंह त नांगअ अर तम्हैं दैनै मुल्है बान्हणां लै झिकल़ै। हुंह त बमार अर तम्हैं किई मेरी कारी-फाज़त। हुंह थिअ कैदखानै, तेभै आऐ तम्हैं मुंह सेटा लै हेरा-सभाल़ा।’
"तेभै दैणअ धर्मीं मणछा तेऊ लै इहअ ज़बाब, ‘हे प्रभू, हाम्हैं कधू भाल़अ तूह भुखअ कि हाम्हैं खैऊअ? अर तूह कधू त नचिशअ कि ताखा पणैऊंअं हाम्हैं पाणीं? हाम्हैं कधू भाल़अ तूह परदेसी कि घअरै डाहअ अर कधू थिअ नांगअ कि हाम्हैं ताखा झिकल़ै बन्हैऊंऐं? तूह कधू थिअ बमार? कधू थिअ तूह कैद खानै अर कधू आऐ हाम्हैं ताह सेटा लै हेरा-सभाल़ा?’ तेभै दैणअ मुंह धर्मीं राज़ै तिन्नां लै ज़बाब, ‘हुंह खोज़ा तम्हां का सत्त कि ज़ुंण तम्हैं मुंह दी विश्वास करनै आल़ै होछ़ै का होछ़ै भाई-बैहणी मांझ़ै कहा एकी संघै बी इहअ भलअ बभार किअ, सह किअ तम्हैं मुल्है।’
ज़ुंण ताखा किज़ै मांगे, तेऊ लै दैऐ, अर ज़ुंण ताखा किज़ै ऋण मांगे, तेऊ लै निं आपणीं पिठ फरेऊई।
ठीक इहअ लोल़ी ई थारअ प्रैश्शअ बी होरी लोगा नदरी च़मकअ। ताकि तिंयां थारै भलै कामां भाल़ी परमेशरे बड़ैई करे ज़ुंण थारअ बाब स्वर्गै आसा।
ज़ै तम्हैं होरी लै दैई करे, तै दैणअ तम्हां लै बी, ज़ुंण तम्हैं दैनअ द होए सह एछणअ तम्हां लै नापी, ठिंहीं अर छ़ूप लाई थारै भोसल़ै बापस फिरी। किल्हैकि ज़ेऊ ढाल़ै तम्हैं होरी संघै बर्ताअ करा, तेऊ ढाल़ै हणअ तम्हां संघै बी बर्ताअ अर तम्हां भेटणअ होर बी खास्सअ।"
तेखअ लोगै जोहन्ना का पुछ़अ कि तै हाम्हां किज़ै लागणअ करनअ?
तेऊ दैनअ तिन्नां लै ज़बाब कि ज़हा का दूई कुर्तै आसा सह दैआ एक कुर्तअ तेऊ लै ज़हा का नांईं आथी अर ज़हा का रोटी आसा सह बी करा इहअ ई।
आपणीं ज़ैदात करा बेच़ी दान अर आप्पू लै बणाआं इहै थैल्लू ज़ुंण कधि पराणैं निं हंदै। मतलब स्वर्गै करा आप्पू लै धन कठा ज़ुंण तिधी सदा रहणअ। नां तेता नेल़ च़ोर एछदअ अर नां किल़ै लागदै। किल्हैकि ज़िधी थारअ धन आसा, तिधी रहणअ थारअ मन्न बी लागी।
"मेरअ हुकम आसा अह कि ज़ेही झ़ूरी मंऐं तम्हां लै किई, तेही झ़ूरी करा तम्हैं आप्पू मांझ़ै एकी-दुजै संघै।
एता का खास्सी झ़ूरी निं कोहिए आथी कि कोई आपणैं साथी लै ज़ान दैए।
इहअ करै रहैऊअ मंऐं इहअ कि तम्हां केही ज़िन्दगी लागा ज़िऊंणीं। तम्हां लागा खास्सी मैन्थ करनी ताकि तम्हैं रोगी अर रैनै-गरीबे मज़त करी सके। तम्हैं डाहणीं अह गल्ला आद कि मसीहा प्रभू ईशू आसा आप्पै इहअ बोलअ द, ‘मांगणै का आसा दैणअ भलअ।’"
इहअ बोली तेऊ ज़ान्हूं टेक्कै अर तिन्नां सोभी लै किई कठा प्राथणां। तेखअ लाई तिन्नैं सोभी लेरा अर पल़सीए गल़ै मल़्हैची दैई लागै तिंयां तेऊ लै मल़्हैची दैंदै। तिन्नां हुअ खासकर ऐहा गल्लो दुख ज़ुंण तेऊ बोलअ त कि तम्हां निं मेरअ मुंह भिई भाल़णअ भेटणअ, अर तिन्नैं दैनअ सह ज़हाज़ा तैणीं संघी।
पबित्र लोगा ज़ेही ज़रुरत होए तेता लै करनी तिन्नें मज़त, अर प्राहुंणच़ारी रहा करदै लागी।
म्हारअ विश्वास आसा पाक्कअ, हाम्हां का आसा थोघ कि इना गल्ला करै निं किछ़ै फरक पल़दअ, पर हाम्हैं निं ईंयां गल्ला सिधी आप्पू खुश करना लै लोल़ी किई। हाम्हां लागा दुजे बैहम अर डरे बारै बी खैल करनअ ज़ुंण इहअ सोठा कि ईंयां गल्ला आसा गलत।
हाम्हां लागा एकी दुजे मज़त करनी ज़ुंण बी हाम्हां मांझ़ै तंगी-तकलिफी दी होए अर एऊ ई साबै करै मसीहे बधाना पूरै।
च़ोरी करनै आल़अ निं ऐबै भिई च़ोरी करी पर भलै कामां करना लै लागै आपणैं हाथै खटदअ एते तैणीं लागी कि, ज़ै कहा ज़रुरत होए, तेभै लोल़ी तेऊ का किज़ै दैणा लै हुअ।
सिधै आपणैं ई बारै निं सोठणअ कि थारी कै ज़रुरत आसा। तम्हैं सोभी करनी होरीए बी गरज़ पूरी।
हे मेरै भाई-बैहणीओ, ज़ै कुंण इहअ बोला कि मुंह आसा मसीहा दी विश्वास पर होरी लै भलै काम निं करदअ, तेतो निं किछ़ै फाईदअ! इहअ विश्वास निं कधि उद्धार करी सकदअ। ज़ै कुंण विश्वासी भाई या बैहण नांगै बल़िंगै होए, अर तिन्नां का बैल़ी-क्लारी खाणां लै नांईं होए, अर तम्हां मांझ़ै कुंण इहअ बोले कि शांती दी डेओआ, अर नैत्तै-तात्तै रहा अर रज्ज़ी खाआ-पिआ! पर ज़ुंण च़िज़ा देही लै ज़रूरी आसा अर तिन्नां नांईं दैए, तै किज़ै फाईदअ हुअ?
तिहअ ई ज़ै विश्वास करनै आल़अ भलै काम नांईं करदअ ता, तै आसा तेऊओ विश्वास मूंअ द।
पर ज़ै कहा का संसारे ज़ैदात होए अर आपणैं भाई नांगअ भुखअ भाल़ी तेऊ लै झींण नांईं करे, तेऊ दी किहअ करै सका परमेशरे झ़ूरी बस्सी।
गरीबा लै दैनअ द दान हआ बिधाता लै ऋण दैणैं ज़िहअ,
अर बिधाता करा तेऊ तम्हां लै बापस।
"तम्हां मांझ़ै हणैं सदा कुंण नां कुंण गरीब ज़रूर, तैही आसा मेरअ तम्हां लै हुकम कि इना इहै लै दैऐ दिल खोल्ही दान।