Arca da aliança
A Arca da Aliança era o símbolo mais sagrado de Israel — representava a presença de Deus no meio do seu povo. Sobre ela brilhava a glória do Senhor entre os querubins.
«Ai ye teriya tɔɔmasere kankira ladan kasiya jiri rɔ. A yanyan ye kɛ nunkan ɲa fila ni tala ri, a kɔndɔ ye kɛ nunkan ɲa kelen ni tala ri, a lɔ ye kɛ nunkan ɲa kelen ni tala ri. Ai ye sanin jɛrɛwolo la a kɔndɔla ni a kɔkanna bɛɛ kan ka a jiri bɛɛ latunun. Ai ye a da kirinkirin bɛɛ kɛ sanin di. Ai ye sanin gbarangbaran naanin nadan, ka woilu bila kankira sen naanin na, sen kelen gbarangbaran kelen. Wo rɔ, gbarangbaran fila ri kɛ kankira fan kelen fɛ, a tɔ fila ri kɛ fan kelen do fɛ. Ai ye gbelekeilu rabɛn kasiya jiri rɔ, ka sanin la woilu ma ka a jiri bɛɛ latunun. Ai ye woilu don gbarangbaranilu rɔ teriya tɔɔmasere kankira fan fila bɛɛ rɔ, sa kankira ri se madoninna. Gbeleke woilu donni ye to gbarangbaranilu rɔ. Ai kana woilu labɔ. N kɛtɔ sereya mɛn sɛbɛla, i ye wo bila teriya tɔɔmasere kankira kɔndɔ.
«Ai ye julumun kafari dalatuun nadan sanin jɛrɛwolo la. A yanyan ye kɛ nunkan ɲa fila ni tala ri. A kɔndɔ ye kɛ nunkan ɲa kelen ni tala ri. Ai ri serubɛn bisiki kelen kelen nadan dalatuun na a kun fila la. Ai ri woilu ladan sanin gbasinin dɔ. Ai ye serubɛn bisiki kelen nadan kankira datuun na a kun kelen na, ka a tɔ kelen nadan dalatuun kun do wo la. Serubɛn bisiki fila ni kankira dalatuun bɛɛ ye ladan ka a kɛ fen kelen di. Serubɛn sawura fila ri ɲabɛn ɲɔɔn ma, ka ii ɲa lɔni to julumun kafari datuun na. Ii kawailu ri layɛlɛ san ma, ka birin kankira datuun na kun na. N kɛtɔ kaba walan fila mɛn dila ile ma, i ri woilu bila teriya tɔɔmasere kankira kɔndɔ ka a dalatuun ii ma.
N kɛtɔ n jɛrɛ yirakala i la teriya tɔɔmasere kankira datuun na sanma ye, serubɛn bisiki fila tɛma. N ye a fɛ Isirayɛlikailu ye taama ɲa mɛn ma, n di wo sariyailu bɛɛ di i ma ye le.»
Besalɛli ka teriya tɔɔmasere kankira ladan kasiya jiri rɔ. A yanyan kɛra nunkan ɲa fila ni tala ri. A bonya kɛra nunkan ɲa kelen ni tala ri. A lɔ kɛra nunkan ɲa kelen ni tala ri.
Allabatala ka a fɔ Musa yɛ ko: «San karo fɔlɔ tele fɔlɔ lon, i ye n daa makɛ faaninbon lɔ, n daa makɛ faaninbon kɔnin. I ye teriya tɔɔmasere kankira bila a kɔndɔ bon tatɛɛfaanin kɔfɛ.
Ii ka kaba walan fila bila teriya tɔɔmasere kankira kɔndɔ, ka kankira gbelekeilu don a koyinailu rɔ, ka a julumun kafari dalatuun la a kan. Ii ka teriya tɔɔmasere kankira wo ladon faaninbon kɔndɔ, ka bon tatɛɛfaanin sidi ka kankira ɲamadoon. Ii ka wo kɛ ikomin Allabatala tun ka a fɔ Musa yɛ ɲa mɛn ma.
Nba, Isirayɛlikailu bɔra ii daa makɛ diya rɔ ye ko ii watɔ Juridɛn Ba tɛɛla. Alla la sarakalaselailu tɛrɛ ye ii ɲɛfɛ, teriya tɔɔmasere kankira tɛrɛ ye woilu bolo. (Sumanka waati le tɛrɛ; wo waati la, Juridɛn Ba ri fa kojuuya fɔɔ ka bɔn.) Awa, teriya tɔɔmasere kankira tɛrɛ ye Alla la sarakalasela mɛnilu bolo, woilu sera ba ma ka ii sen najii ji rɔ tuma mɛn na, ba ji mɛn tɛrɛ ye woyenna ka bɔ ba san dɔ, wo ka a lɔ i kɔrɔ. Ji layɛlɛra i ɲɔɔn kan Adama so da fɛ, mɛn ye Saratani so tɔrɔfɛ. Yɔrɔ wo ka jan tɛrɛ Isirayɛlikailu la. Ji layɛlɛra i ɲɔɔn kan ye ka kɛ ikomin dandan. Ji ma se taminna ye ka woyen ka wa Araba gbɛkannan dɔ, mɔɔilu ye a fɔla mɛn ma ko Dalaba Kɔɔjilama. A kɛra ten de, Isirayɛlikailu bɛɛ sera ba tɛɛla Jeriko so ɲɛtelenma rɔ. Nba sarakalaselailu, mɛn madonni tɛrɛ Allabatala la teriya tɔɔmasere kankira, woilu ka ii lɔ duu jaran kan Juridɛn Ba tɛma. Isirayɛlikailu bɛɛ taminda ba tɛma ye duu jaran kan haan jamana mɔɔ bɛɛ sera ye.
Wo rɔ, Alla la sarakalaselailu bɔra Juridɛn Ba rɔ teriya tɔɔmasere kankira ri. Ii senilu sera duukolo jani ma tuma mɛn na, Juridɛn Ba ji ka a kɔsɛ a nɔ rɔ i kɔrɔ, ka woyen kojuuya ka yɔrɔ bɛɛ fa ikomin a tɛrɛ ye kɛla ɲa mɛn ma fɔlɔ.
Jerikokailu tun ka so da tuun ka a sɔɔ kosɛbɛ Isirayɛlikailu la ko kosɔn. Mɔɔ tun tɛ donna, mɔɔ tun tɛ bɔla. Allabatala ka a fɔ Josuwe yɛ ko: «A ragbɛ, n ye Jeriko so labilala i ma, a ni a mansa ni a la tɛsidiilu bɛɛ. Ile ni i la kɛlɛkɛjama ye ai taama ka Jeriko so laminin siɲa kelen lon lon. Ai ye wo kɛ tele wɔɔrɔ kɔrɔ. Alla la sarakalasela wɔrɔnwula ri bila teriya tɔɔmasere kankira ɲɛfɛ. Saaji kere ye kɛ woilu kelen kelenna bɛɛ bolo, kere mɛnilu ye fɛla ka a kan nabɔ ikomin buru. Tele wɔrɔnwulana, ai ye ai taama ka so laminin siɲa wɔrɔnwula. Alla la sarakalaselailu ye ii taama ai ɲɛ ka to kereilu fɛla.
«Jama wa ban so lamininna siɲa wɔrɔnwula, Alla la sarakalaselailu ri kere fɛ kan ba labɔ. Ai wa wo mɛn waati mɛn na, jama bɛɛ ye kule ba kɛ. Jeriko so laminin jin di be wo rɔ. Jama bɛɛ ri ii latelen ka don so kɔndɔ.»
Nun dencɛ Josuwe ka Alla la sarakalaselailu makili ka a fɔ ii yɛ ko: «Ai ye Allabatala la teriya tɔɔmasere kankira ta. Alla la sarakalasela wɔrɔnwula ye bila wo ɲɛ, saaji kere ye kɛ woilu kelen kelenna bɛɛ bolo.» A ka a fɔ Isirayɛlikailu yɛ ko: «Ai ye wa sisɛn! Ai ye ai taama ka so laminin. Tɛsidi doilu ye bila Allabatala la teriya tɔɔmasere kankira ɲɛfɛ. Ii la kɛlɛkɛfenilu ye kɛ ii bolo.»
Nba, Alla la sarakalaselailu ka kereilu fɛ. Jama ka kere fɛ kan mɛn tuma mɛn na, ii ka kule kan ba labɔ. Jeriko so laminin jin bɛɛ bera. Isirayɛlikailu ka ii bori ka ii telen ka don so kɔndɔ. Ii ka so bɛɛ mira.