1 Allabatala ka a fɔ Musa yɛ ko: 2 «San karo fɔlɔ tele fɔlɔ lon, i ye n daa makɛ faaninbon lɔ, n daa makɛ faaninbon kɔnin. 3 I ye teriya tɔɔmasere kankira bila a kɔndɔ bon tatɛɛfaanin kɔfɛ. 4 I ye tabali ladon faaninbon kɔndɔ ka buruilu bila a kan, a ni tabali muranilu bɛɛ. Wo kɔ rɔ, i ye fitinasiifen nadon faaninbon kɔndɔ ka fitinailu sii sii a kan. 5 I ye wusulan janin sanin saraka bɔ diya sii teriya tɔɔmasere kankira ɲɛfɛ, ka faanin dun faaninbon donda la.

6 «Saraka ri janin ka kɛ buuri ri saraka bɔ diya mɛn kan, i ye wo sii Alla daa makɛ faaninbon donda la, Alla Kunbɛn Faaninbon kɔnin. 7 I ye yagbawara sii Alla kunbɛn faaninbon ni saraka bɔ diya tɛma ka ji kɛ a rɔ. 8 I ye laminin faanin dun lukɔndɔla laminin dɔ, ka donda faanin dun lu da la.

9 «I ye suwandili tulu ta ka do mun n daa makɛ faaninbon ma, a ni a kɔndɔfenilu bɛɛ. Wo rɔ, i ri a ni a muran bɛɛ bila a dan na ka ii kɛ fen sɛnimanilu ri, mɛn ye n ta ri. 10 Saraka di janin ka kɛ buuri ri saraka bɔ diya mɛn kan, i ye suwandili tulu do mun wo fanan kan, a ni a muran bɛɛ. Wo rɔ, i ri saraka bɔ diya bila a dan na ka a kɛ fen sɛniman ba ri, mɛn ye n ta ri. 11 I ye suwandili tulu do mun yagbawara fanan ma, a ni a siifenju. Wo rɔ, i ri ii to a dan na ka a kɛ n ta ri.

12 «I ye Haruna ni a dencɛilu lana n kunbɛn faaninbon da la ka ii ko ji la. 13 Wo wa kɛ, i ye faanin sɛniman woilu bila Haruna kan na, ka suwandili tulu do mun a ma. Wo rɔ, i ri a bila a dan na n na sarakalasela baara kɛ kanma. 14 I ye a dencɛilu lana ka duruki kɔrɔbilailu bila ii kan na. 15 I ye suwandili tulu mun ii ma ikomin i ka do mun ii fa fɔlɔ ma ɲa mɛn ma, sa ii ri n na sarakalasela baara kɛ. I wa tulu wo mun ii ma ten, ii ni ii bɔnsɔn cɛɛilu ri kɛ Alla la sarakalaselailu ri kadawu.»

16 Allabatala ka mɛnilu fɔ Musa yɛ, Musa ka wo bɛɛ kɛ a ɲa ma. 17 San filana karo fɔlɔ, wo tele fɔlɔ lon, a ka Alla daa makɛ faaninbon lɔ. 18 Musa kɛra baara bɛɛ kuntii ri. Ii ka siifenju bila bila, ka faaninbon damira jiriilu lɔ, ka kankan gbelekeilu don ii rɔ, ka tarama lɔ. 19 Ii ka kunnabirin kɛ faaninbon kun na, ka kunnabirin filana la fɔlɔma kan. Ii ka wo kɛ ikomin Allabatala tun ka a fɔ Musa yɛ ɲa mɛn ma. 20 Ii ka kaba walan fila bila teriya tɔɔmasere kankira kɔndɔ, ka kankira gbelekeilu don a koyinailu rɔ, ka a julumun kafari dalatuun la a kan. 21 Ii ka teriya tɔɔmasere kankira wo ladon faaninbon kɔndɔ, ka bon tatɛɛfaanin sidi ka kankira ɲamadoon. Ii ka wo kɛ ikomin Allabatala tun ka a fɔ Musa yɛ ɲa mɛn ma.

22 Ii ka tabali ladon faaninbon kɔndɔ ka a sii faaninbon tele kankan bolomaran dɔ bon tatɛɛfaanin ɲɛfɛ. 23 Ii ka saraka buruilu sii tabali kan Allabatala ɲakɔrɔ, ikomin Allabatala tun ka a fɔ Musa yɛ ɲa mɛn ma. 24 Wo kɔ rɔ, ii ka fitinasiifen nadon faaninbon kɔndɔ ka a lalɔ faaninbon tele kankan bolokinin dɔ, ka a ɲabɛn tabali la. 25 Ii ka fitinailu sii fitinasiifen kan Allabatala ɲakɔrɔ ikomin Allabatala tun ka a fɔ Musa yɛ ɲa mɛn ma. 26 Ii ka sanin saraka bɔ diya ladon faaninbon kɔndɔ ka a sii tatɛɛfaanin ɲɛfɛ, 27 ka wusulan suma duman janin a kan ikomin Allabatala tun ka a fɔ Musa yɛ ɲa mɛn ma. 28 Wo kɔ rɔ, ii ka donda faanin sidi faaninbon da la. 29 Saraka di janin ka kɛ buuri ri saraka bɔ diya mɛn kan, ii ka wo sii Alla daa makɛ faaninbon da la, Alla Kunbɛn Diya Faaninbon kɔnin, ka ban ka kolofen sarakailu janin saraka bɔ diya wo kan ka ii kɛ buuri ri. Ii ka suman sarakailu fanan bɔ saraka bɔ diya wo kan. Ii ka wo kɛ ikomin Allabatala tun ka a fɔ Musa yɛ ɲa mɛn ma. 30 Ii ka yagbawara sii faaninbon ni saraka bɔ diya tɛma, ka ji kɛ a kɔndɔ koli kanma. 31 Musa ni Haruna ni a dencɛilu ka ii boloilu ni ii senilu mako ji wo rɔ. 32 Ka a ta wo lon ma, ii wa ii don faaninbon na tuma tuma, a ni ii wa kɛ ii madonna saraka bɔ diya la tuma tuma, ii ri ii ko ikomin Allabatala tun ka a fɔ Musa yɛ ɲa mɛn ma.

33 Ii ka lukɔndɔla laminin faanin dun tarama na ka faaninbon ni saraka bɔ diya laminin, ka donda faanin fanan dun lu da la. Nba, Musa banda baara bɛɛ la wo ɲa le ma.

34 Wo kɔ rɔ, duru munuɲa jiira ka birin Alla Kunbɛn Diya Faaninbon kun na, Alla daa makɛ faaninbon kɔnin. Allabatala la nɔɔrɔ ka faaninbon nafa. 35 Musa ma se donna Alla Kunbɛn Diya Faaninbon kɔndɔ, Alla daa makɛ faaninbon kɔnin, baa duru munuɲa birinni tora a kun na. Ka a la wo kan, Allabatala la nɔɔrɔ tun da a lafa. 36 Ni duru munuɲa wo tun kɔrɔtara ka bɔ faaninbon kun na tuma tuma, Isirayɛlikailu tun di sila mira ka wa. A kɛra wo ɲa le ma ii la taama bɛɛ rɔ. 37 Kɔni ni duru munuɲa tun ma kɔrɔta, ii tun tɛ bɔla ii nɔ rɔ. Ii tun di makɔnɔni kɛ fɔɔ duru munuɲa wa kɔrɔta lon mɛn kokura. 38 Allabatala la duru munuɲa tɛrɛ ye faaninbon kun na tele rɔ. Ta tɛrɛ ye mɛlɛnmɛlɛnna duru munuɲa rɔ su rɔ Isirayɛlikailu bɛɛ ɲakɔrɔ. A kɛra wo ɲa le ma ii la taama bɛɛ rɔ.