Hɔrɔya Suran 9

Tɔrɔya Looluna: Misirankailu la kolofenilu faara

1 Wo tamin kɔ rɔ, Allabatala ka a fɔ Musa yɛ ko: «I ye wa a fɔ Ferawuna yɛ ko: ‹Heburuilu Maari Allabatala ka a fɔ ko: «N na mɔɔilu bila sa ii ri wa n bato. 2 Ko ni i ka i ban ii bila ko ma ka ii to i bolo, 3 ko i la kolofen mɛnilu ye sɛnɛ rɔ, ko nde Allabatala ri i wuli woilu kanma n na sebaya la. Ko n di jankarɔ juu bila i la sooilu la, a ni i la faliilu, a ni i la ɲɔɔmɛilu, a ni i la nisiilu, a ni i la saailu ni baailu. 4 Ko kɔni nde Allabatala n di dannafarabɔ kɛ Isirayɛlika la kolofenilu ni Misirankailu la kolofenilu tɛma. Isirayɛlika la kolofen si tɛ faa.»›»

5 Nba, Allabatala ri ko wo kɛ lon mɛn, a ra ban wo latɛɛla, baa a ka a fɔ ko: «Nde Allabatala n di ko wo kɛ jamana kɔndɔ sini.» 6 Wo duu sa gbɛ, Allabatala ka a kɛ ikomin a tun ka a fɔ ɲa mɛn ma. Misirankailu la kolofenilu bɛɛ faara, kɔni foyi ma faa Isirayɛlika la kolofenilu rɔ. 7 Ferawuna ka mɔɔilu lawa ko wo lakɔrɔsi kanma. Woilu wara ko wo lakɔrɔsili diya ka na a fɔ a yɛ ko foyi ma faa Isirayɛlika la kolofenilu rɔ. Wo bɛɛ ni a ta kɔnin, Ferawuna jusu a ragbɛlɛyanin de tɛrɛ. A ma sɔn ka Isirayɛlika bila sa ii ri wa.

Tɔrɔya Wɔɔrɔna: Sumunin bɔra mɔɔilu ma

8 Wo kɛ mɛn kɛra, Allabatala ka a fɔ Musa ni Haruna yɛ ko: «Ai ye wa bolo ɲa dɔndɔ ta buurigbɛ rɔ fen janin diya. Musa ye wa buurigbɛ wo lasadi san ma Ferawuna ɲakɔrɔ. 9 Wo ri jɛnsɛn Misiran jamana fan bɛɛ rɔ ikomin gbangban, ka sumuni bɔ mɔɔilu ni kolofenilu ma. Sumuninilu ri kɛ dailu ri mɔɔilu ni kolofenilu fariilu ma Misiran jamana fan bɛɛ rɔ.»

10 Nba, Musa ni Haruna wara buurigbɛ do ta fen janin diya ka wa ii lɔ Ferawuna ɲakɔrɔ. Musa ka buurigbɛ wo lasadi san ma. Buurigbɛ wo ka sumuni bɔ mɔɔilu ni kolofenilu ma. Sumuniilu kɛra dailu ri woilu fari ma. 11 Ferawuna la senkolailu ma se nala ii lɔla Musa ɲakɔrɔ, baa sumuniilu tun da bɔ ii fari fan bɛɛ ma, ikomin Misiranka tɔilu bɛɛ. 12 Allabatala le ka a kɛ Ferawuna jusu gbɛlɛnyani tɛrɛ. Ferawuna ma sɔn Musa ni Haruna la kuma ma ikomin Allabatala tun ka a fɔ Musa yɛ ɲa mɛn ma.

Tɔrɔya Wɔrɔnwulana: Allabatala ka sancikolo lajii

13 Wo tamin kɔ rɔ, Allabatala ka a fɔ Musa yɛ ko: «I ye i wuli sɔɔma da la jonna ka wa Ferawuna tɛrɛn ye. I ye a fɔ a yɛ ko: ‹Allabatala, Heburuilu Maari Alla kɔnin, wo ka a fɔ ko: «N na mɔɔilu bila sa ii ri wa n bato. 14 Ko sisɛn, ko n di tɔrɔya lase ile ma, tɔrɔya mɛn di juuya kosɛbɛ. Ko tɔrɔya wo ri se i la ɲɛmɔɔilu ni i la mɔɔilu fanan ma. Ko n di tɔrɔya wo lase ii bɛɛ ma sa ile ri a lɔn ko n ɲɔɔn si tɛ dunuɲa ɲin dɔ. 15 Ko n tun di se ka n bolo lawuli i ni i la mɔɔilu kanma, ka jankarɔ fitinna ba la ii kan. Ko ni n tun ka a kɛ ten, sa ii ra ban latununna ka bɔ duɲa rɔ. 16 Ko kɔni n da i kɛndɛ to kosa n di n na sebaya yiraka i la. Ko ka a la wo kan, ko n da i kɛndɛ to sa n tɔɔ ri bonya dunuɲa fan bɛɛ rɔ fanan. 17 Ko kɔni jɛrɛdabaya ye i rɔ fɔlɔ, baa i bannin n na mɔɔilu bila ko ma. 18 Ko ale le wo ri. Ko ɲin tuma sini, ko n di sancikoloilu lajii. Ko sancikoloilu wo ri juuya fɔɔ ka a dan natamin. Ko wo ɲɔɔn ma jii Misiran kɛbi Misiran jamana siira. 19 Ko wo rɔ, ko i ye i la mɔɔilu jamari sisɛn ko ii ye wa ii la kolofenilu ni ii bolofenilu bɛɛ ta ka wa woilu ri yɔrɔ lakandannin do rɔ, sa sancikolo kana se ii ma. Ko mɔɔ ni kolofen mɛnilu wa to gbɛ rɔ sɛnɛ rɔ, mɛnilu ma ladon yɔrɔ lakandannin do rɔ, sancikolo di jii woilu kan ka woilu kelen kelenna bɛɛ faa.»›»

20 Nba, Ferawuna la ɲɛmɔɔ mɛnilu silanda Allabatala la kuma yɛ, woilu borimantɔ wara ii la jɔnilu ni ii la kolofenilu ladon yɔrɔ lakandannin doilu rɔ. 21 Mɛnilu kɔnin ma Allabatala la kuma jate, woilu ka ii la jɔnilu ni ii la kolofenilu to sɛnɛ rɔ ye.

22 Allabatala ka a fɔ Musa yɛ ko: «I ye i bolo kɔrɔta san ma sa sancikolo a ri jii Misiran jamana bɛɛ kan. A ri jii mɔɔilu ni kolofenilu ni sɛnɛfenilu bɛɛ kan Misiran fan bɛɛ rɔ.» 23 Awa, Musa ka a la gbeleke kɔrɔta san ma tuma mɛn na, Allabatala ka bandakan nabɔ ka sancikoloilu lajii, ka ta lajii fɔɔ duu ma. Allabatala ka sancikoloilu lajii Misiran jamana kan ikomin sanci ba. 24 Sancikoloilu tɛrɛ ye jiila. Ta tɛrɛ ye jiila yɔrɔ bɛɛ. Kɛbi Misiran jamana siira, sancikoloilu wo ɲɔɔn tun ma jii fɔlɔ, baa a juuyara kosɛbɛ. 25 Sancikoloilu ka mɔɔilu ni kolofenilu halaki Misiran jamana fan bɛɛ rɔ, mɔɔ ni kolofen mɛnilu tora gbɛ ma sɛnɛilu rɔ kɔnin. A ka sɛnɛfenilu bɛɛ tiɲan fanan, ka jiriilu bɛɛ kadi kadi. 26 Wo kɛra fan bɛɛ rɔ fo Kosɛni mara kelen, Isirayɛlika siini yɔrɔ mɛn kɔnin. Sancikoloilu ma se ye le.

27 Ferawuna ka Musa ni Haruna kili ka a fɔ ii yɛ ko: «N da kojuu kɛ siɲa ɲin dɔ. Jo ye Allabatala de bolo. Jo tɛ nde ni n na mɔɔilu le bolo. 28 Ai ye Allabatala madiya, baa Alla la bandakan ni a la sancikoloilu ii ra an bɔ. N di ai bila. N tɛ ai lalɔla butun.»

29 Musa ka a fɔ a yɛ ko: «N wa bɔ so kɔndɔ tuma mɛn na, n di n boloilu kɔrɔta Allabatala yɛ. Bandakan ni sancikoloilu ri i lɔ, sa i ri a lɔn ko dunuɲa ye Allabatala ta le ri, 30 kɔni n ka a lɔn ko ile ni i la ɲɛmɔɔilu ma silan Allabatala Alla yɛ fɔlɔ fewu!»

31 Nba, gbaasa tun da fɛrɛn. Mɛn tɔɔ ko sɔɲɔ, wo tun da a kisɛ. Sancikoloilu ka wo fila bɛɛ tiɲan, 32 kɔni sɛnɛfen mɛn tɔɔ ko binbiriba, wo su fila ma tiɲan sancikolo bolo baa woilu tɛ fɛrɛnna jonna.

33 Nba, Musa bɔra Ferawuna wara ka wa so kɔkan. A ka a bolo lawuli Allabatala yɛ ka a madiya. Bandakan ni sancikolo tɛɛra. Sanci tɛɛra. 34 Ferawuna ka a yen tuma mɛn na ko sanci ni sancikolo ni bandakan a ra lalɔ, a ka kojuu kɛ ikɔ tuunni, baa a ni a la ɲɛmɔɔilu ka ii jusu gbɛlɛnya. 35 Ferawuna jusu a ragbɛlɛyanin de tɛrɛ. A ma sɔn ka Isirayɛlikailu bila sa ii ri wa. Wo kɛra ikomin Allabatala a tun ka a fɔ ka fara Musa la.