Hɔrɔya Suran 27

Sarakabɔdiya ladan ko

1 «Ai ye saraka bɔ diya kelen nadan kasiya jiri rɔ, ka a lɔ kɛ nunkan ɲa sawa ri. A fan naanin bɛɛ ye kanya, ka a bonya ni a yanyan bɛɛ kɛ nunkan ɲa loolu ri. 2 Ai ye saraka bɔ diya tonkon kelen kelenna bɛɛ ladan ka ii kɛ kolofen kere la munuɲa ri. Ai ye sulanɛɛ la saraka bɔ diya yɔrɔ bɛɛ kan, ka a jiri bɛɛ latunun. 3 Ai ye buurigbɛ kɛ muranilu ladan, a ni buurigbɛ ta fenilu ni jeli kɛ bafatailu ni sobo sɔɔlanilu ni takisɛ kɛ fenilu. Ai ye saraka bɔ diya muran woilu bɛɛ ladan sulanɛɛ la. 4 Ai ye sulanɛɛ sansan nadan, ka sulanɛɛ koyina kelen kelen nadan a tonkon naanin na. 5 Ai ye sulanɛɛ sansan wo la dagbolo kɔrɔ saraka bɔ diya kɔndɔ, sa a ri bɔ saraka bɔ diya ju kɔrɔ kosa a ye se a lɔ tɛmala rɔ. 6 Ai ye gbelekeilu rabɛn kasiya jiri rɔ saraka bɔ diya madonnin kanma, ka sulanɛɛ la woilu yɔrɔ bɛɛ kan. 7 Ai wa kɛ saraka bɔ diya madoninna, ai ri gbeleke woilu don sulanɛɛ gbarangbaranilu rɔ saraka bɔ diya fan fila bɛɛ rɔ. 8 Ai ye saraka bɔ diya lɔ jiri fɛrɛnilu la ka a kɔndɔ rakolon to. Ii ye a lɔ ikomin n ka a yiraka i la ɲa mɛn ma ka i to koyinkɛ kan yan.»

Alla daa makɛ faaninbon lukɔndɔla laminin ɲa

9 «Awa, ai ye n daa makɛ faaninbon naminin makisali ɲuma le la ka lukɔndɔla labɔ. Faaninbon tele kankan bolokinin fan fɛ, faanin yanyan ri kɛ nunkan ɲa kɛmɛ (100) ri. 10 Faanin woilu ri damira tarama muwan (20) bolo, mɛnilu siini sulanɛɛ siifenju muwan (20) kan. Wodigbɛ sɔɔlanilu ni faanindun wodigbɛ koyinailu ye kɛ taramailu ma. 11 Faaninbon tele kankan bolomaran fan fanan ye rabɛn wo ɲa kelen ma. A laminin faaninilu yanyan ye kɛ nunkan ɲa kɛmɛ (100) ri. Faanin woilu ri damira tarama muwan (20) bolo, mɛnilu kelen kelenna bɛɛ siini a sulanɛɛ siifenju kan. Wodigbɛ sɔɔlanilu ni faanindun wodigbɛ koyinailu ye kɛ taramailu ma. 12 Faaninbon telebe fan fɛ, faanin yanyan ye kɛ nunkan ɲa biloolu (50) ri. Faanin woilu ri damira tarama tan bolo, mɛnilu kelen kelenna bɛɛ siini a siifenju kan. 13 Faaninbon telebɔ fan fɛ, faanin yanyan ye kɛ nunkan ɲa biloolu (50) ri. 14,15 Lukɔndɔla donda ri kɛ fan wo fɛ. Donda fan fila bɛɛ fɛ, faaninilu yanyan ri kɛ nunkan ɲa tan ni loolu ri. Faanin woilu ri damira tarama sawa sawa bolo, mɛnilu kelen kelenna bɛɛ siini a siifenju kan. 16 Faanin mɛn di bila lu donda jɛrɛ la, wo yanyan ye kɛ nunkan ɲa muwan (20) di. Mɛn kusan faanin sɔɔ la, wo ye faanin wo rabɛn makisali ɲuma la, a ni kari buleman ni kari wulenman ɲalagbɛ ni kari wulenman kadikadi. Faanin wo ri damira tarama naanin bolo, mɛnilu kelen kelenna bɛɛ siini a siifenju kan. 17 Wodigbɛ sɔɔlanilu ni faanindun wodigbɛ koyinailu ye kɛ lukɔndɔla laminin taramailu bɛɛ ma. Woilu kelen kelenna bɛɛ ye sii a sulanɛɛ siifenju kan. 18 Lukɔndɔla yanyan ye kɛ nunkan ɲa kɛmɛ (100) ri. A bonya ye kɛ nunkan ɲa biloolu (50) ri. A laminin faaninilu lɔ ye kɛ nunkan ɲa loolu ri. Woilu ye ladan makisali ɲuma la. Tarama siifenju ye dan sulanɛɛ la. 19 Faaninbon muranilu bɛɛ ye ladan sulanɛɛ la. Faaninbon ni a laminin faaninilu ri sidi bɔlɔ mɛnilu la duu ma, woilu fanan ye kɛ sulanɛɛ ri.»

Tulu mɛn di kɛ fitinailu kɔndɔ

20 «I ye Isirayɛlikailu jamari ko ii ye na olibiye tulu ɲuma ɲuma ri, sa fitinailu ri se lamɛlɛnna waati bɛɛ. 21 Haruna ni a dencɛilu ye fitinasiifen sii n daa makɛ faaninbon kɔndɔ. Ii ri a sii tatɛɛfaanin ɲɛfɛ, teriya tɔɔmasere kankira siini mɛn kɔfɛ kɔnin. Fitinailu ye mɛlɛn n ɲakɔrɔ ye lon lon ka bɔ wura fɛ fɔɔ sɔɔma da la. Sariya le wo ri, Isirayɛlikailu ka kan ka mɛn nataama haan ka wa kadawu.»