Hɔrɔya Suran 29

Alla la sarakalaselailu lasii ko

1 Allabatala ka a fɔ Musa yɛ ko: «I ka kan ka Haruna ni a dencɛilu latɔ ii dan na ɲa mɛn ma n na kosa ii ye sarakalasela baara kɛ. I ye tora bulan kelen mira, a ni saaji fila, fɛɛ tɛ mɛnilu la. 2 I ye farinin muun ɲuma ta, ka buru labɛn a la a ni katɔ ni dɛba, lɛbɛn ti mɛn na, ka tulu mun a ma. 3 I ye woilu bɛɛ bila see kelen kɔndɔ. I wa na tora ni saaji fila ri ii kannatɛɛ diya, i ye na see wo fanan di.

4 «I ye Haruna ni a dencɛilu lana n na faaninbon da la, ka ii ko ji la. 5 Wo wa kɛ, i ye duruki kɔrɔbila ni durukiba bila Haruna kan na, a ni kɔkanbila durukini ni sisirɔ bɔrɔni, ka ban ka kɔkanbila durukini sidi a ma tɛsidilan na, jesedanna kusan ka mɛn nadan. 6 I ye bitiran kɛ Haruna kun na, ka kuntiiya tɔɔmasere sɛniman sidi bitiran kan. 7 I ye suwandili tulu mun a kun na ka a bila a dan na n na baara kanma. 8 Wo wa kɛ, i ri Haruna dencɛilu lana ka duruki kɔrɔbila bila ii kan na. 9 I ye ii tɛsidi tɛsidilanilu la, ka ban ka bitiran kɛ ii kun na. N na sarakalasela baara ri kɛ Haruna ni a bɔnsɔnilu ta ri kadawu. Sariya rabilabali le wo ri. Wo wa kɛ, i ri Haruna ni a dencɛilu latɔ ii dan na baara wo kanma.

10 «I ye tora lana n na faaninbon da la. Haruna ni a dencɛilu ye ii boloilu la a kun kan. 11 I ye tora kannatɛɛ nde Allabatala ɲakɔrɔ n na faaninbon da la ye. 12 I ye i bolo koyini su tora jeli rɔ ka a mun saraka bɔ diya tonkon kereilu la, ka a jeli tɔilu bɛɛ labɔn saraka bɔ diya ju fɛ. 13 Wo wa kɛ, kɛn mɛn ye tora kɔnɔ rɔ, i ye wo bɛɛ ta, a ni farafara mɛn ye jusu ma ni kɔrɔkudu fila ni woilu kɛnilu bɛɛ. I ye wo bɛɛ la saraka bɔ diya kan ka ii janin ka kɛ buuri ri. 14 Kɔni i ye tora sobo ni a gbolo ni a noo bɛɛ janin ta rɔ jama daa makɛ diya kɔfɛ. Wo le ri kɛ saraka ri, mɛn di n sarakalaselailu la julumunilu labe.

15 «I ye saaji fila wo kelen mira. Haruna ni a dencɛilu ye ii bolo la wo kun kan. 16 I ye saaji kannatɛɛ ka a jeli ta ka a sadisadi saraka bɔ diya fan bɛɛ kan. 17 I ye saaji boso ka a tɛɛtɛɛ. I ye a kɔnɔrɔfenilu ni a senilu rako, ka woilu bila sobo kudukudu ni kunkolo kan. 18 I ye saaji bu bɛɛ janin saraka bɔ diya kan saraka janinta la. Saraka janinta le a ri, mɛn di bɔ nde Allabatala yɛ ka a janin ta la. Wo suma duman n yɛ.

19 «Wo wa kɛ, i ye saaji filana ta. Haruna ni a dencɛilu ye ii boloilu la a kun na. 20 I ye a kannatɛɛ ka a jeli do ta ka wo mun Haruna ni a dencɛilu bolokinin tolo nun na, ka do fanan mun ii bolokinin bolo kunkuruba kan, a ni ii bolokinin sen kunkuruba. I ye jeli tɔ sadisadi saraka bɔ diya fan bɛɛ kan. 21 Jeli mɛn sadisadini saraka bɔ diya kan, i ye wo do ta, ka suwandili tulu do fanan ta ka woilu sadisadi Haruna ni a dencɛilu kan, a ni ii la faaninilu bɛɛ kan. Wo le rɔ, Haruna ni a dencɛilu ni ii la faaninilu ri bila a dan na ka kɛ fen sɛniman di.

22 «Saaji filana wo ye saraka ri, mɛn ye bɔla ka Haruna ni a dencɛilu bila ii dan na n na baara kanma. Wo rɔ, i ye saaji kɛn ta, a ni a kɔ ni farafara mɛn ye jusu ma ni a kɔrɔkudu fila bɛɛ ni kɛn mɛn ye woilu lamininna ni kɛn mɛn ye kɔnɔrɔ nooilu laminin bɛɛ rɔ. I ye bolokinin ma woro fanan ta. 23 I ye buru fununbali kelen ni buru kelen mɛn dabɛnni tulu la ni burunin kelen ta see kɔndɔ, mɛn bilanin nde Allabatala ɲakɔrɔ. 24 I ye fen woilu bɛɛ don Haruna ni a dencɛilu bolo, ko ii ye woilu kɔrɔta nde Allabatala ɲakɔrɔ ka a yiraka ko ii ye a bɛɛ dila n ma. 25 Wo wa kɛ, i ye fen woilu bɔ ii bolo ka woilu bila saraka bɔ diya kan ka ii janin. Sarakailu le ii ri, mɛnilu ri bɔ nde Allabatala yɛ ka janin ta la. Wo suma duman n yɛ.

26 «I ye Haruna lasii saaji sisi kɔrɔta Allabatala ɲakɔrɔ, ka a yiraka ko i ye a bɛɛ dila nde Allabatala ma. Sisi wo ye ile niiyɔrɔ le ri. 27 N sarakalasela lasii saaji sisi ni a woro mɛnilu kɔrɔtara n ɲakɔrɔ, ko woilu bilanin a dan na ka kɛ n ta ri. Ko Haruna ni a dencɛilu niiyɔrɔ le woilu ri. 28 Isirayɛlikailu wa jususuma saraka bɔ tuma tuma, ii ye niimafen wo sisi ni a woro di nde Allabatala ma. Woilu ri kɛ Haruna ni a bɔnsɔnilu niiyɔrɔ ri.

29 «Haruna la faanin sɛniman di kɛ a bɔnsɔnilu ta ri a sani kɔ rɔ. Suwandili tulu muntɔ a nɔrɔbila kan lon mɛn na ka wo lato a dan na n na baara kɛ kanma, a nɔrɔbila wo ri Haruna la faanin wo bila a kan na. 30 Haruna dencɛ mɛn wa bila a nɔ rɔ n na sarakalasela baara la, wo wa don n na faaninbon na ka n na sarakalasela baara damira yɔrɔ sɛniman kɔndɔ, a ri faanin woilu bila a kan na tele wɔrɔnwula kɔrɔ.

31 «Nba, saaji mɛn kɛra saraka ri ka Haruna ni a dencɛilu sii n na sarakalasela baara la, i ye wo sobo ta ka a tibi yɔrɔ sɛniman do rɔ. 32 Haruna ni a dencɛilu ri sobo wo dɔɔn, a ni buru mɛnilu ye see kɔndɔ. Ii ye woilu dɔɔn n na faaninbon da la. 33 Saraka woilu bɔra ka ii solonna ka ii latɔ ii dan na ii lasii tuma n na sarakalasela baara la. Ii ye woilu dɔɔn. Kɔni mɔɔ gbɛrɛ si kana fen woilu dɔɔn, baa fen woilu sɛniman. 34 Ni sobo wo tɔ siira haan sɔɔma da la, wala buru tɔ, wo ye janin ka kɛ buuri ri. A kana a dɔɔn, baa a sɛniman.

35 «N ye mɛnilu fɔla i yɛ, i ye woilu bɛɛ kɛ Haruna ni a dencɛilu yɛ, ka ii latɔ ii dan na n na sarakalasela baara rɔ. I ye wo bɛɛ kɛ lon lon tele wɔrɔnwula kɔrɔ. 36 I ye tora kelen bɔ lon lon ka kɛ julumun saraka ri. I ri saraka bɔ diya solonna wo ɲa. Wo wa kɛ, i ri tulu mun a kan ka a bila a dan na ka a kɛ n ta ri. 37 I ye wo bɛɛ kɛ ten lon lon tele wɔrɔnwula kɔrɔ. Wo bolo ma, saraka bɔ diya wo ri kɛ fen sɛniman ba ri. Fen fen wa a maa a la, wo fanan di kɛ fen sɛniman di.»

Saraka mɛnilu ka kan ka bɔ lon lon

38 «Ai ye san kelen saa bulan fila bɔ saraka bɔ diya kan lon lon kadawu. 39 Ai ye saa bulan kelen bɔ sɔɔma, ka kelen bɔ wura fɛ. 40 Ai ye farinin ɲuma kilo fila ni olibiye susunin tulu litiri kelen ta ka woilu ɲaamin i ɲɔɔn na, ka wo bɔ saa bulan fɛ sɔɔma. Ai ye rɛsɛnji litiri kelen nabɔn, ka wo fanan kɛ saraka ri. 41 Ai ye saa bulan filana bɔ wura fɛ, ka farinin ni olibiye tulu ni rɛsɛnji la a kan ikomin sɔɔma ta. Saraka janinta le a ri, mɛn di bɔ nde Allabatala yɛ ka janin ta la ka kɛ buuri ri. Wo suma duman n yɛ. 42 Ai ni ai bɔnsɔnilu ye saraka janinta woilu bɔ tuma bɛɛ. Ai ye ii bɔ nde Allabatala ɲakɔrɔ kunbɛn faaninbon da la. N kɛtɔ n na jama kunbɛnna ye le ka kuma i yɛ. 43 N di Isirayɛlikailu kunbɛn ye le. N nɔɔrɔ ri yɔrɔ wo bila a dan na ka a kɛ n ta ri. 44 N di n na faaninbon ni saraka bɔ diya bila a dan na ka ii kɛ n ta ri. N di Haruna ni a dencɛilu fanan bila ii dan na n na baara kanma, sa ii ri n na sarakalasela baara kɛ. 45 N di n makɛ Isirayɛlikailu tɛma ka kɛ ii Maari ri. 46 Ii ri a lɔn ko nde le ii Maari Allabatala ri, mɛn ka ii labɔ Misiran jamana rɔ sa n di n makɛ ii tɛma. N ye ii Maari Allabatala le ri.»