Wusulanjanin saraka bɔ diya ko
1 «Ai ye wusulan janin saraka bɔ diya ladan kasiya jiri la. 2 Wo fan naanin bɛɛ ye kanya, ka a yanyan ni a bonya bɛɛ kɛ nunkan ɲa kelen kelen di. A lɔ ye kɛ nunkan ɲa fila ri. Kere munuɲa ye kɛ a tonkon naanin bɛɛ la, kɔni kereilu ni saraka bɔ diya bɛɛ ye kɛ fen kelen de ri. 3 Ai ye sanin jɛrɛwolo la a sanfɛ a ni a kɛrɛfɛ naanin yɔrɔ bɛɛ a ni a kereilu bɛɛ kan, ka da kirinkirin bɛɛ kɛ sanin di a fan naanin bɛɛ la. 4 Ai ye sanin gbarangbaran fila ladan da kirinkirin wo kɔrɔ saraka bɔ diya fan fila fɛ, fan kelen gbarangbaran fila. Saraka bɔ diya ta gbelekeilu ri don gbarangbaran woilu rɔ, sa saraka bɔ diya ri se madoninna. 5 Ai ye gbelekeilu rabɛn kasiya jiri la ka sanin la ii yɔrɔ bɛɛ kan. 6 Ai ye saraka bɔ diya wo sii tatɛɛfaanin ɲɛfɛ. Teriya tɔɔmasere kankira ni a julumun kafari dalatuun ye tatɛɛfaanin wo kɔfɛ. Tuma tuma n kɛtɔ i kunbɛnna yɔrɔ wo le rɔ.
7 «Haruna wa fitinailu rabɛn sɔɔma sɔɔma, a ye wusulan suma duman janin saraka bɔ diya wo kan. 8 A wa fitinnailu lamɛlɛn wura wura, a ye wusulan suma duman janin ikɔ tuunnin. Wusulan ye to janinna wo ɲa ma nde Allabatala ɲakɔrɔ tuma bɛɛ. Ai bɔnsɔnilu bɛɛ ye a kɛ ten haan ka wa kadawu. 9 Ai kana wusulan su gbɛrɛ janin wusulanjanin saraka bɔ diya kan. Ai kana sarakailu bɔ a kan, mɛnilu ri janin ka kɛ buuri ri. Ai kana suman kɛ saraka ri ka a bɔ a kan. Ai kana rɛsɛnji kɛ saraka ri ka wo labɔn a kan. 10 San san, kolofen mɛn bɔnin ka a kɛ julumun saraka ri ka a solonna, Haruna ye wo jeli ta ka a kɛ saraka bɔ diya kereilu kan. Haruna ri saraka bɔ diya sɛninya ten siɲa kelen san san. Ai bɔnsɔnilu ye a kɛ ten haan ka wa kadawu. Sarakabɔdiya wo bilanin a dan na ka kɛ nde Allabatala ta ri. A sɛniman ba le.»
Jama ye kunkali wodi mɛn bɔla
11 Allabatala ka a fɔ Musa yɛ ikɔ tuunni ko: 12 «I wa tɔɔ sɛbɛli kɛ ka Isirayɛlikailu jate lɔn, ii kelen kelenna bɛɛ ye ii jɛrɛ nii kunka wodi bɔ ka a di nde Allabatala ma, sa tɔrɔya kana ii sɔrɔn tɔɔ sɛbɛli waati la. 13 Mɛnilu tɔɔ wa sɛbɛ, ii kelen kelenna bɛɛ ye wodigbɛ karamun wɔɔrɔ bɔ. Karamun wɔɔrɔ ye Alla batobonba sɛkɛli30.13 Sɛkɛli ye sumannin fen de ri mɛn ɲa kelen ye bɛnna karamun tan ni fila ma tala le. Wo ri kɛ niilifen di ka a di nde Allabatala ma. Yɔrɔ sɛniman jateli bɛnnin karamun tan ni fila le ma. 14 Mɔɔ mɛnilu sɔrɔn da san muwan (20) bɔ, i ri woilu ni woilu kɔrɔilu bɛɛ tɔɔ sɛbɛ. Woilu bɛɛ ye niilifen wo di nde Allabatala ma. 15 Ii wa karamun wɔɔrɔ wo di nde Allabatala ma ka kɛ solonnali fen ii yɛ, nanfulutii kana foyi la a ta kan, bolokolon kana foyi bɔ a ta la. 16 I wa solonnali wodi wo sɔrɔn Isirayɛlikailu la, i ri a kɛ n na faaninbon dabɛnfen di. Wodi wo ri kɛ hankilibilafen di ka nde Allabatala hankili bila a la ko Isirayɛlikailu nii da kunka.»
Koli yagbawara la ko
17 Allabatala ka a fɔ Musa yɛ ko: 18 «Ai ye sulanɛɛ yagbawara ladan koli kanma, ka a sulanɛɛ siifenju fanan nadan. Ai ye a sii kunbɛn faaninbon ni saraka bɔ diya tɛma, ka ji kɛ a kɔndɔ. 19 Haruna ni a dencɛilu ye ii boloilu ni ii senilu mako ji wo la. 20,21 Ii wa kɛ donna kunbɛn faaninbon na tuma mɛn na, ii ye ii boloilu ni ii senilu ko ji woilu la sa ii ti nala faala. Ka a la wo kan, ii wa kɛ ii madonna saraka bɔ diya la tuma mɛn na ka saraka janin ta la Allabatala yɛ, ii ye ii boloilu ni ii senilu mako sa ii ti nala faala. Jamarili le wo ri Haruna ni a bɔnsɔnilu bɛɛ ma haan ka wa kadawu.»
Suwandili tulu ladan ɲa
22 Allabatala ka a fɔ Musa yɛ ikɔ tuunni ko: 23,24 «I ye sumadiyalanilu bɛɛ rɔ ɲuma doilu ta. I ye muri latikɔlɔn jilama kilo wɔɔrɔ ta, a ni kanɛli sumaduman kilo sawa, ni sinamɔnɛ sumaduman kilo sawa, ni kase sumaduman kilo wɔɔrɔ. Woilu bɛɛ ka kan ka bɛn yɔrɔ sɛniman na jateli ma. I ye olibiye tulu litiri naanin fanan ta. 25 Latikɔlɔn nadanna do ye woilu bɛɛ basan ka a kɛ suwandili tulu sɛniman di, mɛn suma duman. Tulu wo ri kɛ fen sɛniman de ri, mɛn ye kɛla fen wala mɔɔ kan ka wo bila a dan na. 26 I ye tulu wo ta ka dɔɔnin mun kunbɛn faaninbon ni teriya tɔɔmasere kankira kan, 27 a ni tabali ni a muran, a ni fitinasiifen ni a muran bɛɛ, a ni wusulan janin saraka bɔ diya, 28 a ni saraka janinta bɔ diya ni a muran bɛɛ, a ni yagbawara ni a siifenju fanan. 29 I ri fen woilu bila a dan na ten, ka ii kɛ n ta ri fasayi. Ii ri kɛ fen sɛnimanilu ri. Ni fen fen ka a maa woilu la, wo fanan di kɛ fen sɛniman di.
30 «I ye tulu dɔɔnin mun Haruna ni a dencɛilu kan ka ii bila a dan na n na baara kanma. Ii ri n na sarakalasela baara kɛ. 31 I ye a fɔ Isirayɛlikailu yɛ ko n na suwandili tulu le ɲin di. Ko a sɛniman haan ka wa kadawu. 32 Mɔɔ si kana a ta ka a fari mamun a la. Mɔɔ si kana fenilu ladan, mɛnilu ri kɛ a su ri. A sɛniman de. Ai ye a jate fen sɛniman di. 33 Mɔɔ mɔɔ wa a ɲɔɔn nadan, wo tii ri gbɛn a la jama tɛma. Mɔɔ mɔɔ wa tulu wo kɛ mɔɔ gbɛrɛ kan, mɛn tɛ n sarakalasela ri, wo tii ri gbɛn a la jama tɛma.»
Wusulan nadan ɲa
34 Allabatala ka a fɔ Musa yɛ ko: «Sumadiyalan mɛnilu tɔɔ ko sitaki ni ɔnkile ni kalibanun, a ni wusulan sumaduman jɛrɛwolo, i ye wo ta ka a bɛɛ rakanya. 35 Sumaduman nadanna do ye woilu bɛɛ ni kɔɔ basan ka a kɛ wusulan jɛrɛwolo ri, mɛn suma duman. Ai ye a jate fen sɛniman di, mɛn bilanin a dan na n na baara kanma. 36 I ye wusulan wo do ta ka a rasisi ka a kɛ muun di, ka a bila teriya tɔɔmasere kankira ɲɛfɛ kunbɛn faaninbon kɔndɔ. N ye i kunbɛnna ye le. Ai ye wusulan wo jate fen sɛniman ba ri. 37 Ai kana sumadiyalan woilu ta ka wusulan do ladan ai jɛrɛ yɛ, mɛn ni ɲin bɛɛ ka kan. Ai ye a jate fen sɛniman ba ri, mɛn ye Allabatala ta ri. 38 Mɔɔ mɔɔ wa wusulan wo ɲɔɔn nadan sa a ri sɛwa wo sumaduman dɔ, wo tii ri gbɛn a la jama tɛma.»
/images/a/WG5FS9VaSWVnVmV3VI8yP)
/images/a/Tcg2NiV7ce24OT6kCIQGR)