Hɔrɔya Suran 13

Den fɔlɔilu ye Alla ta le ri

1 Allabatala ka a fɔ Musa yɛ ko: 2 «Den fɔlɔ mɛnilu ye ai bolo, ai ye woilu bɛɛ di n ma ka ii kɛ n ta ri. Ni a kɛra muso muso dencɛ fɔlɔ ri, ni a kɛra kolofen kolofen den cɛmanta fɔlɔ ri, woilu bɛɛ ye kɛ n ta ri.»

Buru Fununbali Sali

3 Nba, Musa ka a fɔ Isirayɛlikailu yɛ ko: «Ai ye ai hankili to lon ɲin dɔ, ai bɔra Misiran jɔnya rɔ lon mɛn dɔ, baa Allabatala ka ai labɔ yɔrɔ wo rɔ a la sebaya ba la. Wo le kosɔn, ai kana buru lɛbɛnman dɔɔn wo lon. 4 Ai bɔni bi le Abibu karo la. 5 Allabatala ka a kali ai benbailu yɛ ale jɛrɛ tɔɔ la ko a ri jamana do di ii ma, dɔɔnninta duman ye bɔla jamana wo rɔ a ɲa jɛrɛ jɛrɛ ma, li ni nɔnɔ a bɛɛ ye bɔla ye. Kanaankailu siini jamana wo kɔndɔ, a ni Hɛti bɔnsɔnilu ni Amɔrikailu ni Hifikailu ni Jebusikailu. Allabatala wa ai ladon ye tuma mɛn na, karo ɲin ɲɔɔn wa se san san ai ye sali ɲin kɛ. 6 Ai ye buru fununbali dɔɔn tele wɔrɔnwula kɔrɔ. A tele wɔrɔnwulana lon, ai ye sali kɛ ka Allabatala bonya. 7 Ai ye buru fununbali dɔɔn tele wɔrɔnwula kɔrɔ. Buru lɛbɛnman a kana kɛ ai bolo. Lɛbɛn kana kɛ ai la jamana yɔrɔ si fanan dɔ. 8 Ai ye a ɲafɔ ai dencɛilu yɛ wo lon ko: ‹Allabatala ka ko ba kɛ n yɛ n bɔtɔla Misiran. Wo le ka a kɛ, n ye sali ɲin kɛla.› 9 A ri kɛ i la tɔɔmasere ri ikomin bololafen mɛn bilanin i bolo la wala mɛn sidinin i tin na ka kɛ hankili bila fen di, ka ban ka Allabatala a la sariya kuma a ye to i da rɔ waati bɛɛ, ka a masɔrɔn Allabatala ka i labɔ Misiran a la sebaya bolo la. 10 Wo le rɔ, ai ye tola sali ɲin kɛla a waati wo la san san.»

Dencɛ fɔlɔilu la ko

11 Musa ka a fɔ Isirayɛlikailu yɛ ikɔ tuun ko: «Allabatala ka a kali ai benbailu yɛ ko a ri ai ladon Kanaan na duu kɔndɔ. A wa jamana wo kɛ ai ta ri tuma mɛn na, 12 ai ye ai dencɛ fɔlɔilu bɛɛ di Allabatala ma ka ii kɛ a ta ri. Ai la kolofenilu den cɛmanta fɔlɔilu bɛɛ ri kɛ Allabatala ta ri fanan. 13 Ni fali den de, ai ye saaden wala baden saraka wo nɔ rɔ ka fali den kunka. Ni ai tɛ a fɛ ka fali den wo kunka, ai ye wo kan kadi ka a faa. A fɛrɛ tɛ fo ai ye ai dencɛ fɔlɔilu bɛɛ kunka.

14 «Ai dencɛilu ri ai maɲininka lon do rɔ ko ai ye ko mɛn kɛla ɲin, ko wo kɛ kun a ye nfen di? Ii wa ai maɲininka wo ma, ai ye a fɔ ii yɛ ko: ‹Allabatala ka an nabɔ jɔnya rɔ Misiran jamana rɔ a la sebaya bolo la. 15 Ko Ferawuna jusu a ragbɛlɛnyanin de tɛrɛ. Ko a ma sɔn ka an bila. Ko wo rɔ Allabatala ka Misirankailu dencɛ fɔlɔilu bɛɛ faa, ka Misirankailu la kolofenilu den cɛmanta fɔlɔilu bɛɛ fanan faa. Ko wo le rɔ, n ye kolofenilu den cɛmanta fɔlɔilu bɛɛ kɛla sarakafenilu ri Allabatala yɛ, ka n jɛrɛ dencɛ fɔlɔilu bɛɛ kunka.›» 16 Musa ka a fɔ ii yɛ ikɔ tuun ko: «Sali ɲin ye tɔɔmasere le ri, ikomin mɔɔ ye mɛn bilala a bolo la a ni a tin na sa a kana ɲina. Sali ɲin sababu la, an tɛ ɲinala ko Allabatala ka an nabɔ Misiran jamana rɔ a la sebaya bolo la.»

Isirayɛlikailu bɔra Sukɔti ka wa Etan

17 Nba, Ferawuna ka Isirayɛlikailu bila sa ii ri wa tuma mɛn na, Alla ma ii lawa Filisitiilu la jamana sila kan. Sila wo sudunman, kɔni Alla ka a yen ko ni ii wara sila wo kan ka ye mɔɔilu wulitɔla yen ii kanma, ii ri silan ka ii hankili yɛlɛman ka ii kɔsɛ Misiran. 18 Wo rɔ, Alla ka ii lawa kiɲɛ fufu kɔndɔ la sila le kan, mɛn ye taminna ka wa Kɔɔji Fararɔbin fan fɛ. Isirayɛlikailu bɔra Misiran tuma mɛn na, ii rabɛnni tɛrɛ kɛlɛkɛ kanma.

19 Ii bɔtɔla, Musa wara Yusufu a kolo ri a bolo, baa sani Yusufu ye sa, a ka a fɔ a badenmailu yɛ ko sika tɛ a rɔ Alla ri na ii dɛmɛn. Ko a badenmailu ye ii kali a yɛ ko Alla wa ii labɔ Misiran jamana rɔ tuma mɛn na, ii ye a kolo ta ka wa woilu ri ii bolo.

20 Nba, Isirayɛlikailu bɔra Sukɔti ka wa ii daa makɛ kiɲɛ fufu tɔrɔfɛ, yɔrɔ mɛn tɔɔ ko Etan. 21 Allabatala tɛrɛ ye wala ii ɲɛfɛ tuma bɛɛ. Tele rɔ, Allabatala bilara ii ɲɛfɛ duru munuɲa rɔ ka sila yiraka ii la. Su rɔ, Allabatala tamɛlɛnnama a ri bila ii ɲɛfɛ ka mɛlɛn bɔ ii ɲɛfɛ. Wo rɔ, ii sera taamanna su ni tele. 22 Tele tele, duru munuɲa tɛrɛ ye mɔɔilu ɲɛfɛ tuma bɛɛ. Su su, a tamɛlɛnnama tɛrɛ ye mɔɔilu ɲɛfɛ tuma bɛɛ.