1 Allabatala ka a fɔ Musa yɛ ko: 2 «N da Juda kabila Uri mamaren Besalɛli, Huri dencɛ kɔnin, suwandi baara ɲin kanma. 3 N da n Nii lajii Besalɛli rɔ. Wo rɔ, a hankili duman, a la lɔnnin ka bon. A seni bololabaara su bɛɛ kɛla. 4 A senin fen keɲimantailu ladanna sanin na, a ni wodigbɛ la, a ni sulanɛɛ la. 5 A seni kabakudun kisɛilu lɛsɛla, ka ii bila fendamirafenilu la. A seni jiri fanan lɛsɛla. A kusan bololabaara su bɛɛ kɛla. 6 N da Ahisamaki dencɛ Oholiyabu fanan suwandi ka a kɛ Besalɛli dɛmɛnba ri. Oholiyabu ye Daan kabila mɔɔ do le ri. N da famunyali di bololabaarala gbɛrɛilu fanan ma n na baara kanma. Wo rɔ, n ka a fɔ i yɛ ko ai ye fen mɛnilu ladan, ii ri se wo bɛɛ ladanna. 7 Ii ri se n na faaninbon nadanna, a ni teriya tɔɔmasere kankira a ni a julumun kafari dalatuun ni faaninbon muranilu bɛɛ. 8 Ii ri se tabali ni a muranilu bɛɛ ladanna, a ni sanin jɛrɛwolo fitinasiifen ni a muranilu bɛɛ, a ni wusulan janin saraka bɔ diya. 9 Ii ri se saraka bɔ diya fanan nadanna, sarakailu ri janin mɛn kan ka kɛ buuri ri. Ii ri saraka bɔ diya wo muranilu bɛɛ fanan nadan, a ni yagbawara ni a siifenju. 10 Ii ye faanin keɲi bailu fanan nadan, n sarakalasela Haruna la faanin sɛnimanilu ni a dencɛilu la faaninilu kɔnin. Haruna ni a dencɛilu ri faanin woilu bila ii kan na ka n na sarakalasela baara kɛ. 11 Ii ri suwandili tulu ladan, a ni wusulan suma duman, mɛn di janin yɔrɔ sɛniman kɔndɔ. Awa, ii ri fen woilu bɛɛ ladan ikomin n ka a ɲafɔ i yɛ ɲa mɛn ma.»

12 Allabatala ka a fɔ Musa yɛ ko: 13 «I ye a fɔ Isirayɛlikailu yɛ ko ii ye Ɲɔɲɔ Lonilu bɛɛ bonya, baa Ɲɔɲɔ Lon ye tɔɔmasere le ri kadawu ii ni nde tɛma. A ri a yiraka ii la ko Allabatala le nde le ri, mɛn ye ii bilala a dan na ka ii kɛ n ta ri. 14 Ii ye Ɲɔɲɔ Lon bonya, baa lon sɛniman de wo ri ii bolo. Ni mɔɔ mɛn ma sɔn lon wo bonyala fo ka baara do kɛ wo lon, ii ye a labɔ a badenmailu tɛma ka a faa. 15 Ii ye baara kɛ tele wɔɔrɔ kɔrɔ, kɔni tele wɔrɔnwulana le Ɲɔɲɔ Lon dafanin de ri, mɛn bilanin a dan na Allabatala bonya kanma. Mɔɔ mɛn wa baara su su kɛ Ɲɔɲɔ Lon kɔndɔ, ii ye wo faa. 16 Ii ni ii bɔnsɔnilu bɛɛ ka kan ka Ɲɔɲɔ Lon nabato ka a bonya, baa teriya banbali le kadawu. 17 Ɲɔɲɔ Lon ye tɔɔmasere le ri n ni Isirayɛlikailu tɛma kadawu, baa nde Allabatala le ka san ni duu dan tele wɔɔrɔ kɔrɔ, kɔni tele wɔrɔnwulana lon, n ka baara lalɔ ka n dafɔɲɔ.» 18 Awa, Allabatala banda kumala Musa yɛ Sinayi koyinkɛ kan tuma mɛn na, a ka teriya tɔɔmasere kaba walan fila don Musa bolo, Alla jɛrɛ ka sariyailu sɛbɛ mɛnilu kan.