1 Nba, ii ka kari buleman ni kari wulenman ɲalagbɛ ni kari wulenman kadikadi ta ka faanin keɲi bailu ladan, Alla la sarakalaselailu ri mɛnilu bila ii kan na ii don tuma yɔrɔ sɛniman kɔndɔ ka Alla la baara kɛ. Ii ka faanin sɛnimanilu fanan kara Haruna yɛ ikomin Allabatala ka a fɔ Musa yɛ ɲa mɛn ma.

2 Ii ka kɔkanbila durukini ladan sanin na, a ni kari buleman ni kari wulenman ɲalagbɛ ni kari wulenman kadikadi la, a ni makisali ɲuma la. 3 Ii ka sanin gbasi kosɛbɛ ka a fɛya, ka a ratɛɛ. Ii ka sanin wo ta ka a don don makisali ɲuma rɔ, ka a don don kari buleman fanan dɔ, a ni kari wulenman ɲalagbɛ ni kari wulenman kadikadi. Mɛnilu kusan bololabaara kɛla kosɛbɛ ri baara wo kɛ. 4 Ii ka kanbankun julu kelen kelen bila kɔkanbila durukini tonkon fila la, sa a ri se tuunna i ɲɔɔn na. 5 Ii ka tɛsidilan ɲuma ɲuma kɛ kɔkanbila durukini la. Tɛsidilan ni kɔkanbila durukini kɛra fen kelen di. Ii la baaraɲa kanyara fanan. Ii ka tɛsidilan kara kari buleman ni kari wulenman ɲalagbɛ ni kari wulenman kadikadi la, a ni makisali ɲuma la, a ni sanin na, ikomin Allabatala ka a fɔ Musa yɛ ɲa mɛn ma.

6 Ii ka onikisi kabakudun fila rabɛn ka ii don sanin fendamirafenilu rɔ, kabakudun kelen fendamirafen kelen. Ii ka Isirayɛli dencɛilu tɔɔ sɛbɛ kabakudun woilu kan ikomin sɛbɛli ye kɛla kabakudun kan ɲa mɛn ma ka a kɛ ɲanɔɔ ri. 7 Wo kɔ rɔ, ii ka kabakudun woilu bila kɔkanbila durukini kanbankun julu fila la, ka ii kɛ hankili bilafenilu ri Isirayɛlikailu la ko rɔ ikomin Allabatala ka a fɔ Musa yɛ ɲa mɛn ma.

8 Mɛn kusan bololabaara kɛla kosɛbɛ, wo ka sisirɔ bɔrɔni ladan. A ka a ladan sanin na, a ni kari buleman ni kari wulenman ɲalagbɛ ni kari wulenman kadikadi la, a ni makisali ɲuma la ikomin kɔkanbila durukini ladanda ɲa mɛn ma. 9 Ni sisirɔ bɔrɔni wo lakadira ka a la i ɲɔɔn kan, a fan naanin bɛɛ ri kanya. A yanyan ni a bonya bɛɛ kɛra sinbiri ɲa kelen di. 10 Ii ka a masidi kabakudun sankɔgbɛlɛnilu la, ka woilu nara a la ka kɛ safa naanin di. A safa fɔlɔ kɛra saridiwan kabakudun ri, a ni topase kabakudun ni emerada kabakudun. 11 A safa filana kɛra karibunkili kuru ri, a ni safiri kuru ni jaman. 12 A safa sawana kɛra jasinti kuru ri, a ni akate kuru ni ametisi kuru. 13 A safa naaninna kɛra kirisaliti kuru ri, a ni onikisi kuru ni jasipe kuru. Kuru woilu bɛɛ donda sanin fendamirafenilu rɔ, kuru kelen fendamirafen kelen. 14 Kabakuru bɛɛ ladɛnnin kɛra tan ni fila ri, ka a bɛn Isirayɛlikailu la kabilailu jate ma. Ii tɔɔilu sɛbɛra nɛɛ la kabakudunilu kan, kabakudun kelen tɔɔ kelen. Tɔɔilu sɛbɛra ikomin tɔɔ ye sɛbɛla ɲa mɛn ma ɲanɔɔ kan.

15 Ii ka sanin jɔlɔkɔ fila ladan, mɛnilu ri bila sisirɔ bɔrɔni la. Ii ka ii ladan sanin jɛrɛwolo la, ka a mɔrɔmɔrɔ ikomin julukisɛ ye mɔrɔmɔrɔla ɲa mɛn ma. 16 Ii ka sanin fendamirafen fila ni sanin gbarangbaran fila ladan, ka gbarangbaran fila woilu sidi sisirɔ bɔrɔni sanfɛ tonkon fila la. 17 Ii ka sanin jɔlɔkɔ fila woilu kun do don gbarangbaranilu rɔ sisirɔ bɔrɔni tonkon fila la 18 ka ii kun do don fendamirafenilu la, mɛn ye kanbankun julu fila la kɔkanbila durukini ɲɛfɛla rɔ. 19 Ii ka sanin gbarangbaran fila gbɛrɛ ladan ka woilu sidi sisirɔ bɔrɔni kɔfɛ yɔrɔ la a duuma fan tonkon fila la. 20 Wo kɔ rɔ, ii ka sanin gbarangbaran fila gbɛrɛ ladan ka woilu sidi kɔkanbila durukini kanbankun julu fila ɲɛfɛla rɔ. Ii ka ii sidi julu woilu ju kɔrɔ kara diya dafɛ tɛsidilan kun dɔ. 21 Ii ka sisirɔ bɔrɔni gbarangbaranilu ni kɔkanbila durukini gbarangbaranilu bila i ɲɔɔn na juluɲala bule la, sa sisirɔ bɔrɔni ri to a nɔ rɔ kɔkanbila durukini kan tɛsidilan kun dɔ. Ii ka a kɛ ikomin Allabatala ka a fɔ Musa yɛ ɲa mɛn ma.

22 Haruna ri kɔkanbila durukini bila durukiba mɛn kan, ii ka wo bɛɛ ladan kari buleman na. Mɛn kusan jese danna ka wo baara kɛ. 23 Ii ka kun don diya woo bɔ a tɛmala rɔ, ka faanin gbiliman kara woo laminin dɔ, sa durukiba kana fara. 24 Ii ka kerenati jiridenilu sawura ta ta kari buleman ni kari wulenman ɲalagbɛ ni kari wulenman kadikadi ni makisali ɲuma la durukiba sen kɔrɔlailu dagbolo kan. 25 Ii ka talan denninilu ladan sanin jɛrɛwolo la, ka woilu bila bila durukiba sen kɔrɔlailu dagbolo la kerenati jiridenilu sawura tɛma. 26 Ii ka sanin talan dennin do tuun kerenati jiriden sawura kelen kelenna bɛɛ la durukiba dagbolo muumɛ kan. Alla la sarakalasela wa wuli a la baara kɛla, a ri durukiba wo bila a kan na ikomin Allabatala ka a fɔ Musa yɛ ɲa mɛn ma.

27,28 Ii ka Haruna ni a dencɛilu la duruki kɔrɔbilailu ni kurusi kurunniilu ladan makisali ɲuma la, ka Haruna la bitiran ni a dencɛilu la fula ɲumailu fanan nadan makisali ɲuma la. Mɛn kusan jese danna ka wo baara kɛ. 29 Ii ka tɛsidilan nadan makisali ɲuma la, ka a sɔɔ kari buleman ni kari wulenman ɲalagbɛ ni kari wulenman kadikadi la ikomin Allabatala ka a fɔ Musa yɛ ɲa mɛn ma. Mɛn kusan faanin sɔɔ la ka wo baara kɛ.

30 Ii ka saninfɛdɛ do ladan, mɛn ye kuntiiya tɔɔmasere sɛniman di. Ii ka a ladan sanin jɛrɛwolo la, ka sɛbɛli do kɛ a kan ikomin sɛbɛli ye kɛla ɲanɔɔ kan ɲa mɛn ma. Sɛbɛli wo ka a fɔ ko: «A bilanin a dan na Allabatala yɛ.» 31 Ii ka julu buleman sidi saninfɛdɛ wo la, sa a ri se sidila bitiran na mɛn ye a sanfɛ ikomin Allabatala ka a fɔ Musa yɛ ɲa mɛn ma.

32 Nba, ii banda fenilu bɛɛ baarala ten, mɛnilu ri kɛ Alla daa makɛ faaninbon di, Alla Kunbɛn Diya Faaninbon kɔnin. Isirayɛlikailu ka a bɛɛ kɛ ikomin Allabatala ka a fɔ Musa yɛ ɲa mɛn ma. 33 Ii nara Alla daa makɛ faaninbon fen bɛɛ ri Musa ma. Ii nara faaninilu ri, mɛnilu ri kɛ faaninbon jɛrɛ ri, ka na faaninbon kɔndɔfenilu bɛɛ fanan di. Ka a la woilu kan, ii nara fen ɲinilu ri: fendamirafenilu, faanin damira jiriilu, kankan gbelekeilu, taramailu, a ni siifenjuilu. 34 Ii nara faaninbon kunnabirin fila ri. Do ladanni saaji gboloilu la, mɛnilu ra wulen. A tɔ kelen nadanni gbolo kolonin ɲumailu la. Ii nara bon tatɛɛfaanin fanan di, 35 a ni teriya tɔɔmasere kankira ni a gbelekeilu ni a julumun kafari dalatuun. 36 Ii nara tabali fanan di, a ni a muranilu bɛɛ ni saraka buru mɛn di bila tabali kan, mɛn kɔnin dini Allabatala ma. 37 Ii nara fitinasiifen di, mɛn nadanni sanin jɛrɛwolo la. A fitinailu siini tɛrɛ a kan. Ii nara fitinasiifen muranilu bɛɛ fanan di, a ni fitina tulu. 38 Sanin wusulanjanin saraka bɔ diya fanan nara ii bolo, a ni suwandili tulu, a ni wusulan suma duman, a ni faanin mɛn di dun faaninbon donda la. 39 Ii nara sulanɛɛ saraka bɔ diya ri, a ni a sulanɛɛ sansan, ni a gbelekeilu a ni a muranilu bɛɛ. Yagbawara nara ii bolo, a ni a siifenju. 40 Ii nara lukɔndɔla laminin faaninilu ri, a ni tarama ni woilu siifenju, ka na faaninbon donda faanin fanan di. Faaninbon lukɔndɔla laminin faaninilu ri sidi bɔlɔ mɛnilu la duu ma, ii nara woilu fanan di, a ni ii juluilu. Ii nara fen bɛɛ ri, mɛnilu bilatɔ Alla daa makɛ faaninbon kɔndɔ, Alla Kunbɛn Faaninbon kɔnin. 41 Ii nara faanin keɲi bailu le ri, Alla la sarakalasela Haruna la faanin sɛnimanilu ni a dencɛilu la faaninilu kɔnin. Haruna ni a dencɛilu ri faanin woilu bila ii kan na ka Alla sarakalasela baara kɛ yɔrɔ sɛniman kɔndɔ. 42 Isirayɛlikailu ka fen wo bɛɛ baara ikomin Allabatala ka a fɔ Musa yɛ ɲa mɛn ma. 43 Musa ka fen woilu bɛɛ ragbɛ kosɛbɛ. A ka a yen ko ii ka baara wo bɛɛ kɛ ikomin Allabatala tun ka a fɔ ɲa mɛn ma. Wo rɔ, Musa ka duwawu kɛ ii yɛ.