1 Alla ka a fɔ ko: «Musa, i ye i kɔrɔcɛ Haruna kili ko a ye na, a ni a dencɛilu Nadabu ni Abihu ni Elasari ni Itamari. I ri ii bɔ Isirayɛlikailu rɔ ka ii bila a dan na, sa ii ri kɛ n sarakalaselailu ri ka wo baara kɛ n yɛ. 2 Ai ri faanin ɲuma ɲuma kara i kɔrɔcɛ Haruna yɛ, mɛn di bonya di a ma. Faanin wo ri kɛ fen sɛniman di. 3 Mɛnilu kusan karalila kosɛbɛ, n ka wo famunyali di mɛnilu ma kɔnin, i ye woilu kili. I ye a fɔ ii yɛ ko ii ye Haruna la faaninilu kara, a ri mɛnilu bila a kan na a lasii lon. Wo kɔ rɔ, a ri woilu bila a kan na ka n saraka baara kɛ. 4 Ii ye sisirɔ bɔrɔni ni kɔkanbila durukini kara, a ni durukiba ni wo duruki kɔrɔbila sɔɔni ni jalamu ni tɛsidilan. Ii ye faanin sɛniman woilu kara i kɔrɔcɛ Haruna ni a dencɛilu yɛ, baa woilu ri n na sarakalasela baara kɛ. 5 Ii ye faanin woilu kara makisali ɲuma la, a ni kari buleman ni kari wulenman ɲalagbɛ ni kari wulenman kadikadi la, a ni sanin na.

6 «Mɛnilu kusan bololabaara kɛla kosɛbɛ, woilu ye kɔkanbila durukinin nadan. Ii ye a ladan makisali ɲuma la, a ni kari buleman ni kari wulenman ɲalagbɛ ni kari wulenman kadikadi la, a ni sanin na. 7 Kanbankun julu kelen kelen ye kɛ kɔkanbila durukini tonkon fila la, sa a ɲɛfɛla yɔrɔ ni a kɔfɛla yɔrɔ ri se tuunna i ɲɔɔn na. 8 Ii ye tɛsidilan sɔɔni ɲuma kɛ kɔkanbila durukini la. Tɛsidilan ni kɔkanbila durukini ri kɛ fen kelen di. Ii baaraɲa fanan ye kanya. Ii ye tɛsidilan nadan makisali ɲuma la, a ni kari buleman ni kari wulenman ɲalagbɛ ni kari wulenman kadikadi la, a ni sanin na. 9,10 Kabakuru mɛn tɔɔ ko onikisi, ai ye wo kabakudun fila ta ka Isirayɛli dencɛilu tɔɔ sɛbɛ woilu kan ka bɛn ii si kasabi ma. Ai ye tɔɔ wɔɔrɔ sɛbɛ kabakudun fɔlɔ kan, ka a tɔ wɔɔrɔ sɛbɛ kabakudun filana kan. 11 Ai ye Isirayɛli dencɛilu tɔɔ sɛbɛ kabakudun fila woilu kan ikomin sɛbɛli ye kɛla kabakudun kan ɲa mɛn ma ka a kɛ ɲanɔɔ ri. Wo kɔ rɔ, ai ye kabakudun fila wo don sanin fendamirafenilu rɔ, kabakudun kelen fendamirafen kelen. 12 Wo wa kɛ, ai ye ii bila kɔkanbila durukini kanbankun julu fila la. Kabakudun woilu ri kɛ hankili bila fenilu ri Isirayɛlikailu la ko rɔ. Haruna wa faanin wo don, Isirayɛlikailu tɔɔ ri kɛ a kanbankun kan ka kɛ hankili bila fen di nde Allabatala ɲakɔrɔ. 13 Ai ye sanin fendamirafen fila ladan, kabakudun fila wo ri bila mɛnilu rɔ. 14 Wo wa kɛ, ai ye sanin jɔlɔkɔ fila ladan sanin jɛrɛwolo la. Ai ye woilu mɔrɔmɔrɔ ikomin julukisɛ ye mɔrɔmɔrɔla ɲa mɛn ma, ka ban ka ii nara kabakudun woilu fendamirafenilu ma.»

15 «Mɛn kusan bololabaara kɛla kosɛbɛ, wo ye ko latɛɛ sisirɔ bɔrɔni ladan. A ye a ladan sanin na, a ni kari buleman ni kari wulenman ɲalagbɛ ni kari wulenman kadikadi la, a ni makisali ɲuma la ikomin kɔkanbila durukini. 16 A wa lakadi ka a la ɲɔɔn kan a fan naanin bɛɛ ri kanya. A yanyan ni a bonya bɛɛ ri kɛ sinbiri ɲa kelen di. 17 A ye a masidi kabakudun sɔnkɔgbɛlɛnilu la, ka woilu nara a la safa naanin na. A safa fɔlɔ ye kɛ saridiwan kuru ri, a ni topase kuru ni emerada kuru. 18 A safa filana ye kɛ karibunkili kuru ri, a ni safiri kuru ni jaman kuru. 19 A safa sawana ye kɛ jasinti kuru ri, a ni akate kuru ni ametisi kuru. 20 A safa naaninna ye kɛ kirisaliti kuru ri, a ni onikisi kuru ni jasipe kuru. Kuru woilu bɛɛ ye don sanin fendamirafenilu rɔ, kuru kelen fendamirafen kelen. 21 Kabakuru bɛɛ ladɛnnin ye kɛ tan ni fila ri, ka a bɛn Isirayɛlikailu la kabilailu jate ma. Ii tɔɔilu ye sɛbɛ nɛɛ la kabakudunilu kan, kabakudun kelen tɔɔ kelen. Tɔɔilu ye sɛbɛ ikomin tɔɔ ye sɛbɛla ɲa mɛn ma ɲanɔɔ kan.

22 «Ai ye sanin jɔlɔkɔ fila ladan, mɛnilu ri bila sisirɔ bɔrɔni la. Ai ye ii ladan sanin jɛrɛwolo la, ka ii mɔrɔmɔrɔ ikomin julukisɛ ye mɔrɔmɔrɔla ɲa mɛn ma. 23 Ai ye sanin gbarangbaran fila ladan, ka ii sidi sisirɔ bɔrɔni sanfɛ tonkon fila la. 24 Ai ye sanin jɔlɔkɔ woilu kunilu don gbarangbaran kelen kelenna rɔ sisirɔ bɔrɔni tonkon fila la, 25 ka ii kun gbɛrɛilu don fendamirafenilu la, ni a ye kanbankun julu fila la kɔkanbila durukini ɲɛfɛla rɔ. 26 Ai ye sanin gbarangbaran fila gbɛrɛ ladan ka woilu sidi sisirɔ bɔrɔni kɔfɛ yɔrɔ la a duuma fan tonkon fila la. 27 Ai ye sanin gbarangbaran fila gbɛrɛ ladan ka woilu sidi kɔkanbila durukini kanbankun julu fila ɲɛfɛla la. Ai ye ii sidi julu woilu ju kɔrɔ kara diya dafɛ tɛsidilan kun dɔ. 28 Ai ye sisirɔ bɔrɔni gbarangbaranilu ni kɔkanbila durukini gbarangbaranilu bila i ɲɔɔn ma juluɲala bule la, sa sisirɔ bɔrɔni ri to a nɔ rɔ kɔkanbila durukini kan tɛsidilan kun dɔ.

29 «Haruna wa kɛ donna yɔrɔ sɛniman kɔndɔ tuma tuma, ko latɛɛ sisirɔ bɔrɔni ri kɛ a sɔn kan. Isirayɛli dencɛilu tɔɔ sɛbɛni kuruilu kan bɔrɔni wo kan. Tɔɔ woilu ri kɛ hankilibilafen di nde Allabatala ɲakɔrɔ kadawu. 30 I ye Urima ni Tumima bila sisirɔ bɔrɔni kɔndɔ, sa ii ri kɛ Haruna jusu kan a don tuma Allabatala ɲakɔrɔ yɔrɔ sɛniman kɔndɔ. Urima ni Tumima ye n kiti ɲinin fenilu le ri Isirayɛlikailu bolo. Haruna wa na a lɔ Allabatala ɲakɔrɔ tuma tuma yɔrɔ sɛniman kɔndɔ, fo woilu ye kɛ a sɔn kan.»

31 «Awa, Haruna ri kɔkanbila durukini bila durukiba mɛn kan, ai ye wo bɛɛ ladan faanin buleman na. 32 Ai ye kun don woo bɔ a tɛmala rɔ, ka faanin gbiliman kara woo laminin dɔ ka a kɛ dagbolo ri, sa durukiba ti nala farala. 33 Ai ye kerenati jiridenilu sawura ta kari buleman ni kari wulenman ɲalagbɛ ni kari wulenman kadikadi la durukiba sen kɔrɔlailu dagbolo muumɛ kan. Ai ye sanin talan denninilu bila bila jiridenilu sawura tɛma. 34 Sanin talan dennin kelen ye tuun kerenati jiriden sawura kelen kelenna bɛɛ la dagbolo muumɛ kan. 35 Haruna wa wuli n na sarakalasela baara kɛla, fo a ye durukiba wo bila a kan na. A don tuma ni a bɔ tuma yɔrɔ sɛniman kɔndɔ nde Allabatala ɲakɔrɔ, talan mɛnilu ye durukiba dagbolo la, woilu mankan di bɔ. Wo ɲa ma, Haruna ti nala faala.

36 «Ai ye saninfɛdɛ do ladan sanin jɛrɛwolo la, ka sɛbɛli do kɛ a ka a fɔ ko: ‹A bilanin a dan na Allabatala yɛ.› Ai ye wo sɛbɛ ikomin sɛbɛli ye kɛla tɔɔ ɲanɔɔ kan ɲa mɛn ma. 37 I ye saninfɛdɛ wo sidi bitiran ɲɛfɛla rɔ julu buleman na. 38 Wo le rɔ, Haruna wa don yɔrɔ sɛniman kɔndɔ tuma tuma nde Allabatala ɲakɔrɔ, saninfɛdɛ wo ri kɛ a tin na. Wo ri a yiraka ko Haruna ye a lɔla Isirayɛlikailu la kojuuilu kunko la, ii ka mɛnilu kɛ ii la sarakailu bɔ tuma. Ikomin saninfɛdɛ ni a sɛbɛli wo ri kɛ Haruna tin na, n di sɔn Isirayɛlikailu la sarakailu rɔ.

39 «Ai ye duruki kɔrɔbila ni bitiran rabɛn makisali ɲuma la. Mɛn kusan faanin sɔɔla, wo ye tɛsidilan dabɛn ka a sɔɔ ka a ɲa. 40 Ai ye duruki kɔrɔbila ni tɛsidilan ni fula ɲumailu ladan Haruna dencɛilu yɛ, mɛnilu ri bonya di ii ma. 41 I ye faanin woilu bila i kɔrɔcɛ Haruna ni a dencɛilu kan na ka tulu mun ii kun na, ka ii lasii n na sarakalasela baara la. I ri ii bila a dan na ten sa ii ri n na sarakalasela baara kɛ. 42 Ai ye kurusi kurunniilu ladan ii yɛ makisali la. Kurusi woilu ye bɔ ii soro rɔ ka na dan ii woro rɔ. Ii ri woilu don ii la durukiilu kɔrɔ sa ii ri ii jɛrɛ sutura. 43 Haruna ni a dencɛilu wa don n na faaninbon kɔndɔ, wala ii wa ii madon saraka bɔ diya la ka baara kɛ yɔrɔ sɛniman kɔndɔ, fɔɔ ii ye faanin woilu bila ii kan na. Ni wo tɛ, ii ri jalaki ka sa. Sariya le wo ri, mɛn ka kan ka latelen Haruna ni a bɔnsɔnilu bolo kadawu!»