1 Awa, sarakailu ri janin saraka bɔ diya mɛn kan ka a kɛ buuri ri, Besalɛli ka wo ladan kasiya jiri la. Sarakabɔdiya fan naanin bɛɛ kanyara. A fan kelen kelenna bɛɛ kɛra nunkan ɲa loolu ri. A lɔ kɛra nunkan ɲa sawa ri. 2 A ka kere kelen kelenna ladan saraka bɔ diya tonkon naanin bɛɛ la. Saraka bɔ diya ni kereilu bɛɛ tɛrɛ ye fen kelen de ri. Besalɛli ka sulanɛɛ la a yɔrɔ bɛɛ kan. 3 A ka buurigbɛ kɛ muranilu ladan, a ni buurigbɛ ta fenilu ni jeli kɛ bafatailu ni sobo sɔɔlanilu ni takisɛ kɛ fenilu. A ka saraka bɔ diya muran woilu bɛɛ ladan sulanɛɛ la. 4 A ka sulanɛɛ sansan nadan, ka wo bila saraka bɔ diya kɔndɔ. A ka a bila da kirinkirin kɔrɔ saraka bɔ diya lɔ tɛmala rɔ. 5 A ka sulanɛɛ gbarangbaranilu ladan sansan wo tonkon naanin na, tonkon kelen gbarangbaran kelen. Saraka bɔ diya madonnin gbelekeilu ri don gbarangbaran woilu rɔ. 6 A ka gbelekeilu rabɛn kasiya jiri la ka sulanɛɛ la woilu yɔrɔ bɛɛ kan. 7 A ka gbeleke woilu don sulanɛɛ gbarangbaranilu rɔ saraka bɔ diya fan fila bɛɛ fɛ, sa mɔɔilu ri se saraka bɔ diya madoninna. A ka saraka bɔ diya ladan jiri fɛrɛnilu la, ka a kɔndɔ rakolon to.

8 Muso mɛnilu tɛrɛ ye ii ladɛnna faaninbon da la ka faaninbon baara kɛ, woilu ka ii la dubalenilu di. Besalɛli ka woilu ta ka sulanɛɛ yagbawara ni a sulanɛɛ siifenju nadan woilu la.

9 A ka lukɔndɔla laminin faaninilu ladan makisali ɲumailu la. Lukɔndɔla laminin faanin mɛn di dun faaninbon tele kankan bolokinin fan fɛ, wo yanyan kɛra nunkan ɲa kɛmɛ (100) ri. 10 Faanin wo duntɔ tarama muwan (20) de la. Besalɛli ka tarama woilu ladan, a ni ii sulanɛɛ siifenju, tarama kelen siifenju kelen. Wodigbɛ sɔɔlanilu ni faanindun wodigbɛ koyinailu kɛra tarama ma. 11 Lukɔndɔla laminin faanin mɛn di dun faaninbon tele kankan bolomaran dɔ, wo fanan yanyan kɛra nunkan ɲa kɛmɛ (100) ri. Faanin woilu duntɔ tarama muwan (20) de la, mɛnilu kelen kelenna siini a sulanɛɛ siifenju kan. Wodigbɛ sɔɔlanilu ni faanindun wodigbɛ koyina kɛra tarama ma. 12 Faaninbon telebe rɔ, faanin yanyan kɛra nunkan ɲa biloolu (50) ri. Faanin woilu duntɔ tarama tan de la, mɛnilu kelen kelenna siini a siifenju kan. Wodigbɛ sɔɔlanilu ni faanindun wodigbɛ koyinailu kɛra tarama ma. 13 Faaninbon telebɔ rɔ, lukɔndɔla yanyan kɛra nunkan ɲa biloolu (50) ri. 14,15 Lukɔndɔla donda kɛra fan wo fɛ. Donda fan fila bɛɛ fɛ, faaninilu yanyan kɛra nunkan ɲa tan ni loolu ri. Faanin woilu duntɔ tarama sawa sawa le la, mɛnilu kelen kelenna siini a siifenju kan. 16 Lukɔndɔla laminin faaninilu bɛɛ rabɛnni makisali ɲuma la. 17 Tarama siifenju ladanni sulanɛɛ la. Sɔɔlan ni koyina mɛnilu tɛrɛ ye tarama ma, woilu bɛɛ ladanni wodigbɛ la. Wodigbɛ lara tarama bɛɛ kun ma. Wodigbɛ koyina tɛrɛ ye tarama bɛɛ ma. 18 Mɛn kusan faanin sɔɔ la, wo ka lu donda faanin dabɛn makisali ɲuma la, a ni kari buleman ni kari wulenman ɲalagbɛ ni kari wulenman kadikadi. Wo yanyan kɛra nunkan ɲa muwan (20) di. A lɔ kɛra nunkan ɲa loolu ri, ikomin lukɔndɔla laminin faaninilu lɔ. 19 A tarama naanin ni woilu siifenju naanin nadanni sulanɛɛ la. Sɔɔlan ni koyina mɛnilu tɛrɛ ye tarama na, woilu bɛɛ ladanni wodigbɛ la. Wodigbɛ lara tarama bɛɛ kun na. 20 Faaninbon ni a laminin faaninilu ri sidi bɔlɔ mɛnilu la duu ma, woilu fanan nadanni sulanɛɛ la.

21-23 Allabatala ka mɛn fɔ Musa yɛ, Uri dencɛ Besalɛli ka wo bɛɛ ladan. Juda kabila mɔɔ le a ri. A benba ye Huri le ri, Uri fa kɔnin. Besalɛli dɛmɛnba le tɛrɛ Ahisamaki dencɛ Oholiyabu ri, ni a ye Daan kabila mɔɔ ri. Oholiyabu tɛrɛ ye bololabaara ɲuma le ri. A tɛrɛ ye kolɔnna le ri, mɛn tɛrɛ ye fen ɲatɔnɔmailu ni fen keɲiilu ladanna. Faanin sɔɔla tɛrɛ ye a ri fanan, mɛn tɛrɛ ye makisali ɲuma sɔɔla kari buleman ni kari wulenman ɲalagbɛ ni kari wulenman kadikadi la.

Nba, Alla daa makɛ faaninbon mɛn ye Alla la teriya tɔɔmasere daa makɛ faaninbon di. Faaninbon wo ladanda fen mɛnilu la, Musa ka a fɔ Lebi kabila mɔɔilu yɛ ko ii ye wo jatebɔ ka a bɛɛ sɛbɛ. Alla sarakabɔla Haruna dencɛ Itamari tɛrɛ ye jatebɔ baara wo kuntii le ri. Ii ka mɛnilu sɛbɛ, woilu le ɲin di.

24 Isirayɛlikailu ka sanin mɛnilu kɔrɔta Allabatala ɲakɔrɔ ka a di a ma, woilu kɛra kilo waa kelen (1,000) de ri. Woilu bɛɛ donda yɔrɔ sɛniman baara rɔ.

25 Isirayɛlika mɛnilu tɔɔ sɛbɛra jama jatebɔ waati, woilu ka wodigbɛ di wo waati. Ii ka jate mɛn di, wo bɛɛ ladɛnnin kɛra kilo waa sawa ni kilo kɛmɛ naanin ni kilo muwan (3,420) de ri. 26 Mɔɔ mɛnilu sɔrɔn tun da san muwan (20) bɔ, woilu ni woilu kɔrɔilu bɛɛ tɔɔ sɛbɛra. Ii bɛɛ ladɛnnin kɛra mɔɔ waa kɛmɛ wɔɔrɔ mɔɔ waa sawa mɔɔ kɛmɛ loolui mɔɔ biloolu (603,550). Ii kelen kelenna bɛɛ ka wodigbɛ karamun wɔɔrɔ bɔ. Yɔrɔ sɛniman jateli bɛnnin karamun tan ni fila le ma. Ii bɛɛ ka wo tala bɔ ten. 27 Besalɛli ka wodigbɛ kilo waa sawa kilo kɛmɛ naanin (3,400) ta wo rɔ ka wo yelen ka siifenju kɛmɛ ladan, mɛnilu ri bila faaninbon jiriilu kɔrɔ, a ni faaninbon tatɛɛfaanin tarama kɔrɔ, siifenju kelen, wodigbɛ kilo bisawa kilo naanin (34). 28 Wodigbɛ kilo muwan (20) tora. A ka wo ta ka tarama sɔɔlanilu ni koyinailu ladan, ka do fanan la tarama kun na.

29 Isirayɛlikailu ka sulanɛɛ mɛnilu kɔrɔta Allabatala ɲakɔrɔ ka a di a ma, woilu kɛra kilo waa fila kilo kɛmɛ naanin kilo muwan ni kelen (2,421) de ri. 30 A ka siifenju ladan sulanɛɛ woilu la, siifenju mɛnilu ri bila faaninbon donda tarama kɔrɔ. Ii ka sulanɛɛ saraka bɔ diya fanan nadan sulanɛɛ woilu la, a ni a sulanɛɛ sansan ni a muranilu bɛɛ. 31 A ka siifenju gbɛrɛilu fanan nadan sulanɛɛ woilu la. Siifenju woilu ri bila lukɔndɔla laminin tarama kɔrɔ, a ni lu donda tarama kɔrɔ. Faaninbon ni a laminin faaninilu ri sidi bɔlɔ mɛnilu la duu ma, a ka woilu fanan nadan sulanɛɛ woilu la.