1 Allabatala ka a fɔ Musa yɛ ko: 2 «I ye a fɔ Isirayɛlika yɛ ko ii ye na niilifenilu di n ma. Mɔɔ mɔɔ ye a fɛ ka fen do di, i ye wo mira n yɛ. 3 Ii la niilifenilu ka kan ka kɛ mɛnilu ri, woilu le ɲin: sanin, wodigbɛ, sulanɛɛ, 4 kari buleman, kari wulenman ɲalagbɛ, kari wulenman kadikadi, a ni makisali ɲuma, baa si, 5 a ni saaji gbolo kolone wulenman ni gbolo kolonin ɲuma *25.5 sobo su gbɛrɛilu mɛn sɛbɛni yan wo kɔrɔ ye sobo su mɛn ye kɔɔji rɔsu gbɛrɛilu ni kasiya jiri. 6 Ii ye na olibiye tulu ri, mɛn di kɛ fitinailu rɔ. Ii ye na sumadiyalanilu fanan di, mɛnilu ri kɛ wusulan ni suwandili tulu*25.6 Suwandili tulu wo ye kɛla mɔɔ wala fen kan ka woilu bila a dan na Allabatala yɛ. rɔ. 7 Kabakuru mɛn tɔɔ ko onikisi, ai ye na wo ri, a ni kuru ragbɛlɛn gbɛrɛilu. Kaba woilu ri kara n sarakalasela la kɔkanbila durukini kan, a ni a la sisirɔ bɔrɔni kan. 8 Isirayɛlikailu ye faaninbon sɛniman do ladan n yɛ, sa n di n daa makɛ ii tɛma. 9 N di n daa makɛ faaninbon wo ni a kɔndɔ fenilu sawura yiraka i la. I ri a bɛɛ ladan ikomin sawura wo ye ɲa mɛn ma.»

10 «Ai ye teriya tɔɔmasere kankira ladan kasiya jiri rɔ. A yanyan ye kɛ nunkan ɲa fila ni tala ri, a kɔndɔ ye kɛ nunkan ɲa kelen ni tala ri, a lɔ ye kɛ nunkan ɲa kelen ni tala ri. 11 Ai ye sanin jɛrɛwolo la a kɔndɔla ni a kɔkanna bɛɛ kan ka a jiri bɛɛ latunun. Ai ye a da kirinkirin bɛɛ kɛ sanin di. 12 Ai ye sanin gbarangbaran naanin nadan, ka woilu bila kankira sen naanin na, sen kelen gbarangbaran kelen. Wo rɔ, gbarangbaran fila ri kɛ kankira fan kelen fɛ, a tɔ fila ri kɛ fan kelen do fɛ. 13 Ai ye gbelekeilu rabɛn kasiya jiri rɔ, ka sanin la woilu ma ka a jiri bɛɛ latunun. 14 Ai ye woilu don gbarangbaranilu rɔ teriya tɔɔmasere kankira fan fila bɛɛ rɔ, sa kankira ri se madoninna. 15 Gbeleke woilu donni ye to gbarangbaranilu rɔ. Ai kana woilu labɔ. 16 N kɛtɔ sereya mɛn sɛbɛla, i ye wo bila teriya tɔɔmasere kankira kɔndɔ.

17 «Ai ye julumun kafari dalatuun nadan sanin jɛrɛwolo la. A yanyan ye kɛ nunkan ɲa fila ni tala ri. A kɔndɔ ye kɛ nunkan ɲa kelen ni tala ri. 18 Ai ri serubɛn*25.18 Serubɛn ye Alla la mɛlɛka su do le ri. bisiki kelen kelen nadan dalatuun na a kun fila la. Ai ri woilu ladan sanin gbasinin dɔ. 19 Ai ye serubɛn bisiki kelen nadan kankira datuun na a kun kelen na, ka a tɔ kelen nadan dalatuun kun do wo la. Serubɛn bisiki fila ni kankira dalatuun bɛɛ ye ladan ka a kɛ fen kelen di. 20 Serubɛn sawura fila ri ɲabɛn ɲɔɔn ma, ka ii ɲa lɔni to julumun kafari datuun na. Ii kawailu ri layɛlɛ san ma, ka birin kankira datuun na kun na. 21 N kɛtɔ kaba walan fila mɛn dila ile ma, i ri woilu bila teriya tɔɔmasere kankira kɔndɔ ka a dalatuun ii ma. 22 N kɛtɔ n jɛrɛ yirakala i la teriya tɔɔmasere kankira datuun na sanma ye, serubɛn bisiki fila tɛma. N ye a fɛ Isirayɛlikailu ye taama ɲa mɛn ma, n di wo sariyailu bɛɛ di i ma ye le.»

23 «Awa, ai ye tabali kelen nadan kasiya jiri rɔ. A yanyan ye kɛ nunkan ɲa fila ri, a kɔndɔ ye kɛ nunkan ɲa kelen di, a lɔ ye kɛ nunkan ɲa kelen ni tala ri. 24 Ai ye sanin jɛrɛwolo la tabali wo bɛɛ ma ka jiri bɛɛ latunun, ka a da kirinkirin bɛɛ kɛ sanin di. 25 Ai ye gbingbiilu kankan tabali la tabali fan bɛɛ la. Gbingbi woilu bonya ri bɛn bolo koyini naanin bonya ma. Ai ye sanin manyɛrɛ la gbingbi woilu ma. 26 Ai ye gbarangbaran naanin nadan sanin dɔ, ka woilu kelen kelenna don tabali tonkon naanin na a sen kelen kelenna dafɛ. 27 Gbarangbaranilu ye lasudunya fɛrɛnilu la. Tabali ta gbelekeilu ri don gbarangbaran woilu rɔ sa tabali ri se madoninna. 28 Ai ye gbeleke fila ladan kasiya jiri rɔ, ka sanin la woilu kan ka jiri bɛɛ latunun. Gbeleke woilu ri kɛ tabali madoninfenilu ri. 29 Muran mɛnilu ri bila tabali kan, ai ye woilu ladan sanin jɛrɛwolo la. Wo doilu ri kɛ ikomin pileti ni kalamailu ni jilafɛilu ni daailu. N sarakalaselailu ri rɛsɛnji kɛ bafata woilu kɔndɔ ka a labɔn ka a kɛ niilifen di. 30 Saraka buru ri bila tabali ɲin kan. Saraka buru ka kan ka kɛ n ɲakɔrɔ ye tuma bɛɛ.»

31 «Ai ye fitinasiifen ladan sanin jɛrɛwolo gbasinin dɔ. A sen ni a kala ye kɛ fen kelen di, a ni a fitinasii daaninilu ni a kuruilu ni a fɛrɛn bisikilu bɛɛ. 32 Bolon wɔɔrɔ ri bɔ a kala ma. Bolon sawa ri kɛ bolokinin fɛ, bolon sawa ri kɛ bolomaran fɛ. 33 Ai ye daani sawa ladan bolon kelen kelenna bɛɛ la, ka woilu kɛ amande*25.33 Amande ye jiriden dɔɔnta le ri. jiriden munuɲa ri, bɛɛ ni a kuruilu, bɛɛ ni a fɛrɛnilu. 34 Ai ye daani naanin nadan fitinasiifen kala la, ka woilu fanan kɛ amande jiriden munuɲa ri, bɛɛ ni a kuruilu, bɛɛ ni a fɛrɛnilu. 35 Bolon fila fila ye farala kala la yɔrɔ sawa mɛnilu rɔ, ai ye kuru kelen nadan kala la yɔrɔ woilu kelen kelenna bɛɛ kɔrɔ. 36 Fitinasiifen ni a kuruilu ni a bolonilu bɛɛ ri i ladan sanin jɛrɛwolo gbasinin dɔ. Wo bɛɛ ye kɛ fen kelen di.

37 «Ai ye fitina wɔrɔnwula ladan ka woilu sii fitinasiifen kan, sa ii ri a ɲɛfɛla layelen. 38 Ai ye fitina rabɔfenilu ni buurigbɛ kɛ fenilu ladan sanin jɛrɛwolo rɔ. 39 Fitinasiifen ni a muranilu bɛɛ ye ladan sanin jɛrɛwolo kilo bisawa (30) la. 40 Musa, i ye a kɛ koɲuma. I ye baara ɲin bɛɛ kɛ ka a bɛn sawura ma, mɛn ye yirakala i la koyinkɛ kan yan.»