10 «Unttunttu odooruwaa mitsaappe adussatetsay laa"u wad’anne bagga, gomppay itti wad’anne bagga, geesay k’ay itti wad’anne bagga gideedda Taabootaa med’d’ino. 11 Soyaanne kariyaa walakay baynna work’k’aan sheeshsha; Aa yuushshuwaakka work’k’aa tigetsan yuushsha aatsa. 12 He Taabootaw oyddu work’k’aa sagaayetuwaa tigaade oyddu gedetuwaan itti baggana laa"u sagaayetuwaa, k’ay yenkko baggana laa"u sagaayetuwaa aatsa. 13 Hewaappe guyyiyaan odooruwaappe kasuwaa kessaade work’k’aan sheeshsha. 14 Taabootaa tookkanaw, Taabootaa miyyiyaan de’iyaa sagaayetuwaan kasuwaa aatsa. 15 Tookkiyaa kasotuu Taabootaa sagaayetuwaa giddon de’ino; unttunttu hewaappe ubbakka kesoppino. 16 Taabootaa giddon taani new immiyaa, tammu azazatuu s’aafetti utteedda laa"u masetteedda markkatetsaa shuchchatuwaa wotsa.

17 «Walakay baynna work’k’aappe laa"u wad’anne bagga aduk’k’iyaa, itti wad’anne bagga aakkiyaa atto giyaa sa’aa k’um"iyaa med’d’a.✝ 18 K’um"iyaw wurssetsaa laa"u bagga gas’an laa"u kiruubeeliyaa, k’os’etteedda work’k’aappe med’d’a. 19 Itti kiruubiyaa itti bagga gas’an, laa"entso kiruubiyaa yenkko bagga gas’an laa"uwaakka k’um"iyaanna gatsa oytsaade med’d’a. 20 Kiruubetuu barenttu k’efiyaa dentsiide, atto giyaa sa’aa k’um"iyaa barenttu k’efiyaan kuway wotsino; k’ay ittuu ittuwaakko simmi uttiide, k’um"iyaa s’eellino. 21 K’um"iyaa Taabootaw bolla baggan wotsa; k’ay taani new immiyaa azazatuu s’aafettiidde masetteedda shuchchatuwaa Taabootaa giddon wotsa.

22 Markkatetsaa Taabootaa bolla k’um"iyaa bolla de’iyaa laa"u kiruubetuwaappe gidduwaan taani neenana gakettaade Israa’eeliyaa asaw taani immiyaa azazuwaa ubbaa yaan new immana.

1 Bas’aali’eeli odooruwaa mitsaappe Taabootaa giigisseedda. He Taabootay adussatetsay laa"u wad’anne bagga aduk’k’ee; gomppay itti wad’anne bagga aakkee; geesaykka itti wad’anne bagga d’ok’k’ee.

1 Hewaappe guyyiyaan Med’inaa Goday Musa, 2 «Koyro aginaw koyro gallassi, neeni Med’inaa Godaa Dunkkaaniyaa tokka. 3 K’aalaa c’aak’uwaa Taabootaa Aa giddon wotsa; He Taabootaa garidduwaan kamma.

20 Yaatiide tammu azazatuu s’aafetteedda markkatetsaa k’aalaa afiide, Taabootaa giddon wotseedda; tookkiyaa kasuwaa Taabootan aatseedda; atto giyaa sa’aa k’um"iyaa Taabootaa bolla wotseedda. 21 Hewaappe guyyiyaan Taabootaa S’oossaa Dunkkaaniyaa gelisseedda; gentsiyaa gaaridduwaa sottiide, Med’inaa Goday azazeeddawaadan K’aalaa c’aak’uwaa Taabootaa kammeedda.

89 Muse Med’inaa Godaana haasayanaw S’oossaa Dunkkaaniyaa geliyaa wode, Markkatetsaa Taabootaa bollan de’iyaa atto giyaa sa’aa k’um"uwaa bollan, laa"u kiruubetuwaappe gidduwaana Med’inaa Goday haasayiyaa kooshshaa siseedda; Ikka aanana haasayeedda.

33 Yaatina unttunttu Med’inaa Godaa deriyaappe denddiide, heezzu gallassaa keeshshaa ogiyaa beeddino. Med’inaa Godaa C’aak’uwaa Taabootay unttunttu shemppiyaa sa’aa demmanaw he heezzu gallassan unttunttuppe sintsaw beedda. 34 Unttunttu dunkkaaneedda sa’aappe denddiyaa wode ubbaan, Med’inaa Godaa shaarii gallassi gallassi unttunttuppe bollana de’ee. 35 Taabootay denddiyaa wode ubbaan Muse, «Abeet Med’inaa Godaw, dendda! Ne morkketuu laalettino; Neena is’s’iyaawanttukka ne sintsaappe bak’atino» yaagee.✝ 36 Taabootay shemppiyaa wode ubbaan Muse, «Abeet Med’inaa Godaw, ha daro sha"an paydetiyaa Israa’eeliyaa asaakko neeni simma» yaagee.

1 Med’inaa Goday Musa hawaadan yaageedda; 2 «Neeni, ‹Hintte zariyaan zariyaan hintte kaappatuwaappe huup’iyaan huup’iyaan itti itti s’am"aa ubbaanna tammanne laa"u s’am"aa taw immite› yaagaade Israa’eelatuwaappe akka. Itti itti asaa suntsaa s’am"aa bollan s’aafa. 3 Itti itti zariyaa kaappoo itti s’am"aa gidiyaa diraw, Leewiyaa s’am"an Aaroona suntsaa s’aafa. 4 Gaketiyaa Dunkkaaniyaa giddon taani neenana gaketiyaa Markkatetsaa Taabootaa sintsan wotsa. 5 Taani dooriyaa asaa s’am"ay aac’ana; hawaadan ootsaade hintte bollan Israa’eelatuu zuuzummiyaa zuuzuntsaa taani mule d’ayissana» yaageedda.

6 Muse Israa’eeliyaa asaw odina, unttunttu kaappatuu tammanne laa"u s’am"atuwaa, itti itti zariyaa kaappatuu itti itti s’am"aa aw immeeddino. He s’am"atuwaa gidduwaan Aaroona s’am"aykka de’ee. 7 Muse he s’am"aa ubbaa Markkatetsaa Dunkkaaniyaa giddon Med’inaa Godaa sintsan wotseedda.

8 Wonttetsa gallassi Markkatetsaa Dunkkaaniyaa giddo Muse geleedda wode, Leewiyaa zare gidiyaa Aaroona s’am"ay aac’eeddawaa, gumbbeeddawaa, c’iisheeddawaanne c’iishiide lawuziyaa giyaa mitsaa ayfiyaa ayifeeddawaa be’eedda.✝ 9 Hewaappe guyyiyaan, Muse s’am"aa ubbaa Med’inaa Godaa sintsaappe Israa’eeliyaa asaa ubbaakko aheedda. Asay unttuntta be’eeddawaappe guyyiyaan, kaappatuu barenttu s’am"aa s’am"aa akkeeddino. 10 Med’inaa Goday Musa, «Aaroona s’am"aa Taabootaa sintsan zaara wotsa. Hewaa makkaleeddawanttu ta bolla laa"entso zuuzummiide hayk’k’ennaadan, unttunttoo malaataa ootsaade naaga» yaageedda. 11 Med’inaa Goday azazeeddawaadan Muse ootseedda.

14 Asay Yorddaanoosa Shaafaa pinnanaw barenttu dunkkaaniyaappe kesseedda wode, K’aalaa c’aak’uwa Taabootaa tookkeedda k’eesatuu asaappe sintsan hametteeddino. 15 Katsaa c’akkiyaa wodiyaan ubbaan Yorddaanoosa Shaafay kuntseedda. Gidooppenne, K’aalaa c’aak’uwa Taabootaa tookkeedda k’eesatuu Yorddaanoosa Shaafaa gakkina, unttunttu gedii haatsaa gas’aa yed’d’eedda wode, 16 k’ommoppe duge goggiyaa haatsay ek’k’i aggeeda; hini darssi haako san, S’arttaana giyaa saan de’iyaa Adaama geetettiyaa kataman itti sa’aa shiik’iide dooretteedda. Duge Aaraba gad’an de’iyaa Mas’ine Abbaw goggiyaa haatsay k’ay ubbay duus’s’iide atti basheedda. Yaatina, Asay Yaarikko katamaa hefintsa pinneedda. 17 Israa’eeliyaa Asay mela gadiyaa yed’d’iide pinniyaa wode, Asay ubbay pinniide wurana gakkanaw S’oossaa K’aalaa c’aak’uwa Taabootaa tookkeedda k’eesatuu Yorddaanoosa Shaafaa giddon mela biittan ek’k’eeddinno.

18 S’oossaa K’aalaa c’aak’uwa Taabootaa tookkeedda k’eesatuu Yorddaanoosa Shaafaa giddoppe kesiide mela biittaa unttunttu yed’d’eeddawaan, ellekka Yorddaanoosa haatsay bare sa’aa simmiide kase goggiyaawaadan gas’aa gakkanaw kumiidde, gogetsaa doommeedda.

1 Israa’eeliyaa asaw yayyeedda gaasuwaan Yaarikko katamaa dirssaa penggetuu gorddettiide naagettiino; katamaa gelanawunne katamaappe kesanaw danddayiyaa ooninne baawa. 2 Med’ina Goday Iyyaasa, «S’eella, taani Yaarikko katamaa Aa kaatiyaanna Aa mino olanchchatuwaakka ne kushiyan aatsaade immaad. 3 Neeninne ne olanchchatuu salppiide, usuppun gallassay gakkanaw hachche hachche katamaa dirssaa itti gede yuuyyi aad’d’ite. 4 K’ay laappun k’eesatuu dorssatuwaa kac’iyaappe kesseedda laappun malakatatuwaa oyk’k’iide, S’oossaa K’aalaa c’aak’uwa Taabootaa sintsanna hamettino. Laappuntsa gallassi k’eesatuu malakatatuwaa punnishin, olanchchatuu salppiide, ittippe katamaa laappu gede yuuyyi aad’d’ite. 5 Hewaappe guyyiyaan malkkatatuwaa punuwaa goochchiide punniyaawaa sisiyaa wode, ellekka Asay ubbay bare k’aalaa d’ok’k’u ootsiide waasso. Yaatooppe katamaa dirssaa gimbbii kunddina Asay ubbay sintsaw lawuhu giide gelana» yaageedda.

6 Neewe na’ay Iyyaasu k’eesetuwaa s’eegiide, «Med’ina Godaa K’aalaa c’aak’uwa Taabootaa tookkite; hintteppe laappun k’eesatuu laappun malakatatuwaa oyk’k’iide, K’aalaa c’aak’uwa Taabootaappe sintsaw aad’d’iide hamettino» yaageedda. 7 Asaa, «Sintsaw biite; katamaa yuuyyi aad’d’ite; olaw giigeeddawanttukka Med’ina Godaa K’aalaa c’aak’uwa Taabootaa sintsan hamettino» yaagiide azazeedda.

20 Hewaa diraw malakatatuu punettina Asay waasseedda. Malakatatu punuwaan Asay bare k’aalaa d’ok’k’u ootsiide waasseedda; ellekka katamaa dirssaa gimbbii kunddi aggeeda! Hewaappe guyyiyaan Asay ubbay sintsaw lawuhu gi gelinne katamaa oyk’k’i aggeeda.✝

2 Piliss’s’eematuu c’itan c’itan gidiide, Israa’eelatuwaana olettanaw denddeeddino; olay suullina, oyddu sha"a Israa’eelatuwaa wod’eedda Piliss’s’eematuwaan Israa’eelatuu s’oonetteeddino. 3 Olanchchatuu shiik’eedda sa’aa simmeedda wode, Israa’eeliyaa c’imatuu, «Hachche Med’inaa Goday nuuna Piliss’s’eematuwaan ayaw s’oonisseedee? Nuunana baanaadaninne nuuna nu morkkatuwaa kushiyaappe ashshanaadan S’oossaa K’aalaa c’aak’uwa Taabootaa Seeloppe ane ahooytte» yaageeddino. 4 Hewaa diraw, Asay Seelo kiittina, kiruubetuwaa gidduwaan araatan uttiyaa ubbaappe Wolk’k’aama Med’inaa Godaa K’aalaa c’aak’uwa Taabootaa aheeddino. Eeliya naanay laa"atuu Hofiniininne Piinihaasi S’oossaa K’aalaa c’aak’uwa Taabootaanna yaan de’iino.✝

5 Med’inaa Godaa K’aalaa c’aak’uwa Taabootay shiik’k’eedda sa’aa gakkeedda wode, Israa’eelatuu ubbay biittay k’aas’s’ana gakkanaw barenttu k’aalaa d’ok’k’u ootsiide, «S’oossaa K’aalaa c’aak’uwa Taabootay gakkeedda» yaageeddino.

6 Israa’eelatuwaa c’abbuwaa Piliss’s’eematuu sisiide, «Hawe Ibraawetuu shiik’k’eeddasan sisettiyaa, wolk’k’aama walassay ayee?» yaageeddino.

Med’inaa Godaa Taabootay unttunttu shiik’k’eedda sa’aa yeeddawaa Piliss’s’eematuu eriide yayyeeddino. 7 Hawaadan yaageeddino; «S’oossay unttunttu shiik’k’eedda sa’aa yeedda. Aayye ana nuunoo! Hawaa malabay hawaappe kase hani erenna. 8 Aayye ana nuunoo! Ha wolk’k’aama s’oossatuwaa kushiyaappe nuuna ashshanawe oonee? Ha s’oossatuu Gibs’etuwaa woran boshaa ubbaan shoc’eeddawantta. 9 Hinttenttoo Piliss’s’eematoo, minnite! Asaadan olettite! Hewe d’ayooppe, hinttenttu unttuntta kase ayiletetsan mooddeeddawaadan, unttunttukka hinttentta mooddanawantta. Hewaa diraw, asaadan olettite!» yaageeddino.

10 Piliss’s’eematuu olettiide, Israa’eelatuwaa s’ooneeddino; Israa’eelatuu barenttu dunkkaaniyaakko bak’atteedino. He olan daro Asay goora’etteedda; Israa’eeliyaa olanchchatuwaappe hattamu sha"ay hayk’k’eedda. 11 S’oossaa Taabootay omoodetteedda; Eeliya naanay laa"u, Hofiniininne Piinihaasi hayk’k’eeddino.

6 Ashddooda katamaa bollanne hewaa heeraan de’iyaa asaa bolla Med’inaa Godaa kushii wolk’k’aameedda; S’oossay unttunttu bollan boshaa yeddiide, gaafuwaa harggiyaan unttuntta mureedda.

7 Ashddooda katamaa Asay haneeddabaa be’eedda wode, «Israa’eeliyaa S’oossaa kushii nu bollanne nu s’oossaa Daagoona bolla wolk’k’aameedda diraw, Israa’eeliyaa S’oossaa Taabootay nu matan gam"oppo» yaageeddino. 8 Piliss’s’eema kaappatuwaa ubbaa barenttukko s’eesi shiishshiide, «Israa’eeliyaa S’oossaa Taabootaa waatanee?» yaagiide oochcheeddino.

Shin kaappatuu, «Israa’eeliyaa S’oossaa Taabootay Gaate geetettiyaa katamaa bo» yaagiide zaareeddino. Yaatina, Israa’eeliyaa S’oossaa Taabootaa Gaate afeedino.

9 Shin Taabootay Gaate gakkeeddawaappe guyyiyaan, Med’inaa Godaa kushii he katamaa bolla wolk’k’aamiidde, loytsi wolk’k’aama dagantsuwaa dagantseedda; yaatiide kataman de’iyaa asaa naanatuwaappe c’imaa gakkanaw gaafuwaa harggiyaan shoc’eedda. 10 Hewaa diraw, S’oossaa Taabootaa Ek’iroona katamaa yeddeeddino.

S’oossaa Taabootay Ek’iroona geliyaa wode, Ek’iroona asatuu hawaadan yaagiide waasseeddino; «Nuunanne nu asaa wod’anaw Israa’eeliyaa S’oossaa Taabootaa nuukko aheeddino» yaageeddino. 11 Hewaa diraw, Piliss’s’eema kaappatuwaa s’eesi shiishshiide, «Israa’eeliyaa S’oossaa Taabootaa hawaappe diggite; I guyye bare sa’aa simmo; hewe d’ayooppe, nuunanne nu asaa wod’ana» yaageeddino. Ayaw gooppe, katamaa ubbaan hayk’k’uwaa dagamay de’ee; S’oossaa kushiikka katamaa bolla wolk’k’aameedda.

1 Med’inaa Godaa Taabootay Piliss’s’eema biittan laappun aginaa utteedda. 2 He wode Piliss’s’eema asatuu k’eesetuwaanne shareechchatuwaa s’eesiide, «Med’inaa Godaa Taabootaa nuuni waatanee? Nuuni guyye Aa sa’aa Aa wooti yeddanentto, nuw odite» yaageeddino.

3 Unttunttu, «Israa’eeliyaa S’oossaa Taabootaa guyye yeddiyaawaa gidooppe, mela yeddoppite; ay haniidenne hinttenttu bayzzuwaa yarshshuwaa aw yeddite; yaatooppe, hinttenttu pas’ana; Aa kushii hinttenttu bollappe ayaw kichchibeennenttokka hinttenttu erana» yaagiide zaareeddino.

10 Unttunttu hewaadan ootseeddino; unttunttu d’antsiyaa laa"u miizzatuwaa akkiide, gaariyan waas’eeddino; miizzatuu maratuwaakka son gorddeeddino. 11 Unttunttu Med’inaa Godaa Taabootaanne k’ay work’k’aa ec’eretuwaanne gaafuwaa malatissi med’d’eedda misiletuwaa yeggeedda saas’iniyaa gaariyan wotseeddino. 12 Hewaappe guyyiyaan, miizzatuu Beeti-Shemeshi afiyaa ogiyaa oyk’k’i sitti giide, «Himbbaa!» gi waassiidde beeddino; unttunttu ogiyaanna biidde, ushechcha woy haddirssa simmibeykkino; Piliss’s’eema kaappatuu miizzatuu geeduwaa kaalliide, Beeti-Shemesha zawaa gakkanaw beeddino.

13 Beeti-Shemesha asatuu he wode wombban zarggaa c’akkiino; unttunttu pude d’ok’k’u gi s’eelliide, Taabootaa be’iide nashetteeddino. 14 Gaarii Beeti-Shemeshiyaa Iyyaasu gade gakkiide, itti wolk’k’aama zaallaa matan ek’k’eedda; unttunttu gaariyaa mitsaa k’oo’iide, s’uuggiyaa yarshshuwaadan he miizzatuwaa Med’inaa Godaw yarshsheeddino. 15 Leewatuu Med’inaa Godaa Taabootaanne work’k’aa miishshaanna de’iyaa saas’iniyaa gaariyaappe dentsiide, wolk’k’aama zaallaa bolla wotseeddino. He gallassi Beeti-Shemesha asatuu s’uuggiyaa yarshshuwaa Med’inaa Godaw yarshsheeddino; k’ay hara yarshshotuwaakka yarshsheeddino.

1 K’iiriyaati-Yi’aariima asatuu yiide, Med’inaa Godaa Taabootaa afiide deriyaa huup’iyaan de’iyaa Abinaadaaba soy aheeddino. Med’inaa Godaa Taabootaa naaganaadan, Abinaadaaba na’aa El"aazaara dummayiide suntseeddino.✝

2 Taabootay K’iiriyaati-Yi’aariiman daro wodiyaa gam"eedda; hewenne, laatamu laytsaa keeshsha gidiyaawaa. Israa’eeliyaa Asay ubbay kayyottiidde, Med’inaa Godaakko waasseeddino.

12 Hewaappe simmiide, «S’oossaa Taabootaa diraw, Med’inaa Goday Obeedi-Eedooma soo asaanne aw de’iyaa ubbabaa anjjeedda» yaagiyaawaa Kaatii Daawite siseedda; hewaa diraw, Daawite Obeedi-Eedooma soo biide, S’oossaa Taabootaa Daawita Katamaa nashechchan aheedda. 13 Med’inaa Godaa Taabootaa tookkeedda asatuu usuppunuwaa tanggeedda payduwaan payduwaan unttuntta essiide, itti korumaanne itti bolttiboltta maraa Daawite yarshsheedda. 14 Daawite suufiyaa giyaa k’ac’inaappe dadetteedda eefuudiyaa mayyiide, barew de’iyaa wolk’k’aa ubbaan Med’inaa Godaa sintsan dureedda. 15 Inne Israa’eeliyaa asatuu ubbatuu nashechchan hombboc’iiddinne ulttuwaa punniidde Med’inaa Godaa Taabootaa Daawita Katamaa aheeddino.

1 Hewaappe guyyiyaan Kaatii Solomone Med’inaa Godaa Taabootaa Daawita Katamaappe, S’iyooneppe kessiide, Geeshsha Golliyaa ahanaadan, Israa’eeliyaa c’imatuwaa, zaratuwaa ubbaa kaappatuwaanne Israa’eeliyaa golliyaa asatuwaa kaaletsiyaawantta Yerusaalame katamaa shiishsheedda.✝ 2 Etaaniima geetettiyaa laappuntsa aginaan, Daasiyaa Baalay bonchchettiyaa wode, Israa’eeliyaa Asay ubbay Kaatiyaa Solomonekko shiik’eedda.✝

3 Israa’eeliyaa c’imatuu ubbay gakkina, k’eesatuu Taabootaa dentseeddino. 4 Leewatuunne k’eesatuu, Med’inaa Godaa Taabootaa, Dunkkaaniyaanne Dunkkaaniyaa giddon de’iyaa geeshsha miishshatuwaa ubbaa tookkiide aheeddino. 5 Kaatii Solomoninne aanana de’iyaa Israa’eeliyaa yaa’ay kumentsay Taabootaa sintsan shiik’iide, paydanaw danddayettenna c’ora dorssaanne mehiyaa yarshsheeddino.

6 Hewaappe guyyiyaan k’eesatuu Med’inaa Godaa K’aalaa c’aak’uwa Taabootaa Geeshsha Golliyaw giddo geeshsha k’ol"uwaa, Ubbaappe Aad’d’eeda Geeshsha sa’aa giyaa sa’aa ahiidde, kiruubetuwaa misiletuu k’efetuwaappe garssa baggana wotseeddino. 7 Mic’etti utteedda kiruubetuwaa k’efetuu Taabootaanne Taabootaa tookkiyaa kasuwaa kammeeddino. 8 Kasotuu loytsi adussa gidiyaa diraw, unttunttu s’eeray Ubbaappe Aad’d’iyaa Geeshsha sa’aa sintsan de’iyaa Geeshsha Sa’aan beettanaw danddayee; shin Geeshsha Sa’aappe karenna beettanaw danddayenna. Unttunttu hachche gakkanaw he sa’aan de’iino. 9 Israa’eeliyaa Asay Gibs’e gadiyaappe kesseedda wode, Med’inaa Goday unttunttunna k’aalaa c’aak’uwaa c’aak’k’eteedda Siinaa Deriyan Muse wotseedda laa"u masetteedda shuchchatuwaappe attina, Taabootaa giddon harabay ayaynne baawa.✝

10 K’eesetuu Geeshsha Sa’aappe kesina, shaarii Med’inaa Godaa Geeshsha Golliyaa kumeedda.✝ 11 He shaariyaa gaasuwaan k’eesatuu barenttu kiitaa ootsanaw danddayibeykkino; ayaw gooppe, Med’inaa Godaa bonchchu Aa Geeshsha Golliyaa kumi utteedda.

14 «K’aykka Med’inaa Goday hawaadan yaagee; ‹Hinttenoo, ammanettena asatoo, simmite; ayaw gooppe, taani hintte asinaa. Hinttena ittuwaa itti katamaappe, laa"uwaa itti yaraappe dooraade akkana; hinttena S’iyoone ahana. 15 Hewaappe guyyiyaan, taani ta wozanaadan, hinttena heemmiyaa hentsanchchatuwaa hinttew immana. Unttunttu hinttena eratetsaaninne akeekan heemmana› » yaagee.

16 K’aykka Med’inaa Goday, «He gallassatuwaan hintte he biittan c’orattiyaa wode, asatuu, ‹Med’inaa Godaa C’aak’k’uwaa Taabootaa› giide haasayikkino. I unttunttoo karhinne geena, woy hassayettenna, woy bayinnawekka unttunttoo k’ofettenna; k’ay haray oosettenna.

1 Koyro c’aak’k’oo S’oossaw goyinniyaa wogaynne Asay ootseedda Geeshsha Gollii de’ee. 2 Ayaw gooppe, koyro Dunkkaanii ek’k’eedda; Aa gidduwaan muk’aaddaa wotsiyaawe, s’arap’p’eezaynne Godaa sintsan wotsiyaa ukitsay de’ee; he sa’ay Geeshsha sa’aa giide s’eeseettee.✝ 3 Laa’entso gaaridduwaa guyye baggana Ubbaappe Aad’d’iyaa Geeshsha Sa’aa geetettiyaa Dunkkaanii de’ee.✝ 4 Aa gidduwaan is’aanaa c’uwayanaw work’k’aappe ootseedda saas’iniinne ubba saanna work’k’aan sheeshsheedda K’aalaa c’aak’uwaa Taabootay de’ee. He K’aalaa c’aak’uwaa Taabootan mannay de’iyaa work’k’aa s’aaruu, Aaroona s’am"ay aac’eeddawenne k’ay Muse higgii s’aafetteedda laa"u masetteedda shuchchatuu de’iino.✝ 5 He k’aalaa c’aak’uwaa Taabootaappe bolla baggana atto giyaa sa’aa k’um"iyaa barenttu k’efiyaan gentsiyaa bonchcho kiruubetuu de’iino; shin ha ubbabaa ha"i wurssi odanaw danddayokko.✝

19 Saluwaan de’iyaa S’oossaa Geeshsha Gollii dooyetteedda; Aa Geeshsha Golliyaan S’oossaa K’aalaa c’aak’uwaa Taabootay beetteedda. K’ay walk’k’antsay wolk’k’aameedda; guntsay sisetteedda; guuguntsay guummeedda; biittay k’aas’s’eedda; wolk’k’aama shachchaykka shac’c’eedda.