1 Israa’eelatuu Piliss’s’eematuwaanna olettanaw keseeddino; Israa’eelatuu Eben"eezeren shiik’ina, Piliss’s’eematuu Afeek’an shiik’k’eeddino. 2 Piliss’s’eematuu c’itan c’itan gidiide, Israa’eelatuwaana olettanaw denddeeddino; olay suullina, oyddu sha"a Israa’eelatuwaa wod’eedda Piliss’s’eematuwaan Israa’eelatuu s’oonetteeddino. 3 Olanchchatuu shiik’eedda sa’aa simmeedda wode, Israa’eeliyaa c’imatuu, «Hachche Med’inaa Goday nuuna Piliss’s’eematuwaan ayaw s’oonisseedee? Nuunana baanaadaninne nuuna nu morkkatuwaa kushiyaappe ashshanaadan S’oossaa K’aalaa c’aak’uwa Taabootaa Seeloppe ane ahooytte» yaageeddino. 4 Hewaa diraw, Asay Seelo kiittina, kiruubetuwaa gidduwaan araatan uttiyaa ubbaappe Wolk’k’aama Med’inaa Godaa K’aalaa c’aak’uwa Taabootaa aheeddino. Eeliya naanay laa"atuu Hofiniininne Piinihaasi S’oossaa K’aalaa c’aak’uwa Taabootaanna yaan de’iino.✝4:4 Kes. 25:22

5 Med’inaa Godaa K’aalaa c’aak’uwa Taabootay shiik’k’eedda sa’aa gakkeedda wode, Israa’eelatuu ubbay biittay k’aas’s’ana gakkanaw barenttu k’aalaa d’ok’k’u ootsiide, «S’oossaa K’aalaa c’aak’uwa Taabootay gakkeedda» yaageeddino.

6 Israa’eelatuwaa c’abbuwaa Piliss’s’eematuu sisiide, «Hawe Ibraawetuu shiik’k’eeddasan sisettiyaa, wolk’k’aama walassay ayee?» yaageeddino.

Med’inaa Godaa Taabootay unttunttu shiik’k’eedda sa’aa yeeddawaa Piliss’s’eematuu eriide yayyeeddino. 7 Hawaadan yaageeddino; «S’oossay unttunttu shiik’k’eedda sa’aa yeedda. Aayye ana nuunoo! Hawaa malabay hawaappe kase hani erenna. 8 Aayye ana nuunoo! Ha wolk’k’aama s’oossatuwaa kushiyaappe nuuna ashshanawe oonee? Ha s’oossatuu Gibs’etuwaa woran boshaa ubbaan shoc’eeddawantta. 9 Hinttenttoo Piliss’s’eematoo, minnite! Asaadan olettite! Hewe d’ayooppe, hinttenttu unttuntta kase ayiletetsan mooddeeddawaadan, unttunttukka hinttentta mooddanawantta. Hewaa diraw, asaadan olettite!» yaageeddino.

10 Piliss’s’eematuu olettiide, Israa’eelatuwaa s’ooneeddino; Israa’eelatuu barenttu dunkkaaniyaakko bak’atteedino. He olan daro Asay goora’etteedda; Israa’eeliyaa olanchchatuwaappe hattamu sha"ay hayk’k’eedda. 11 S’oossaa Taabootay omoodetteedda; Eeliya naanay laa"u, Hofiniininne Piinihaasi hayk’k’eeddino.

12 Biiniyaama zare gideedda itti bitanii olaa dembbaappe wos’s’iide, he gallassi Seelo gakkeedda; kayyuwaa erissanaw I bare mayuwaa peed’iide, bare huup’iyankka baana laaleedda. 13 He bitanii gakkiyaa wode, Eeli bare wozanaan S’oossaa Taabootaabaa hirggeedda diraw, naagiidde ogiyaa doonaan de’iyaa bare oydiyaan utteedda. Bitanii katamaa geliide, haneeddabaa odina, katamay ubbay waasuwaa s’uleedda.

14 Eeliikka he waasuwaa sisiide, «Hawe ayba waasee?» yaageedda.

Bitanii ellekka yiide, Eelew odeedda; 15 Eeli udduppun tammanne hosppun laytsaa c’ima gideedda, ayfiikka s’eelaa aggiide goljjeedda asaa. 16 Bitanii Eelew, «Olaa dembbaappe yeeddawe taana; taani hachche yaappe bak’ataad» yaageedda.

Hewaappe guyye Eeli, «Ta na’aw, yaatina waaneedee?» yaagiide oochcheedda.

17 Oduwaa aheedda bitanii, «Israa’eelatuu Piliss’s’eematuwaa sintsaappe bak’atteedino; daro Asay wureedda; ne naanay laa"u Hofiniininne Piinihaasi hayk’k’eeddino; S’oossaa Taabootaykka omoodetteedda» yaageedda.

18 Bitanii S’oossaa Taabootaabaa odeedda wode, penggiyaa matan de’iyaa bare oydiyaappe Eeli guyye kunddina barggalli me"ina hayk’k’eedda; ayaw gooppe, I c’imanne ordduwaa. Eeli Israa’eeliyaa gadiyaan oytamu laytsaa daannateedda.

19 Eeliyaa na’aa Piinihaasa machata yelanaw wodii gakkeedda shaahaaraa. S’oossaa Taabootay omoodetteeddawaanne bare bolluunne bare asinay hayk’k’eeddawaa Aa siseedda wode, k’oppennaan yeluu izo oyk’k’ina yelaaddu. 20 Aa hayk’k’anaw matatteedda wode, yelissiyaawanttu, «Neeni attuma na’aa yeleedda diraw yayyoppa» yaageeddino; shin unttunttoo Aa ayinne zaarabeykku; unttunttu giyaawaakka hayzzabeykku. 21 Aa bare na’aa Ikaabooda*4:21 Ikaabooda: Ha suntsaa Biletsay Ibraaweetsuwaan, «Bonchchuu baawa» giyaawaa. suntsaaddu; S’oossaa Taabootay omoodetteedda dirawunne bare bolluunne bare asinay hayk’k’eedda diraw, «Bonchchuu Israa’eelatuwaappe shaakketeedda» yaagaaddu. 22 Aa, «Bonchchuu Israa’eelatuwaappe shaakketteedda; ayaw gooppe, S’oossaa Taabootay omoodetteedda» yaagaaddu.