Hizik'k'eela 42

Geeshsha Golliyaa Matan Kees’etteedda Laa"u Golletuwaa

1 Hewaappe guyyiyaan, he bitanii taana huup’issa bagga penggiyaanna kare dabaabaa kaaletsiide Geeshsha Golliyaa giddo dabaabaa gimbbiyaana oyk’k’etteedda golliyaakko, taana aheedda. 2 He golliyaa penggii pude bagga simiide, he Gollii 100 wad’aa adussanne 50 wad’aa aakko. 3 Gido dabaabaappe laatamu wad’aa haakkiide, k’ay sintsa baggana kare dabaabaan de’iyaa hiis’s’etteedda shuchchaappe sintsa baggana ittuu ittuwaanna s’eeletiyaa heezu detsay de’iyaa pook’ii de’ee. 4 He kifiletuwaa penggetuu huup’issa s’eelliino. Unttunttuppe sintsa baggana 10 wad’aa aakonne 100 wad’aa adussa gideedda, giduwaana aatsiyaa ogii de’ee. 5 He golliyaa bolla heezzentso pook’ii laa"entsuwaappe s’uumee; laa"entsuu k’ay koyiruwaappe s’uumee. Gaasotaykka unttunttu ittuu ittuwaappe guyye shiik’i shiik’iide gimbbetteedda diraassa. 6 K’ay unttunttu heezzu pook’iyaan de’iyaa kifiletuu k’omowanttuppe garssawanttunne gido zawaan de’iyaa kifiletuu s’uumiyaa diraw kare dabaabaan de’iyaa hara golletuwaadan, unttunttoo tuussay baawa. 7 He kifiletuwaappe sintsa baggana, 50 wad’aa aduk’k’iyaa kare dabaabaa baggana de’iyaa itti gimbbii de’ee. 8 Kare dabaabaa baggana de’iyaa kifiletuwaa adusatetsay 50 wad’aa aduk’k’iyaawaa gidishin Geeshsha golliyaa sintsan de’iyaa kifiliyaa adusatetsay 100 wad’aa. 9 Kare dabaabaappe soo geliyaa wode away doliyaa baggana garssa kifiletuwaa geliyaa penggii de’ee.

10 Hewaadankka, Geeshsha Golliyaappe gedissa baggana kare dabaabaa gimbbiyaa kaaliide Geeshsha Golliyaa dabaabaanna oyk’k’eteeddanne kare dabaabaakko s’eeliyaa hara kifiletuu de’iino. 11 He golliyaa kifiletuwaa sintsan Asay hamettiyaa ogii de’ee. He Gollii huup’issa baggan de’iyaa golliyaana itti mala; adussatetsay, aakotetsay, kifiletuunne penggetuu ubbay itti mala. 12 Dirssaa gimbbii wuriyaa away doliyaa bagga gas’aappe doomiide gimbbi doommiyaa gedissa baggana de’iyaa kifiletuwaa geliyaa penggii de’ee.

13 Hewaappe guyyiyaan, he bitanii taana hawaadan yaageedda; «Hawanttu kifiletuu, huup’issananne gedissanna Geeshsha Golliyaa kare dabaabaakko s’eelliyaawanttu k’eesetuwaa kifiletuwaa. Unttunttu giddon Med’inaa Godaa sintsan ootsiyaa k’eesatuu ubbaappe aad’d’eeda geeshsha k’umaa maana. He kifiletuu geeshsha gideedda diraw, ubbaappe aad’d’eeda geeshsha imotaa, hewanttunne katsaa yarshshuwaa, nagaraa yarshshuwaanne naak’uwaa yarshshuwaa ubbaa, unttunttu hewan wotsana. 14 Geeshsha Golliyaa geleedda k’eesatuu kare dabaabaa kesiyaa wode, S’oossaw ootsiyaa wode mayyeedda geeshsha mayuwaa kessiide, he kifiletuwaan wotsennan kesikkino. Ayaw gooppe, mayotuu geeshsha. Unttunttu kare asaakko kesiidde, kase mayiyaa hara mayotuwaa mayyiide kesanaw koshshee» yaageedda.

Geeshsha Golliyaa yuushshuwaa Likkiyaa

15 He bitanii Geeshsha Golliyaa garssa dabaaban de’iyaa keetsatuwaa likkii wurssiide, away doliyaa bagga s’eelliyaa dirssaa penggiyaanna taana kare kesseedda. Geeshsha Golliyaa yuushshi aatsiide likkeedda. 16 S’am"aa akkiide, away doliyaa bagga likkina, 500 wad’aa gideedda. 17 Simmiide huup’issa bagga he gatiman likkina 500 wad’aa gideedda. 18 Simmiide gedissa bagga likkina 500 wad’aa gideedda. 19 Simmiidekka away wulliyaa bagga likkeedda; ikka 500 wad’aa gideedda. 20 Hewaadan ootsiide, I oyddu baggatuwaakka likkeedda. Aa yuushshuwaan 500 wad’aa aduk’k’iide, 500 wad’aa aakkiyaa dirssaa gimbbii de’ee. He gimbbii geeshsha sa’aa yenkko c’oo sa’aappe shaakkanaassa.