Hizik'k'eela 7

Israa’eeliyaw Wurssetsay Gakkeeda

1 Med’inaa Godaa k’aalay taakko hawaadan yaagiidde yeedda; 2 «Neenoo asaa na’aw, Ubbaa Mooddiyaa Med’inaa Goday Israa’eeliyaa biittaw hawaadan yaagee; ‹Wurssetsaa be’ite! Ubbaa baggaana biittaa bollan wurssetsay gakkeedda. 3 Hekko, wurssetsay hintte bolla gakkeedda! Taani ta hank’k’uwaa hintte bolla yeddana. Taani hintte oosuwaadan, hintte bolla pirddana; hintte tuna hanotaadan, taani hinttena murana. 4 Taani hinttew k’arettikkenne hintteppe ittuwaanne ashshikke. Hintte iita oosuwaa dirawukka murana; hintte giduwaan de’iyaa is’s’eteedda eek’aa goynnuwaakka k’onc’c’isana. Taani Med’inaa Godaa gidiyaawaa hintte hewan erana› yaagee.

5 «Ubbaa Mooddiyaa Med’inaa Goday hawaadan yaagee; ‹Bashshaa! Bashshaa bollan bashshay yee. 6 Wurssetsay gakkeedda! Wurssetsay gakkeedda! I hintte bollan denddeedda. Be’ite, I gakkeedda! 7 Ha biittan de’iyaawanttoo, hintte pirdday gakkeedda; wodii gakkeedda; gallassay matatteedda! Hewe shabbirssaa gallassaappe attina, zooziyaa bollan nashshechchan ililiya gallassaa gidenna. 8 Ha"i matan taani ta hank’k’uwaa hintte bolla gussana; ta yiluwaakka hintte bollan wurssana. Taani hintte oosuwaadan, hintte bolla pirddana; hintte tuna hanotaadan, hinttena murana. 9 Taani hinttew k’arettikkenne hintteppe ittuwaanne ashshikke. Hintte iita oosuwaa dirawukka murana; hintte giduwaan de’iyaa eek’aa goynnuwaakka k’onc’c’isana. Yaatooppe hintte hinttena shoc’eeddawe taana Med’inaa Godaa gidiyaawaa erana.

10 « ‹Hekko gallassay! hawesh gakkeedda! Hintte bayetsay hintte penggiyaa gakkeedda! Hintte iitatetsay kuukumeedda; hintte otoruukka c’iisheedda. 11 Makkalaa gaasuwaan iita oosuu dareedda; unttunttuppe ittuunne attena; unttunttu c’oratetsaappe, woy unttunttu duretetsaappe, woy unttunttu bonchchuwaappe ayinne attena. 12 Wodii gakkeedda; gallassaykka matatteedda! Hank’k’uu asaa ubbaa bollaanna gidiyaa diraw, shammiyaawe nashettoppo; woy zal"iyaawekka kayyottoppo. 13 Unttunttu laa"uu pas’a de’iyaa wodiyaan, zal"eeddawe bare zal"eeddawoo guyye simmenna. Iraa’eliyaa asaa ubbaa bolla odeteedda ha sas’ay laamettena; unttunttu nagaraappe denddeeddawaan unttunttuppe ittuunne bare shemppuwaa ashshenna. 14 Ta hank’k’uu asaa ubbaa bolla de’iyaa diraw, unttunttu olaw ulttuwaa punniide, ubbabaa giigissooppekka, ooninne olaw kesenna.

Israa’eeliyaa Asaa Nagaraa Gaasuwaan Yiyaa Muruwaa

15 « ‹Karenna olay, soonna iita harggiinne koshay de’ee. Katamaappe gas’an de’iyaawe olan hayk’k’ana; katamaa giddon de’iyaawanttu koshaaninne iita harggiyaan wurana. 16 Unttunttuppe atteedawanttu, dembba gadiyaappe yashshan bak’ateedda harap’p’etuwaadan barenttu nagaraa gaasuwaan deriyaa bollan olana. 17 Kushiyaa ubbay donc’c’ilana; gulbbatay ubbay kolddina yashshan muushana. 18 Unttunttu maak’aa mayyana; k’ay yashshan kokkorana. Unttunttu ubbaa som"iikka yeellaa mayyana; unttunttu ubbaa huup’iikka meedettana. 19 Unttunttu barenttu biraa ogiyaan olana; unttunttu work’k’aykka tunabaa gidanawaa. Ees’s’iyaa Med’inaa Godaa hank’k’uwaa gallassi, unttunttu biraynne unttunttu work’k’ay unttuntta ashshanaw danddayenna. Unttunttoo d’ube gidiide, nagaran gelisseedda biraynne work’k’ay unttunttu uluwaa kumiide, unttuntta koshaappe ashshenna.

20 « ‹Unttunttu barenttu lo"o alleek’k’uwan otoretteeddino; hewantta barenttu is’s’eteedda tuna eek’anne yeellayiyaa misiliyaa med’d’anaw go’etteeddino. Hewaa diraw, taani he lo"o alleek’k’uwaa unttunttoo tunabaa kessaad. 21 Taani unttunttu alleek’k’uwaa omooduwaa ootsaade, allagawunne biittaa ubbaan de’iyaa iitatoo aatsaade immina, unttunttu Aa tunabaa kessana. 22 He wode taani ta som"uwaa wora zaarana; k’ay ta bonchcho Geeshsha Golliyaa panggatuu geliide tunissana.

23 « ‹Suure pirddaa d’ayussaan, biittay ubbay suutsaan kumeedda dirawunne katamaykka makkala oosuwaan kumeedda diraw, sanssalataa giigissa. 24 Unttunttu golletuwaa baressa ootsana mala, taani ubbaappe iita kawutetsaa ahana. Wolk’k’aamatuwaa otoruwaakka taani d’ayissana; unttunttu geeshsha sa’atuukka tunana. 25 Dagamay yiyaa wode, unttunttu saruwaa koyana; shin demmikkino. 26 Bashshay bashshaa bolla, k’ay iita oduu iita oduwaa bolla yaana. Unttunttu timbbitiyaa odiyaawaa, «Ne sas’aa oda» yaagana. K’eesetoo tamaarissiyaa timirttii d’ayana; c’imatookka zoriyaawe d’ayana. 27 Kaatii yeekkana; kaappuu hidootaa k’ans’s’ana; he biittaa asaa kushii yashshan kokkorana. Taani unttunttoo unttunttu oosuwaadan ootsana; unttunttu pirddaadan, unttunttu bolla pirddana. Taani Med’inaa Godaa gidiyaawaa unttunttu hewan erana› yaagee» yaagiidde yeedda.