Hizik'k'eela 15

Woynniyaa Turaa Leemisuwaa

1 Med’inaa Godaa k’aalay taakko hawaadan yaagiidde yeedda; 2 «Laa asaa na’aw, woyniyaa anuu bazzuwaan de’iyaa hara mitsaappe ayaayaani keeki? 3 Go"ay de’iyaabaa ootsanaw Aa anuwaappe k’ans’s’etti erii? Ayentto kak’k’iyaa koc’aa aappe kessa eray? 4 Aa oysetsuwaadan taman yeggina, ya baggaynne ha baggay taman meetettina, gidduwaan atteeda s’iis’untsay ay maaddanee? 5 S’uugettennan de’iiddi, kase ayentto maaddibeennawe, tamay miina ees’s’i kichchiide ayentto maaddenna.

6 «Hewaa diraw, Ubbaa Mooddiyaa Med’inaa Goday hawaadan yaagee; ‹Taani bazzo mitsaa giddon de’iyaa woyniyaa anuwaa tamaw oysetso ootsaade immeeddawaadan, Yerusaalamen de’iyaa asaakka hewaadan ootsana. 7 Taani ta som"uwaa unttunttu bollan zaarana. Unttunttu itti tamaappe kesooppekka, hara tamay unttuntta maana. Taani ta som"uwaa unttunttu bolla zaariyaa wode, taani Med’inaa Godaa gidiyaawaa hinttenttu erana. 8 Unttunttu taanan ammanettennan aggeeda diraw, taani unttunttu biittaa ona kesana. Taani Ubbaa Mooddiyaa Med’inaa Goday hawaa oday› yaagee» yaagiidde yeedda.