Hizik'k'eela 28

S’iiroosa Mooddiyaawanttu Bolla Yaana Pirddaa

1 Med’inaa Godaa k’aalay taakko hawaadan yaagiidde yeedda; 2 «Laa asaa na’aw, S’iiroosa kaappuwaa hawaadan yaagaade oda; ‹Ubbaa Mooddiyaa Med’inaa Goday hawaadan yaagee; «Ne wozanay otoretteedda diraw, Taani s’oossaa; taani abbaa giddo gishechchan, s’oossatuwaa araatan uttaad yaagaadda. Neeni, taani s’oossaadan, aad’d’eeda eranchcha kesaad gaade k’oppooppenne, neeni asaappe attina, s’oossaa gidakka. 3 Neeni Daaneelappekka aad’d’eeda eranchchee? Ay s’uuraykka neeppe geemmennee? 4 Tumukka neeni ne aad’d’eeda eraaninne ne akeekan dure gidaadda; biraanne work’k’aa ne duretaa minjjiyaa golliyaa shiishshaadda. 5 Ne zal"iyaa eran daro wod’iyaa demmaadda; ne duretaappe denddeeddawaan ne wozanay otoretteedda» yaagee.

6 « ‹Hewaa diraw, Ubbaa Mooddiyaa Med’inaa Goday hawaadan yaagee; «Neeni, taani s’oossaadan, aad’d’eeda eranchcha gaade k’oppiyaa diraw, 7 taani ne bolla kawutetsatuwaa ubbaappe mek’etsi bayinna, iita morkkatuwaa ahana; neeni ne aad’d’eeda eran shiishsheedda mas’uwaa ubbaa unttunttu barenttu mashshaan d’ayissana; ne bonchchuwaakka unttunttu tunissana. 8 Neena unttunttu wod’iide, abbaa c’iimman olana. 9 Yaatina, neena wod’ana haniyaawaa sintsan neeni, tumu taani s’oossaa gaanii? Neena wod’iyaawanttu kushiyan neeni asaappe attina, s’oossaa gidakka. 10 Neeni allagatuwaa kushiyan ammanenna Asay hayk’k’iyaa hayk’k’uwaa hayk’k’ana. Taani Ubbaa Mooddiyaa Med’inaa Goday hawaa odaad» yaagee› yaaga» yaagiidde yeedda.

S’iiroosa Kaatiyaa Kunddetsaa

11 K’aykka Med’inaa Godaa k’aalay taakko hawaadan yaagiidde yeedda; 12 «Laa asaa na’aw, S’iiroosa kaatiyaw hawaadan yaagaade zilaala; ‹Ubbaa Mooddiyaa Med’inaa Goday hawaadan yaagee; «Neeni kase aad’d’eeda eran kumeeddawaa; neeni Asay leemisiide odiyaa aad’d’eeda puulanchcha gidaadda. 13 Neeni Edenen, S’oossaa gennetiyaan kase de’aadda; sarddiyoone, toop’aaziyoone, almmaaze, biralle, margide, yasp’p’iide, samppeerenne baluura geetettiyaa al"o shuchchaan alleek’k’ettaade, lo"o work’k’aa alleek’k’uwaa kase mayyaadda; neeni med’etteedda gallassi hawe ubbay new giigeedda. 14 Taani neena naagiyaa kiruube ootsaade suntsaad; yaataade neena okkaad. Ta geeshsha deriyaa bollan neeni de’aadda; k’ay tamaadan p’ooliyaa al"o shuchchatuwaa giddon simerettaadda.

15 « ‹ «Neeni med’etteedda gallassaappe doommaade, iitabay ne bolla beetteedda gallassay gakkanaw, ne ogiyaa ubbaan tooshii bayinnan de’aadda. 16 Ne daro zal"iyaappe denddeeddawaan, makkalan kumaade, nagaraa ootsaadda. Hewaa diraw, ta geeshsha deriyaappe tunabaadan, neena wolk’k’an kessaad. Neenoo, naagiyaa kiruubiyaw, he tamaadan p’ooliyaa al"o shuchchatuwaa giddoppe taani neena yederssaad. 17 Neeni puulanchcha gidiyaa diraw, daro otorettaadda; ne bonchchuwaa gaasuwaan, ne aad’d’eeda eraa tunissaadda. Hewaa diraw, taani neena sa’aan olaad; hara kaatetuu neena be’iide seeretanaadan ootsaad. 18 Ne nagaraa daruwaaninne ne c’imuwaa zal"iyaan, ne goyinniyaa sa’atuwaa ubbaa tunissaadda. Hewaa diraw, taani tamay ne giddoppe kesanaadan ootsaad; ikka neena meedda. Ubbatuu s’eellishshin, taani neena sa’aa bollan bidintsaa kessaad. 19 Neena kase eriyaa kawutetsatuu ubbay nebaan dagammeeddino. Ne wurssetsay yashshiyaawaa gideedda; neeni laa"entso ubbakka de’akka» yaagee› yaagaade zilaala» yaagiidde yeedda.

Sidoona Bolla Yaana Pirddaa

20 Med’inaa Godaa k’aalay taakko hawaadan yaagiidde yeedda;✝28:20-26 Iyu. 3:4-8; Zak. 9:1-2; Mat. 11:21-22; Luk'. 10:13-14 21 «Laa asaa na’aw, ne som"uwaa Sidoona katamaakko zaaraadde, Aa bolla timbbitiyaa oda. 22 Hawaadan yaaga; ‹Ubbaa Mooddiyaa Med’inaa Goday hawaadan yaagee; «Neenoo, Sidoonaa, taani new morkke! ne bolla ootsiyaawaan ta bonchchuu k’onc’c’ana. Ne giddon de’iyaawantta pirddiyaawaan taani ta geeshshatetsaa bessiyaa wode, taani Med’inaa Godaa gidiyaawaa unttunttu ubbay erana. 23 Taani ne giddon iita harggiyaa yeddana; ne ogiyaan suutsay gukkanaadan ootsana. Ubbaa baggana yiyaa olaa gaasuwaan ne Asay mashshaan hayk’k’ana. Taani Med’inaa Godaa gidiyaawaa unttunttu hewan erana.

24 « ‹ «Hawaappe sintsanaw Israa’eeliyaa yuushshuwaan de’iyaa, Aa kad’iide s’eelliyaa biittaa ubbaappe, aguntsa malanne kashiyaa mala gidiide k’ohiyaabay ooninne de’enna. Taani Ubbaa Mooddiyaa Med’inaa Godaa gidiyaawaa unttunttu hewan erana» yaagee› yaaga» yaagiidde yeedda.

Israa’eeliyaa Asaa Anjjuwaa

25 Ubbaa Mooddiyaa Med’inaa Goday hawaadan yaagee; «Israa’eeliyaa asaa unttunttu laaletteedda kawutetsaa ubbaappe shiishshaade, taani ahiyaa wodenne unttunttu he kawutetsatuwaa ubbaa sintsan taani ta geeshshatetsaa bessiyaa wode, taani ta k’oomaa Yaak’oobaw immeedda barenttu biittan unttunttu de’ana. 26 Hewan unttunttu saruwaan de’ana; golliyaa kees’s’ana; woyniyaa turaakka tokkana. Unttuntta kad’iide s’eelliyaa unttunttu shoorotuwaa ubbaakka taani pirddiyaa wode, Israa’eeliyaa Asay saruwaan de’ana. He wode taani Med’inaa Goday unttunttu S’oossaa gidiyaawaa unttunttu hewan erana» yaagee.