Hizik'k'eela 4

Yerusaalame Bolla S’oossaa Pirddaa

1 «Neenoo asaa na’aw, urk’k’aappe med’d’eedda S’uubiyaa akkaade, ne sintsan wotsa; yaataade Yerusaalame katamaa misiliyaa Aa bolla med’d’a. 2 Aa doodda; dirssaa ooninne kesi akkenaada diraa, katamaa gimbbiyaa yuushshuwaan biittaa doora; olanchchatuu ek’k’iyaasaa giigissa; gimbbiyaa laaliyaa olaa miishshaa yuushshuwaan giigisaa. 3 K’ay birataa bashiyaa akkaade, birataa godaadan neeppenne katamaappe gidduwaan essa. Ne som"uwaakka hank’k’uwaan aakko zaara. He katamay doodettana; k’ay dooddeeddawekka neena. Hawe Israa’eeliyaa asaw mallaa gidanawaa.

4 «Hewaappe guyyiyaan, Israa’eeliyaa asaw muruwaa mallaa gidana mala ne haddirssa miyyiyaan gisa. Neeni ne haddirssa miyyiyaan giseedda gallassatuwaa payduwaa keeshshaa Israa’eeliyaa asaa unttunttu waan murettanentto bessaasa. 5 K’ay neeni gisaade Israa’eelii wooti murettanentto bessanaadan 390 gallassaa new immaad. He itti itti gallassay unttunttu muretiyaa itti itti laytsaana k’ara.

6 «He gallassaa ne wursseeddawaappe guyyiyaan, k’ay zaaraadde ne ushechcha miyyiyaan Yihudaa Asay wooti murettanentto bessanaw gisa; Itti itti gallassay itti itti laytsaa muruwaanna k’ara gidiyaa diraw, hewaadan unttunttu ootseedda nagaraa muruwaa oytamu gallassaa neeni gisanaadan, taani new immaad. 7 Ne som"uwaa Yerusaalame dooddetsaakko hank’k’uwaan zaaraadde, ne kushiyaa dentsa manddaade, Yerusaalame bolla timbbitiyaa oda. 8 He dooddetsan neeni gam"iyaa gallassay wuranaw, itti miyyiyaappe hara miyyiyaw aad’d’a wod’d’ennaadan, taani neena wodoruwaan k’achchana.

9 «Ha"i neeni, zarggaanne banggaa, baa"eelaanne missiriyaa, maldduwaanne morgge mitsaa akkaade, katsaa wotsiyaa itti baatsan k’olaade, aappe new k’umaa katsaade; hewaa neeni miyyiyaan gisiyaa 390 gallassaa maana. 10 Hachchi hachchi neeni miyaa ukitsaa likka; ikka 230 giraamiyaa dees’iyaawaa gido; hewaa Aa wodiyaan wodiyaan ma. 11 K’ay neeni hachchi hachchi ushiyaa haatsaakka likka; ikka laa"u burc’c’ukko gido; hewaa Aa wodiyaan wodiyaan usha. 12 He walakkeedda katsaa banggaa ukitsaa uukkiyaawaadan uukka; Asay s’eellishshin, asaa wora sheeshsha mela eetsaade uukka; yaataade ma. 13 Hewe Israa’eeliyaa Asay taani unttuntta laaliyaa kawutetsatuwaa giddon de’iiddi, tuneedda k’umaa maanawoo malaataa» yaageedda Med’inaa Goday.

14 Yaatina, taani zaaraadde hawaadan yaagaad; «Hay! Ubbaa Mooddiyaa Med’inaa Godaw, hewe hanoppo! Taani taana tunissa erikke. Ta na’atetsaappe doommaade hachchi gakkanaw, bakkutaa woy bazzo do’ay puuziide wod’eeddawaa ma erikke; tuneedda ashuu ta doonaakko shiik’i erenna» yaagaad.

15 I zaariide, taana hawaadan yaageedda; «Daro lo"a, yaatooppe, asaa wora sheeshshaa melan uukkiyaawaa aggade, miizzaa oshaa kewiyaan ne ukitsaa uukkaasa» yaageedda.

16 I k’aykka hawaadan yaageedda; «Neenoo asaa na’aw, be’a; Yerusaalame katamaa katsi gelennaadan, taani diggana hanay. Asay katsaa hirggiidde, makkiide maana; k’ay haatsaakka yayyiidde, likkiide ushana. 17 Hewoo unttunttoo de’iyaa katsaynne haatsay wurana; unttunttu ittuu ittuwaa, ‹Poora!› giidde s’eelana; unttunttu barenttu nagaraa muruwaan gilk’k’ana.