Hizik'k'eela 22

Yerusaalame Nagaraa

1 Med’inaa Godaa k’aalay taakko hawaadan yaagiidde yeedda; 2 «Laa asaa na’aw, suutsaa gussiyaawanttu kumeedda katamaa bolla pirddanaw giigaadii? Yaatooppe, I ootseedda tuna oosuwaa ubbaa aw oda. 3 Hawaadan yaaga; ‹Ubbaa Mooddiyaa Med’inaa Goday hawaadan yaagee; «Neeni daro asaa suutsaa gusseedda dirawunne eek’aw goyinniyaawan neena tunisseedda diraw, ne wodii yeedda. 4 Neeni gusseedda suutsan bayzzanchcha gidaadda; ne med’d’eedda eek’ankka tunaadda. Yaatina, ne pirddaa gallassay matatteedda; ne wurssetsaa laytsaykka gakkeedda. Hewaa diraw, taani neena kawutetsatoo kad’iyaawaanne hara biittatookka k’iliic’iyaawaa kessana. 5 Neenoo, suntsi bayeeddanne shabbiretteedda katamatiw, mataaninne haakuwaan de’iyaawanttu neena k’iliic’ana.

6 « ‹ «Ne giddon de’iyaa Israa’eeliyaa kaappatuu ubbatuu suutsaa gussanaw barenttu wolk’k’aa ay keeshshaa go’ettintto be’a. 7 Ne giddon de’iyaawanttu barenttu aawuwaanne barenttu aato bonchchikkino; unttunttu betetuwaakka uk’k’unneeddino; am"etuwaanne aawuu aata bayinna naanatuwaa naak’k’iino.✝22:7 Kes. 20:12; 22:21-22; Zar. 5:16; 24:17 8 Unttunttu ta geeshsha yewotuwaa kad’iinonne ta Sambbataakka tunissiino.✝22:8 Wog. 19:30; 26:2 9 Ne giddon de’iyaawanttuppe ittuu ittuu haratuwaa wod’isanaw wordduwaa odiino; haratuu deriyaa bolla de’iyaa eek’aw goyinniyaa sa’atuwaan miino; k’ay haratuu ubbabaan tuniyaawanttu ne gidon de’ino. 10 Ne giddon de’iyaawanttuppe ittuu ittuu bare aawuwaa machchattinna gisiino; haratuu k’ay piilay yeedda mac’c’a mishiratina wolk’k’an gakkettiino.✝22:10-11 Wog. 18:7-20 11 Ne giddon de’iyaawanttuppe ittuu ittuu bare shooruwaa machchattinna gisiino; bare na’aa machchattinna gisiino; bare aawuwaa naatti, bare michchatina wolk’k’an gisiino. 12 Ne giddon de’iyaawanttuppe ittuu ittuu miishshaa akkiide, shemppuwaa wod’iino; haratuu barenttu miishshaa dichchaw immiinonne, barenttu shooruwaa miishshaa yashissiide akkiino. K’ay hintte taana ubbakka dogeeddita. Taani Ubbaa Mooddiyaa Med’inaa Goday hawaa oday.✝22:12 Kes. 22:25; 23:8; Wog. 25:36-37; Zar. 16:19; 23:19

13 « ‹ «Ne giddon de’iyaa Asay bessena miishshaa akkiyaa dirawunne shemppuwaa wod’iyaa diraw, taani hank’k’uwaan ta kushiyaa bak’k’ana. 14 Taani neena muriyaa gallassi ne goobatetsay neenana de’anee? Woy ne kushii mino gidanee? Taani Med’inaa Goday hawaa odaad; taani odeeddawaa taanikka ootsana. 15 Taani ne asaa kawutetsatuwaa giddoninne hara biittatuwaa giddon laalana; ne tunatetsaakka taani ne bollappe d’ayissana. 16 Hara kawutetsatuwaa sintsan neeni kawushshana; shin he wode taani Med’inaa Godaa gidiyaawaa neeni erana» yaagee› yaaga» yaagiidde yeedda.

S’oossaa Tamay Geeshshee

17 Hewaappe guyyiyaan, Med’inaa Godaa k’aalay taakko hawaadan yaagiidde yeedda; 18 «Laa asaa na’aw, Israa’eeliyaa Asay ayinne patsenna birataa shi’aa mala; unttunttu ubbaykka biraa muushisiide geeshshiyaa wode, shi’aa gidiide attiyaa nahaasiyaa, k’ork’k’oruwaa, birataanne irssaasiyaa mala. 19 Hewaa diraw, Ubbaa Mooddiyaa Med’inaa Goday hawaadan yaagee; ‹Hintte ubbaykka birataa shi’aa mala gideedda diraw, taani hinttena ubbaakka Yerusaalame giddo shiishshana. 20 Asay biraa, naasiyaa, birataa, irssaasiyaanne k’ork’k’oruwaa tamaa c’ooc’iyaakko shiishshiide womppiinaan punniide muushissiyaawaadan, taani ta hank’k’uwaaninne ta yiluwaan hinttena shiishshaade, katamaa giddon muushisanna. 21 Taani hinttena shiishshaade, ta hank’k’uwaa tamaa hintte bolla womppiinaa punnina, hintte hewan muushana. 22 Biray c’ooc’iyaan muushiyaawaadan, hintte Yerusaalamen muushana. He wode taani Med’inaa Goday ta hank’k’uwaa hintte bolla gusseeddawaa hintte erana› yaagee» yaagiidde yeedda.

Israa’eeliyaa Asaa Kaaletsiyaawanttu Nagaraa

23 Med’inaa Godaa k’aalay taakko zaariidekka hawaadan yaagiidde yeedda; 24 «Laa asaa na’aw, unttunttu biittay tuneedda diraw, ta hank’k’uwaan iray bukkennaadan diggaade, taani Israa’eeliyaa asaa muruwaa doommowaa unttunttoo oda. 25 Unttunttu kaappatuu bare wod’eeddawaa gudiidde mentsereetsiyaa gaammuwaa mala; unttunttu asaa wod’iino; al"o miishshaa gidina, hara duretaa gidina, ubbaa barenttoo akkiino; unttunttu he biittaan daro mac’c’a asaa am"e kesseeddino. 26 K’eesetuu ta higgiyaa mentseeddino; ta geeshshabaakka tunisseeddino. Geeshshaanne tunaa shaakkikkino; k’ay tunaappenne tuna gidenawaappe gidduwaan de’iyaa dummatetsaa tamaarissikkino; ta Sambbataw gatiyaa immibeykkino. Hewaappe denddeeddawaan, taani Israa’eeliyaa asaa giddon bonchchettabeykke.✝22:26 Wog. 10:10 27 Aa giddon de’iyaa kaappatuu barenttu wod’eeddawaa duuseretsiyaa okorotuwaa mala; unttunttu barenttoo bessenna duretetsaa demanaw shemppuwaa wod’iino. 28 Yerusaalame kataman timbbitiyaa odiyaawanttu godaa booshunchchaa okkiyaa asaadan, wordduwaa sas’aa be’iyaawaaninne wordduwaa timbbitiyaa odiyaawan, unttunttu nagaraa gentsiino. Med’inaa Goday odennan de’ishiina, ‹Ubbaa Mooddiyaa Med’inaa Goday hawaadan yaagee› yaagiino. 29 He biittaa asatuu bonk’k’iino; zaraafino; hiyyeesatuwaanne metootanchchatuwaa uk’k’unniino; unttunttu betetuwaakka un"etsiide suure pirddaa geelayiino.

30 «Taani biittaa d’ayissennaadan, dirssaa gimbbiyaa kees’s’iyaa, koletteedda dirssaa penggiyaa baggana ek’k’iide naagiyaa itti asaa koyaad; shin oonanne demmabeykke. 31 Hewaa diraw, ta hank’k’uwaa unttunttu bolla gussana; taani ta hank’k’uwaa taman unttuntta d’ayissana; taani unttunttu ootseedda oosuwaa unttunttu bolla zaarana. Ubbaa Mooddiyaa Med’inaa Goday hawaa oday» yaagiidde yeedda.