Hizik'k'eela 25

Amoonatuwaa Bolla Odetteedda Timbbitiyaa

1 Med’inaa Godaa k’aalay taakko hawaadan yaagiidde yeedda;✝25:1-7 Erm. 49:1-6; Hiz. 21:28-32; Amo. 1:13-15; Sof. 2:8-11 2 «Laa asaa na’aw, ne som"uwaa Amoona biittaakko zaaraadde, Amoonatuwaa bolla timbbitiyaa oda. 3 Hawaadan yaaga; ‹Ubbaa Mooddiyaa Med’inaa Godaa k’aalaa sisite. Ubbaa Mooddiyaa Med’inaa Goday hawaadan yaagee; «Hintte ta Geeshsha Gollii tuniyaa wode, Israa’eeliyaa biittay mela attiyaa wodenne Yihudaa Asay omoodoo biyaa wode, Hashshu! geedda diraw, 4 taani hinttena away doliyaa bagga biittaa asaw laata ootsaade immana. Yaatooppe unttunttu hintte giddon kambbiyaa kees’s’ana; de’ana. Hintte maana teeraa unttunttu maana; hintte maatsaakka unttunttu ushana. 5 Taani Raaba katamaa gaalotuu heemettiyaa sa’aa kessana; Amoonatuwaa gadiyaakka dorssaa wudii allas’s’iya sa’aa ootsana. Taani Med’inaa Godaa gidiyaawaa hintte hewan erana» yaagee.

6 « ‹Ayaw gooppe, Ubbaa Mooddiyaa Med’inaa Goday hawaadan yaagee; «Hintte Israa’eeliyaa bashshaan kushiyaa bak’k’eedda diraw, guppeedda dirawunne nashettiide k’iliic’eedda diraw, 7 taani hintte bolla ta kushiyaa yeddaad. Hinttena kawutetsatoo omooduwaa ootsaade immana. Taani hinttena asaa giddoppe shoddana; kawutetsatuwaa giddoppekka d’ayissana. Taani Med’inaa Godaa gidiyaawaa hintte hewan erana» yaagee.

Moo’aaba Biittaa Bolla Odetteedda Timbbitiyaa

8 « ‹Ubbaa Mooddiyaa Med’inaa Goday hawaadan yaagee; «Moo’aabinne Se’iiri, be’ite, Yihuday hara kawutetsatuwaa mala yaageedda diraw,✝25:8-11 Isa. 15:1—16:14; 25:10-12; Erm. 48:1-47; Amo. 2:1-3; Sof. 2:8-11 9 taani Moo’aaba biittaa bollan gelaade; woraajjaade Aa zawaa naagiyaa, Beeti-Yashimoota, Ba’aali-Ma’oonanne K’iriyaatayima geetettiyaa, eretteedda katamatuwaa d’ayissana. 10 Hawaappe sintsanaw Amoonatuwaanakka gujjaade, unttunttu kawutetsatuwaa giddon hassayettennaadan, taani unttuntta away doliyaa bagga biittaappe yeedda asatoo duretaadan aatsaade immana. 11 Taani Moo’aaba pirddana. He wode Taani Med’inaa Godaa gidiyaawaa unttunttu hewan erana» yaagee.

Eedooma Biittaa Bolla Odetteedda Timbbitiyaa

12 « ‹Ubbaa Mooddiyaa Med’inaa Goday hawaadan yaagee; «Eedoomatuu Yihudaa bolla haluwaa keseedda dirawunne daro bayzzanchcha gideedda diraw,✝25:12-14 Isa. 34:5-17; 63:1-6; Erm. 49:7-22; Hiz. 35:1-15; Amo. 1:11-12; Abd. 1-14; Mil. 1:2-5 13 taani Ubbaa Mooddiyaa Med’inaa Goday ta kushiyaa Eedooma bolla yeddana. An de’iyaa asaanne mehiyaa mule d’ayissana; d’ayissaade mela kessana. Temaana katamaappe biide, Dadaana katamaa gakkanaw, unttunttu mashshaan busakettana. 14 Taani Eedoomaw ta asaa Israa’eeliyaa baggana haluwaa kesana. Israa’eelatuu unttunttu bolla ta hank’k’uwaanne ta hank’k’uwaa keeshshaa ootsana. Taani haluwaa keseeddawaa unttunttu erana. Taani Ubbaa Mooddiyaa Med’inaa Goday hawaa oday» yaagee.

Piliss’s’eematuwaa Bolla Odetteedda Timbbitiyaa

15 « ‹Ubbaa Mooddiyaa Med’inaa Goday hawaadan yaagee; «Piliss’s’eematuu barenttu wozanaa iitatetsan haluwaa keseedda dirawunne gam"eedda morkketetsaan Yihudaa kad’iide d’ayissanaw koyeedda,✝25:15-17 Isa. 14:29-31; Erm. 47:1-7; Iyu. 3:4-8; Amo. 1:6-8; Sof. 2:4-7; Zak. 9:5-7 16 hewaa diraw Ubbaa Mooddiyaa Med’inaa Goday hawaadan yaagee; taani ta kushiyaa Piliss’s’eematuwaa bolla yeddaade Keliitawetuwaa k’ans’s’ana. Taani unttunttanne abbaa doonaan atteedawantta ubbaa d’ayissana. 17 Taani unttunttoo wolk’k’aama haluwaa kesana; ta hank’k’uwaan unttuntta murana. Taani unttunttoo haluwaa kesiyaa wode, taani Med’inaa Godaa gidiyaawaa unttunttu erana» yaagee› yaaga» yaagiidde yeedda.