1 Sammeela 31

Saa’ooli Barena Wod’eedda

1 Piliss’s’eema asatuu Israa’eeliyaa asatuwaana oletteeddino; Israa’eeliyaa asatuu Piliss’s’eema asatuwaa sintsaappe bak’atteedino; daro Israa’eelatuu Gilbboo’a Deriyan hayk’k’eeddino. 2 Piliss’s’eema asatuu Saa’oolanne Aa attumawaa naanaa yederssi gakkiide, Saa’oola naanaa Yoonataana, Abinaadaabanne Malkkishuu’a wod’eeddino. 3 Olay Saa’oola yuuyyi aad’d’iide un"etseedda; wonddaafiyaa asatuu Aa demmeedda wode, zubbiyaan Aa c’addiide, loytsi mayttiseeddino.

4 Saa’ooli bare ola miishshaa tookkiyaawaa, «Ha k’as’s’arettibeennawanttu yiide, taana c’addiide kaa’ennaadan, ne mashshaan c’addaade, taana neeni wod’a» yaageedda.

Shin Aa ola miishshaa tookkiyaawe loytsi yayyeedda diraw is’s’eedda; Saa’ooli bare mashshaa sa’aan essiide, Aa bolla kunddeedda. 5 Aa ola miishshaa tookkiyaawe Saa’ooli hayk’k’eeddawaa be’iide, ikka bare mashshaa sa’aan essiide, Aa bolla kunddiide, Saa’oolanna hayk’k’i aggeeda. 6 Hawaadan haniide, Saa’oolinne Aa naanay heezzatuu, Aa ola miishshaa tookkiyaawenne Aa asatuu ubbay he gallassaa ittippe hayeeddino.

7 Wombbaappenne Yorddaanoosa Shaafaappe hefintsa baggana de’iyaa Israa’eeliyaa asatuu Israa’eeliyaa olanchchatuu bak’ateeddawaanne Saa’oolinne Aa naanay hayk’k’eeddawaa be’iide, unttunttukka barenttu katamaa aggiide bak’atteedino. Piliss’s’eema asatuu yiide, he katamatuwaa oyk’k’eeddino.

8 Wonttetsa gallassi Piliss’s’eematuu anhatuwaa bollaappe ola miishshatuwaa k’aari akkanaw yiide, Saa’oolinne Aa naanay heezzatuu Gilbboo’a Deriyan hayk’k’iidde giseeddawantta demmeeddino. 9 Unttunttu Saa’oola k’ood’iyaa muuc’eeddinonne Aa ola miishshaa k’aari akkeeddino. Yaatiide barenttu d’amaashatuwaa golleninne barenttu asaa giddon s’oonuwaa awaayana mala, Piliss’s’eema biittaa ubbaw kiitaa yeddeeddino. 10 Saa’oola ola miishshaa Asttaaroota geetettiyaa unttunttu s’oossatti golliyaa giddon wotseeddino; Saa’oola anhaa Beetishaana geetettiyaa katamaa gimbbiyaan misimaariyan d’ishiide sotteeddino.

11 Piliss’s’eema asatuu Saa’oola ootseeddawaa Gala’aaden de’iyaa Yaabeesha asatuu siseedda wode, 12 unttunttu mino asatuu ubbay k’amman denddi biide, Saa’oola anhaanne Aa naanatuwaa anhaa Beetishaana katamaa gimbbiyaappe wotsi akkiide, Yaabeesha katamaa ahiide yaan s’uuggeeddino. 13 Hewaappe guyyiyaan, unttunttu mek’etsaa mas’i akkiide, Yaabeeshan de’iyaa tamaariskka geetettiyaa mitsaa garssan moogeeddino; yaatiide laappun gallassaa s’oomeeddino.