1 Sammeela 14

Yoonaataani Piliss’s’eematuwaa Bolla Woraajjeedda

1 Itti gallassi Saa’oola na’ay Yoonaataani bare ola miishshaa tookkiyaa wodallaa hawaadan yaageedda; «Haaya; hefintsa baggan de’iyaa Piliss’s’eematuu shiik’k’eedda sa’aa ane boytte» yaageedda. Shin bare aawoo ha yewuwaa odibeenna.

2 He wode Saa’ooli Gib’aa matan Migiroonan, roomaanne geetettiyaa mitsaa garssan de’ee. Aanana usuppun s’eetu asatuunne 3 eefuudiyaa mayyeedda k’eesii, Akiiyi de’iino. Akiiyi Ikaabooda ishaanne Ahis’uuba na’aa; Ahis’uubi Seelon Med’inaa Godaa k’eese gideedda Eeliya na’ay Piinihaasi yeleeddawaa. Yoonaataani bi kichcheeddawaa Asay eribeenna.

4 Yoonataani Piliss’s’eematuu shiik’k’eedda sa’aa gakkanaw pinnanaw k’oppiyaa pinuwaassi laa"u baggaanakka s’eeray s’in"i geedda wolk’k’aama zaallatuu de’iino; ittuwaa suntsay Bodees’a; laa’entsuwaa suntsay Seena. 5 Zaallatuwaappe ittuu pinniyaasaa huup’issa baggana Mikimaasaw sintsanna de’iyaa wode, ittuu k’ay gedissa baggana Gebaa’aw sintsanna de’ee.

6 Yoonaataani bare ola miishshaa tookkiyaa wodallaa hawaadan yaageedda; «Haaya; ha k’as’s’arettibeennawanttu shiik’k’eedda sa’aa ane hefintsa boytte. Ooni erii, Med’inaa Goday nu diraw ootsanenttonne; Med’inaa Goday daro asan gidina, guutsa asan gidina, ashshanawaa Aa diggiyaabay ayaynne baawa» yaageedda.

7 Aa ola miishshaa tookkiyaawe, «Neeni k’oppeeddawaa ubbaa ootsa; ba; ta kumentsaa wozanaappe taani neenana de’ay» yaageedda.

8 Hewaappe guyye Yoonaataani, «Yaanooppe haaya; hefintsa asaakko pinniide, asan be’ettana. 9 Unttunttu nuuna, ‹Nuuni hinttenttukko baanaw hewan naagite› yaagooppe, nuuni de’iyaa sa’aan takkanaappe attina, unttunttukko bookko. 10 Shin unttunttu, ‹Haa nuukko pude kesite gooppe, nuuni pude kessana; ayaw gooppe, hewe Med’inaa Goday unttuntta nu kushiyan aatsiide immeeddawoo nuw malaataa gidana› » yaageedda.

11 Yaatina, laa"atuukka Piliss’s’eematuwaa geesotuwaa barentta besseeddino. Piliss’s’eematuu, «Be’ite! Ibraawetuu barenttu k’osetteedda ollaappe zuummiide kesiino» yaageeddino. 12 Hewaappe asatuu Yoonaataananne ola miishshaa tookkiyaawaa s’eegiide, «Haa nuukko pude kesite; nuuni hinttentta bessana» yaageeddino.

Hewaa diraw, Yoonaataani bare ola miishshaa tookkiyaawaa, «Taana kaalaade ha pudetsaa kesa. Med’inaa Goday unttuntta Israa’eeliyaa kushiyan aatsiide immi diggeedda» yaageedda.

13 Yoonataani bare ola miishshaa tookkiyaawaa kaaletsiide, gediyaaninne kushiyan hambburuuc’iide pudetsaa kesseedda. Piliss’s’eematuu Yoonaataana kushiyan kunddeeddino; Aa ola miishshaa tookkiyaawe kaalli kaalliide unttuntta wod’eedda. 14 He koyro woraajjuwaan Yoonataaninne Aa ola miishshaa tookkiyaawe itti goshsha gaden laatamu gidiyaa asaa wod’eeddino. 15 Hewaappe guyyiyaan, gas’aa biittan de’iyaa Piliss’s’eema asatuu dagammeeddino; k’oppenawaa oliyaawanttunne heeraan de’iyaa olanchchatuu yashshaw kokkoreeddinno. Biittaykka k’aas’s’eedda; hewenne, S’oossaappe kiitetteedda dagamaa.

Piliss’s’eematuwaa S’oonettussaa

16 Saa’ooli Biiniyaama biittan, Gib"an wotseedda wochchiyaa asatuu s’eelliide, Piliss’s’eema olanchchatuu yaana haana piskki giide laalettiyaawantta be’eeddino. 17 Yaatina, Saa’ooli barenana de’iyaa asatuwaa, «Ane olanchchatuwaa shiishshite; nu giddoppe ooni beeddinontto be’ite» yaageedda. Unttunttu shiishshiide paydiyaa wode, Yoonaataaninne Aa ola miishshaa tookkiyaawe baynnaawaa be’eeddino.

18 Saa’ooli k’eesiyaa Aakiya, «S’oossaa oochchanaw ane eefuudiyaa haa akkaade ya» yaageedda. He wode Aakii Israa’eeliyaa asaa sintsan eefuudiyaa mayyee. 19 Saa’ooli k’eesiyaana haasayishin, Piliss’s’eematuwaa heeraan walassay dari dari beedda. Hewaa diraw, Saa’ooli k’eesiyaa, «Eefuudiyaappe ne kushiyaa kessa digga» yaageedda.

20 Hewaappe guyyiyaan, Saa’oolinne Aa Asay ubbay shiik’iide, olaa beeddino. Piliss’s’eema asatuu ubbay shabbirettiide, barenttu mashshaan ittuu ittuwaa busakkiidde de’iyaawantta demmeeddino. 21 Kase Piliss’s’eema asatuwaana de’iidde, unttunttunna pude unttunttu shiik’k’eedda sa’aa beedda. Ibraawatuukka unttuntta aggiide, Saa’oolannanne Yoonaataananna de’iyaa Israa’eeliyaa asan gaketeeddino. 22 Efireema gezziyaan k’osetti utteedda hara Israa’eelatuukka Piliss’s’eematuu bak’atiidde de’iyaawaa siseeddino. Unttunttukka yederssuwaa uukkiyaa asan gaketeeddino. 23 Med’inaa Goday he gallassi Israa’eeliyaa asaa ashsheeda. Beeti-Aweena katamaappe hefintsa gakkanawukka olay oletteedda.

Olaappe Simmina Haneeddabatuwaa

24 He gallassi Israa’eeliyaa asatuu koshaan labbaneeddino; ayaw gooppe, Saa’ooli asaa, «Sa’ay k’ammennan de’ishiinanne taani ta morkketoo haluwaa kesennaan de’ishshin, k’uma miyaa uray shek’etteeddawaa gido» yaagiide asaa c’aak’uwaan k’achcheeda. Hewaa diraw, olanchchatuwaappe k’umaa doonaakko shiishsheedda Asay ooninne baawa.

25 Olanchchatuu ubbay ubbaanna wora giddo geliyaa wode, sa’aan eessay de’ee. 26 Unttunttu wora giddon eessay goggiyaawaa be’eeddino; shin c’aak’uwaa yayyeedda diraw, itti asaynne bare kushiyaa doonaakko shiishshibeenna. 27 Shin Yoonaataani bare aawuu asaa c’aak’uwaan k’achcheeddawaa sisibeenna. Hewaa diraw, bare kushiyan de’iyaa s’am"aa s’eeraa ililuwaan yeddi kessiide, laac’c’eedda; Aa ayfii dooyetteedda. 28 Hewaappe guyyiyaan, olanchchatuwaappe ittuu Aa, «Ne aawuu olanchchatuwaa ubbaa, ‹Hachchi k’uma miyaa uray shek’etteeddawaa gido› yaagiide, c’aak’uwaan k’achchi wotseedda; Asay ubbay labbaneeddawe hawaassa» yaageedda.

29 Hewaappe guyye Yoonataani hawaadan yaageedda; «Ta aawuu biittaw meto med’d’eedda. Taani ha eessaappe laafa laac’c’ina ta ayfii ay keeshshaa dooyetteeddentto be’a. 30 Asay bare morkkatuwaappe omoodeeddawaappe hachche meeddabaa gidintto, ayba lo"ee shin; unttunttu wod’ana Piliss’s’eematuwaa payduukka ay keeshshaa daranawaa shin» yaageedda.

31 He gallassi Israa’eeliyaa asatuu Mikimaasappe Ayaaloona gakkanaw, Piliss’s’eematuwaa shoc’i simmiide daabureeddino. 32 Unttunttu omooduwaa gawuhayiide, dorssatuwaa, miizzatuwaanne maratuwaa akkeeddino; biittan c’oo shukkiide, suutsaanakka meeddino. 33 Hewaappe guyyiyaan, itti Asay Saa’oola, «Be’a; Asay suutsaanna de’iyaa ashuwaa miidde, Med’inaa Godaa bolla nagaraa ootsee» yaageedda.

Hewaappe guyye I unttuntta, «Hinttenttu nagaraa ootseeddita; wogga shuchchaa ellekka haa taakko gonddorssite» yaageedda.✝14:33 Dom. 9:4; Wog. 7:26-27; 17:10-14; 19:26; Zar. 12:16, 23; 15:23 34 Zaaretsiidekka, «Kesiidde asaa giddo biite; unttuntta hawaadan yaagite; ‹Huup’iyaan huup’iyaan hinttenttu booraanne dorssaa taw haa akkiide yiite; yaatiide hawaan wogaadan shukkiide miite. Suutsaanna de’iyaa ashuwaa miide, Med’inaa Godaa bolla nagaraa ootsoppite› yaaga» yaageedda.

Hewaa diraw, he gallassi k’amma asatuu ubbay bare booraa booraa ahiide, yaan shukkeeddino. 35 Saa’ooli he sa’aan Med’inaa Godaw yarshshiyaa sa’aa gimbbeedda; S’oossaw yarshshiyaa sa’aa I gimbbishin, hewe aw koyruwaa.

36 Saa’ooli, «Ha k’ammaana duge Piliss’s’eematuwaa kaalliide ane boytte; sa’ay wonttana gakkanaw, unttunttuwaa ubbaa bonk’k’oytte; unttunttakka ittuwaanne ashshenan wod’oytte» yaageedda.

Unttunttu, «Eeno, neena lo"eeddabaa ubbaa ootsa» yaagiide zaareeddino.

Shin k’eesii, «Ane hawaan S’oossaa oochcheetto» yaageedda.

37 Hewaa diraw, Saa’ooli S’oossaa, «Piliss’s’eema asatuwaa kaalaade boo? Neeni unttuntta Israa’eelatuu kushiyan aatsaade immanii?» yaagiide oochcheedda. Shin he gallassi S’oossay aw odibeenna.

38 Yaatina Saa’ooli, «Olanchchatuwaa kaappatoo, ubbay haayite; hachche ayba nagaray oosetteeddenttonne ane k’oriide demmoytte. 39 Israa’eeliyaa ashshiyaa Med’inaa Goday ero! Ta na’aa Yoonataana gidooppenne, hayk’k’anaw besse» yaageedda. Shin asaappe itti uraynne k’aalaa k’aattibeenna.

40 Hewaappe guyyiyaan, Saa’ooli Israa’eeliyaa asaa ubbaa, «Hinttenttu ubbaykka ya baggan ek’k’ite; taaninne ta na’aa Yoonaataani ha baggan ek’k’ana» yaageedda.

Hewaappe guyye asatuu, «Eeno, neena lo"owaa ootsa» yaageeddino.

41 Hewaappe guyyiyaan, Saa’ooli Med’inaa Godaa Israa’eeliyaa S’oossaa, «Taw likke zaaruwaa imma» yaagiide woosseedda. Saamay Saa’oola bollanne Yoonataana bolla wod’d’ina Asay geeyeedda.✝14:41 Pay. 27:21; 1 Sam. 28:6 42 K’ay Saa’ooli, «Ta bollanne ta na’aa Yoonataana bolla yeggite» yaageedda. Hewaappe guyye saamay Yoonataana bolla wod’d’eedda.

43 Saa’ooli Yoonaataana, «Ane neeni ootseeddawaa oda» yaageedda.

Yoonaataani, «Taani guutsa eessaa ililuwaa ta s’am"aa s’eeraappe laac’c’aad. Hekko taani hawaan de’ay; taani hayk’k’ana» yaageedda.

44 Saa’ooli hawaadan yaageedda; «Yoonaataanaa, neeni hayk’k’ana d’ayooppe, S’oossay taana wod’o!» yaageedda.

45 Shin Asay Saa’oola, «Yoonaataani, Israa’eeliyaw ha wolk’k’aama s’oonuwaa aheedawe hayk’k’anee? Hewe ubbakka hanenna! De’uwaa Med’inaa Goday ero! Aa huup’iyaappe itti binnaanaynne biittan wod’d’enna; ayaw gooppe, I hachche hawaa S’oossaa maaduwaan ootseedda» yaageeddino. Yaatiide Asay Yoonaataana ashshina, I hayk’k’ennan atteedda.

46 Hewaappe guyyiyaan, Saa’ooli Piliss’s’eema asatuwaa yederssiyaawaa aggeeda; unttunttu barenttu gadiyaa simmeeddino.

Saa’oola Kawutetsaanne Aa Soo Asaa

47 Saa’ooli Israa’eeliyaa bolla kaate gidowaappe guyyiyaan, ubbaa ellekka de’iyaa bare morkkatuwaa oleedda; hewanttukka: Moo’aabatuwaa, Amoonatuwaa, Eedoomatuwaa, S’ooba kaatetuwaanne Piliss’s’eema asatuwaa. Bare beedda sa’aan ubbaan s’ooneedda. 48 I minniide oletteedda; Amaaleek’a asatuwaa s’ooneedda; Israa’eeliyaa asaa bonk’k’iyaawanttu kushiyaappe ashsheeda.

49 Saa’oola attuma naanay Yoonaataana, Yishiwiinne Malkkishuu’a; aw bayira naatti suntsay Meraabo; teefa naatti suntsay Miikaalo. 50 Aa machata Ahima’aas’a naatto Ahino’aamo. Aa olanchchatuu gadaaway Aa aawuwaa ishaa Neera na’aa Abaneera. 51 Saa’oola aawuwaa K’iisinne Abaneera aawuwaa Neeri Abii’eela naanaa.

52 Saa’ooli de’eedda laytsaa ubbaan Piliss’s’eema asatuwaana suulo olaa olettiide de’eedda. Mino asaa woy s’ala asaa demmeedda wode ubbaan, I he uraa bare olanchchatuwaan gujjee.