Arca da aliança
A Arca da Aliança era o símbolo mais sagrado de Israel — representava a presença de Deus no meio do seu povo. Sobre ela brilhava a glória do Senhor entre os querubins.
"बाबळ्या ना लाकड़ा नो एक बाक्सो बणावे। तीहयो ढाय हात नाम्बो, अने चवड़ाय अने उचाय डेड़-डेड़ हात नो रेय। अने तीने चोखलु ह़ोनु वेर मोय अने बाहर पालीस करावजे। अने बाक्सा पोर च्यारो-मेर ह़ोनु नी कोर बणावजे। अने ह़ोना ना च्यार कड़ा बणावीन तीना च्यारोव पाया पोर, एक ह़ोड़ बे कड़ा अने बीजी ह़ोड़ बे कड़ा लगाड़जे। अळतेण बाबळ्या ना लाकड़ा ना डींगा बणावजे, अने तीने बी ह़ोनु वेर पालीस करावजे। अने डींगा ने बाक्सा ना बेम ह़ोड़ ना कड़ा मे घालजे, जीनी सी तीनी वेर बाक्सा ने उचले। तीहया डींगा बाक्सा ना कड़ा मेत रेय; अने तीनी गेथा अगळ नी करवा जोवे। अने जे गवा नी चीट्ठी मे तने आपही तीने तीहयात बाक्सा मे मेकजे।
"अळतेण चोखलु ह़ोनु वेर एक पछतावा नु ढाकणु बणावजे; तीहयु ढाय हात नाम्बु, अने डेड़ हात चवड़ु रेवा जोवे, अने ह़ोनु नाखीन बे करुब बणावीन पछतावा ना ढाकणा ना बेम मुंडे लगाड़जे। एक करुब एक मुंडे अने बीजो करुब बीजा मुंडे लगाड़जे; करुबु ने अने पछतावा नु ढाकणु ने एकीत टुकड़ा वेर बणावजे। तीहया करुब ना पाखड़ा उपर गेथा एवा फेलला बणे के पछतावा नु ढाकणु तीमनी सी ढकाय्न रेय, अने तीमना मोडा आम्बा-साम्बा अने पछतावा नु ढाकणु भणी रेय। अने पछतावा नु ढाकणु ने बाक्सा पोर लगाड़जे; अने जे गवा नी चीट्ठी मे तने आपही तीने बाक्सा मे मेकजे।
मे तां तने भेट्या करही; अने ईस्रायली माणहु जुगु जेतरा हुकम तने आपवा ना रेहे, तीमना आखा ना बारा मे पछतावा ना ढाकणान उपर रीन अने तीहया करुब नी वचमे गेथो, जे गवा नी चीट्ठी ना बाक्सा पोर रेहे, तारी ह़ाते वात कर्या करही।
अळतेण बसलेल बाबळ्या ना लाकड़ा नो बाक्सो बणायो; तीनी लम्बाय ढाय हात, अने चवड़ाय डेड़ हात, अने उचाय डेड़ हात नी हती।
अळतेण यहोवा मुसा ने केदो, "पेल्ला मयना ना पेल्ला दाड़े तु भगवान नी हजुरी नु तम्बु ना रेवा ना जागा ने उबो करजे। अने तीनी मे गवा नी चीट्ठी नो बाक्सो मेकीन वचे वाळा पड़दा नी आडळ कर देजे।
अने तीहयो गवा ना पट्या ने लीन बाक्सा मे मेक्यो, अने बाक्सा मे डींगा अटकाड़ीन तीनी उप्पर पछतावा नु ढाकणु ने मेक देदो; अने तीहयो बाक्सा ने रेवा ना जागा मे पुगाड़्यो, अने वचे वाळा पड़दा ने टांगीन गवा ना पट्या ने तीहयो आडळ कर देदो; जे रीते यहोवा मुसा ने हुकम आपलो हतो।
एतरे जत्यार माणहु आह़फाम ना पड़ावा मे गेथा यरदन नंदीन पार जवा करीन नीकळ्या, अने पुंजारा वायदा नु पेटारु उचलीन माणहु नी अगळ-अगळ चाल्या, अने पेटारु ने उचलवा वाळा यरदन नंदीन्तां पुग्या, अने पेटारु ने उचलवा वाळा पुंजारा ना पोगु यरदन ना पाणी मे डुब ज्या यरदन नंदी नु पाणी ते वाडणी नी टेम तक ना आखा दाड़ा मे तीनी धेकड़े गेथु उपर-उपर वया करे, ता जे पाणी उपर गेथु वय्न आवतु हतु तीहयु घण नाम्बे, मतलब आदाम ह़ेर ने तां जे सारतान नी धेड़े से उबु रीन एक ढेर हय ज्यु, अने भीतड़ुन तेम उबु हय ज्यु, अने जे पाणी अराबा नी दर्या जे खारली दर्या बी केवाय, तीनी भणीन हय्न आवतु हतु, तीहयु पुरी रीते ह़ुक ज्यु; अने माणहु यरीहो नी अगळ पार उतर ज्या। अने पुंजारा यहोवा नु वायदा नु पेटारु उचलीन यरदन नंदीन वचा-वच पुगीन ह़ुकला जागा पोर एक जागे उबा र्या, अने आखा ईस्रायली माणहु ह़ुकला जागा पोरेत चालीन पार उतरता र्या, आखरी मे तीहयी आखी जाती ना माणहु यरदन नंदीन पार हय ज्या।
जेमेत यहोवा भगवान ना वायदा नु पेटारु ने उचलवा वाळा पुंजारा यरदन नंदी नी वचमे गेथा नीकळ आया, अने तीमना पोगु ह़ुकला जागा पोर पड़्या, तत्यारुत यरदन नंदी नु पाणी तीमना जागा पोर आय पड़्यु, अने पेलेन तेम धेकड़ पोर माय्न वयवा बाज ज्यु।
यरीहो ना आखा झापला ईस्रायली माणहुम ना बीक ना कारण सी लगातार देदला र्या, अने कोय बी मोय अने बाहर आय-जाय नी सकत्ला। अळतेण यहोवा यहोसु ने केदो, "ह़मळ, यरीहो ने तीना राजा अने तीना झुमायण्या भेळ तारा हक मे कर देम। एतरे तमारी मे जेतरा झुमायण्या से ह़ेर ने घेरवी लेवो, अने तीहया ह़ेर नी च्यारो-मेर एक वार फीरी आवे। अने छो दाड़ा तक एमेत कर्या करजे। अने ह़ात पुंजारा मोट्लु पेटारु नी अगळ-अगळ गाडरा ना ह़ींगड़ा ना ह़ात फेपार्या लीन चाले, अळतेण ह़ातवा दाड़े तमु ह़ेर नी च्यारो-मेर ह़ात काव फीरजो, अने पुंजारा फेपार्या बी वगाड़ता चाले। अने जत्यार तीहया गाडरा ना ह़ींगड़ा ना फेपार्या ढेरेत वार वगाड़ता र्या, ता आखा माणहु फेपार्या नी अवाज ह़मळतेत उची अवाज मे जयजयकार करे; ता ह़ेर नु भीतड़ु नीव पोर गेथु पड़ जहे, अने आखा माणहु आपणी-आपणी अगळ ह़ुदा ह़ेर मे जत रेय।" एतरे नुन नो सोरो यहोसु पुंजारा ने बोलावीन केदो, "वायदा नु पेटारु ने उचल लेवो, अने ह़ात पुंजारा यहोवा नु मोट्लु पेटारु अगळ-अगळ गाडरा ना ह़ींगड़ा ना ह़ात फेपार्या लीन चालो।" अळतेण तीहयो माणहु ने केदो, "अगा जाय्न ह़ेर नी च्यारो-मेर फीरी आवो; अने हत्यार लेदला अदमी यहोवा नु मोट्लु पेटारु अगळ-अगळ चालो।"
ता माणहु जय-जयकार कर्या, अने पुंजारा फेपार्या वगाड़ता र्या। अने जत्यार माणहु फेपार्या नी अवाज ह़मळ्या ता अळतेण ज्योरेत अवाज सी तीहया जय-जयकार कर्या, ता भीतड़ु नीव पोर गेथु पड़ ज्यु, अने माणहु आह़फा-आह़फाम नी अगळ गेथा तीहया ह़ेर मे चड़ ज्या, अने ह़ेर पोर हक जमाड़ लेदा।
तीहयी पेल्नी बोली मे बी उपाह़ पाळवा ना कायदा हता, अने ईसम चोखलो जागो हतो जे आहयी कळी नो हतो। एक तम्बु बणावला हता, जीना पेल्ना कोपरा मे दीवलाय अने भगवान ने भेट करवा ना रोट्ला हता; अने तीहयो चोखलो जागो केवायतो हतो। बीजा पड़दा पसळ एक अळी कोपरो हतो, जे घणो वारु चोखलो जागो केवात्लो हतो। आनी मे वारु गंदायण्या धुप नी लेदे ह़ोना नी वेदी, अने च्यारो-मेर ह़ोना सी बणलु पेटारु हतु आहया पेटारा मे मन्ना सी भरलु ह़ोना नु ठाहरु हतु अने हारुन नी लाकड़ी जीनी मे डीरा नकळ्ळा हता अने बे दगड़ा जीनी पोर बे हुकम लीखला हता। तीमनी उपर बेम भबळवा वाळा ह़रगदुत हता, जे पाप नी माफी ना जागा पोर साहळो करला हता; ईमनु एक-एक करीन देखाड़वा नी टेम नी हय।
ता जे भगवान नो मंदीर ह़रग मे से, तीने उगड़्या, अने तीहया मंदीर मे तीना वायदा नु पेटारु देखाव पड़्यु; अने वीजळी अने अवाज अने वादळु नी गाज अने भुकम्प हया अने मोट्ला गारा पड़्या।