1 तमु जे पुराणा से, मे तीमनीन तेम पुराणो अने मसी ना दुख नो गवा अने उजन्‌ती हयवा वाळी बड़ाय मे साजल्‌या बणीन तीमने आहयु ह़मजाड़ु। 2 ✝भगवान ना तीहया मेळा नी रखवाळी करो जे तमारा वच मे से, पण दबाव सी नी पण भगवान नी मरजी ना लारे खुसी सी, पय्‌हा ना लेदे नी पण मन लगाड़ीन। 3 जे माणहु तमने ह़ोप मेल्‌या तीमनी पोर हक ना जमाड़ो, पण मेळा ना लेदे ईज्‌जत बणो। 4 जत्‌यार डायलो रखवाळ्‌यो आवहे, ता तमने बड़ाय नी पागड़ी जड़हे तीनी चमक कदी खत्‌तम नी हये।

5 आहयीत रीते ए जुवान्‌या तमु बी पुराणा ना हक मे रेवो अने तमु आखान-आखा एक-बीजा नी सेवा जुगु भोळाय सी केड़ बांदीन रेवो, काहाके "भगवान घमंड करन्‌या नो वीरोद करे, पण भोळा पोर दया करे।" 6 ✝आनीन करते भगवान ना ताखत वाळा हात तळे भोळाय सी रेवो, जीनी सी तीहयो तमने संय टेमे वदाड़हे। 7 आपणी आखी चीन्‌ता भगवान पोर सोड़ देवो, काहाके तीने तमारी फीकर से।

8 चेतीन रेवो, अने ह़मळीन रेवो; काहाके तमारो वेरी भुतड़ो डोखारवा वाळा नाहर ने तेम आहयी ह़ोद मे रेय के कोयने फाड़ीन खाम। 9 भरहा मे मजबुत हय्‌न, अने आहयु जाणीन तीनो सामनो करो के कळी मे आसमेत बीजा मसी भाय बी दुख झेल र्‌या। 10 हाव भगवान जे आखी संयबरकत नो डायलो से जे तीहयो तमने मसी मे आह़फा नी अमरकाय नी बड़ाय जुगु बोलावलो से, तमने थोड़ीक वार तक दुख झेलवान बाद आह़फोत तमने नामह़ाद्‌या अने वातड़ा ताखत वाळा बणावहे। 11 आखी चीज पोर तीनो हक सदा रेवा जोवे। आमीन।

12 ✝मे सीलवानुस नी लारे जीने मे भरहो करे एवो भाय ह़मजु, आखी वात ने लीखीन ह़मजाड़लो से, अने आहयी गवाय देदो के भगवान नी खरली संयबरकत आहयी से, आनीत मे टेकला रेवो।

13 ✝जे बेबीलोन देस मे तमारीन तेम टाळला से, तीहया माणहु अने मारो सोरो मरकुस तमने आवही अने आवजो केय।

14 एक-बीजा ने मसी मोंग सी गळे लगाड़ो, तमने आखा ने जे मसी मे से सांती जड़े।