13 Hewaa diraw, S’oossay Noha hawaadan yaagiide azazeedda; «Taani asaa ubbaa d’ayssana hanay; unttunttu gaasuwaan sa’ay makkalan kumeedda diraw, taani tumuppe asaakka sa’aakka d’ayssana. 14 Hewaa diraw, mino mitsaappe new markkabiyaa kees’s’a; he markkabiyaa giddon c’ora k’ol"otuwaa kessa; yaataade soonnanne karenna shidiyaan bara. Noha Markkabiyaa 15 Markkabiyaa hawaadan yaataade kees’s’a; adussatetsaa heezzu s’eetu wad’aa, gomppaa ishatamu wad’aa, geesaa hattamu wad’aa ootsa; 16 markkabiyaw kaaraa* med’d’a; kaaraappenne godaappe gidduwaan itti wad’aa gidiyaa sa’aa kallo agga basha; penggiyaa markkabiyaw miyiyaanna kessa; markkabiyaa heezzu pook’iyaa kessaade kees’s’a.

1 Med’inaa Goday hewaappe guyye Noha hawaadan yaageedda; «Neeni ne soo asaa ubbaanna markkabiyaa giddo gela; ayaw gooppe, taani ha wodiyaa yeletaa giddon neeni s’illo gideeddawaa be’aaddi.

7 Nohe, Aa attuma naanay, Aa machatanne Aa naanaa machchetuu bashshaa haatsaappe attanaw markkabiyaa giddo geleeddino.✝ 8 Geeshsha mehiyaappenne do’aappe, geeshsha gidenna mehiyaappenne do’aappe, kafuwaappenne biittaana gooshettiyaawanttu ubbaappe 9 S’oossay Noha azazeeddawaadankka attumawenne mac’c’awe laa"uwaa laa"uwaa gidi, Nohekko yiide markkabiyaa giddo geleeddino. 10 Laappun gallassaappe guyye, bashshaa haatsay ha sa’aa bollan yeedda.

16 S’oossay Noha azazeeddawaadan, med’etaa ubbaappe attumawaanne mac’c’awaa gidiide, markkabiyaa giddo geli simmowaan, Med’inaa Goday markkabiyaa penggiyaa gorddeedda.

17 Bashshaa haatsay oytamu gallassaa sa’aa bollan bukkiidde gam"eedda; haatsay dariide, markkabiyaa biittappe pude dentseedda. 18 Haatsay biittaa bollan loytsi darina, markkabii haatsaa bollan tooketteedda.

23 Ha sa’aan pas’a de’iyaabay ubbay: asay, mehiinne do’ay, biittaana gooshettiyaa med’etatuunne saluwaa kafotuu ubbaykka sa’aappe d’ayeeddino. Nohe s’alalaynne aanana markkabiyaa giddon de’iyaawanttu atteeddino.

3 Yaatina haatsay wod’d’i wod’d’i beedda. He s’eetanne ishatamuntsa gallassaappe guyye, haatsay wod’d’eedda. 4 Haatsay wod’d’ina markkabii laappuntsa aginaan, tammanne laappuntsa gallassan Araaraate giyaa deretuwaa bolla utteedda.

6 Oytamu gallassaappe guyye, Nohe bare kees’s’eedda markkabiyaa maskkootiyaa dooyyeedda; 7 yaatiide itti k’uuruwaa kare yeddina; k’uuruu haatsay biittaa bollappe melana gakkanaw, yaanne haanne paalliidde gam"eedda. 8 K’ay Nohe haatsay biittaa bollappe wod’d’i wureeddenttonne be’anaw itti harap’p’atto kare yedeedda; 9 shin he harap’p’atta haatsay biittaa ubbaa bollan ha"ikka de’iyaa diraw, shemppiyaa sa’aa demmabeykku. Hewaa diraw simmaade, markkabiyaa giddon de’iyaa Nohekko yaaddu; I bare kushiyaa yeddiide, barekko markkabiyaa giddo akkeedda.

10 Hewaappe guyye, hara laappun gallassaa gam"iide, Dogomatto zaariidekka markkabiyaa giddoppe kessiide yeddeedda. 11 He harap’p’atta sa’ay omarssiyaa wode aakko simmaade yaaddu; wogaraa malatiyaa mitsaappe duutseedda irs’s’a haytsaa bare doonaan sa"a akkaade yaaddu. Hewaa diraw, haatsay biittaa bollappe wod’d’eeddawaa Nohe ereedda. 12 K’ay Nohe hara laappun gallassaa gam"iide, he harap’p’atto zaaretsiide yedeedda; shin he harap’p’atta aakko simmaade yabeykku.

13 Nohe usuppun s’eetanne itti laytsaa de’ina, koyro aginaan koyro gallassi, haatsay biittaa bollappe s’i"eedda; Nohe markkabiyaa k’um"iyaa dooyi s’eelliide, biittay s’i"eeddawaa be’eedda.

15 S’oossay he wode Noha hawaadan yaagiide azazeedda; 16 «Neeni ne machchatto, ne attuma naanaanne ne naanaa machatuwaa akkaade markkabiyaa giddoppe kesa. 17 Unttunttu yelettiide, dariide c’orana mala, shemppuu de’iyaa med’etaa ubbaappe neenana de’iyaawantta: kafotuwaa, mehetuwaa, do’atuwaanne biittaana gooshettiyaa ubbaa neenana kessa» yaageedda.

8 Hewaappe guyye, S’oossay Nohanne aanana de’iyaa Aa attuma naanaa, 9,10 «Simmi ha"i, taani ta c’aak’uwaa hinttenana, hintteppe guyye hinttenttu zeretsaannanne pas’a neenana de’iyaa med’etaa ubbaanna c’aak’k’etay; ee, taani ta c’aak’k’uwaa kafuwaanna, mehiyaanna, sa’aa do’aa ubbaananne, markkabiyaappe hinttenana keseedda, shemppuwaanna de’iyaa med’etaa ubbaanna c’aak’k’ay. 11 Taani hinttenana ta c’aak’k’uwaa c’aak’k’etay; hawaappe sintsan shemppuu de’iyaabay ubbay bashshaa haatsaan ubbakka bayenna; ha sa’aa bayzziyaa haatsay hawaappe sintsan ubbakka de’enna» yaageedda.

13 taani ta zuluwaa shaariyaan essaad; I taappenne ha sa’aappe gidduwaan de’iyaa c’aak’k’oo mallaa gidana.

7 Nohe be’anaw danddayenna sintsaappe hananabaw S’oossay, «Neena naaga» giina, S’oossaw yayyiide, barenanne bare soy asaa ashshanaw markkabiyaa med’d’eeddawe ammanuwaana; yaatiide hewaan ha sa’aa bolla pirddiide, ammanuwaan beettiyaa s’illotetsaakka S’oossaappe akkeedda.✝

20 He ayyaanatuu amareeda, hosppun asatuu haatsaan atteedda markkabiyaa Nohe kees’s’ishshin, S’oossay danddayiide gam"eedda wode, S’oossaw azazettibeena asaa ayyaanatuwaa.✝ 21 Hewe s’ink’k’ataw leemisuwaa gidiide, hinttena ha"i ashshee; suure wozanaappe S’oossaa woossiyaawaappe attin, bollaa k’itaa meec’c’iyaawaa gidenna; hewe hinttena Yesuusi Kiristtoosi hayk’uwaappe denddeeddawaan ashshee. 22 Saluwaa biide S’oossaappe ushechcha baggan I uttiide, kiitanchchaa ubbaa, maataanna de’iyaawanttanne wolk’k’aamatuwaa mooddee.

37 Ta yuussay, Asaa Na’aa yuussay, Nohe wode hanowaa mala gidanawaa.✝ 38 Ayaw gooppe, bashshaa haatsaa yuussaappe kase wode, Nohe markkabiyaan geleedda gallassay gakkanaw, Asay meenne usheenne; k’ay attuma Asay akkeenne mac’c’a Asay asinaa gelee. 39 Bashshaa haatsay yiide, unttuntta ubbaa afana gakkanaw, unttunttu akeekibeykkino; taani, Asaa Na’ay, yiyaa wodii, hewaa mala gidanawaa.✝

40 «He wode laa"u asatuu gaden ootsiyaawanttuppe ittuwaa afana; ittuu attanawaa. 41 Laa"u mac’c’awanttu wos’aan gaac’c’iyaawanttuppe ittinno afana; ittinna attana.