13 Kliso Owusoso Akaa etseɖe Noa asɛ, "ɛba bu banɔnɔ petee ɛkpã oyinɔ, ɔmɔsɛ kanɔnɔ nyɔɔ eyuku nɛ̀ kɛtakpumɛ gagãlĩ ebui nɛ anɔdzrame shu so. Ɛbazĩ balɛ petee nɛ̀ kesiakpa gɛ kɛtɛba tsyina. 14 Kliso bhɛtɛ aɖaka ohu, bu beevũ nɛ yɛmɛ, tɛ ɔlɔkɔ kɛmɔ̃ odeɖe yɛ mɛ nɛ̀ yɛishuɔ piapii. 15 Kana gɛ ɛpɛ ɔsɛ ɔbhɔ bɔlɛ naalɛ; Aɖaka ohuɔ tidzedze mɛ zã asɛ ɛhɔɛ alafa taalɛ nɛ̀ afɛeti, bɔlɛ tɛnɛnɛɛ mɛ tsyɛ zã ɛhɔɛ afɛtegegene nɛ̀ teeti tɛ bɔlɛ tɛɖaɖama mɛ zã ɛhɔɛ afɛtaalɛ nɛ̀ teeti. 16 Wa bɔlɛ, tɛ ɔkpɛ fɛsrɛ nɛ bɔlɛ ishu. Kpɛ opupu nɛ aɖaka ohuɔ nɛ yɛwɔã tɛ obu kesi ɔzã ɔkɔ, kishitɛbhà ɔzãkɔ nɛ̀ adamɛ ɔzãkɔ.

1 Kɛlɛ Apaleteɛ etseɖe Noa asɛ, "Tsoku aɖaka nɔ mɛ, wɔ nɛ̀ wɔ bɔpaã ɔmɔsɛ ɛmɔ wɔ anɔ gɛ aabhɛtɛ kibui nɛ kɛlɛ ɔzãkɔ nɛ oboeyiɛ nɛishi.

7 Kɛlɛ Noa nɛ̀ yɛ beyianyɛ nɛ̀ yɛedziniɛ nɛ̀ yɛ beyianyɛ balɛ edzinì alɛ betsoku aɖaka nɔ mɛ tɛ bebu balɛ ɛkpã eyinɔ nɛ budekeliɛ mɛ. 8 Bagã gɛ balɛ ishu bhui nɛ̀ bagɛ balɛ ishuɔ gɛibhui taabha, gɛenu bɔzhɔɛ nɛ̀ bagã kanyia ka ɛdi gɛetsì nɛ kesiakpa nabha, 9 enyè nɛ̀ adzɛ baba Noa ɔkɔ kɛlɛ betsoku aɖaka nɔ mɛ asɛ gɛ Owusoso Akaa akɔ Noa ɔsha ana. 10 Kɛlɛ nɛ ewui tegegene edeɛ, budekelĩɛ ba kesiakpa nabha.

16 Baagã ediediɛ gɛ betsokuɔ edzì enyè nɛ̀ badzɛ odenɔ baagã gɛ balɛ nɛkpã asɛ gɛ Owusoso Akaa atɔɖɔ akɔ Noa ana. Kɛlɛ Apaleteɛ adã opupuɔ akpii.

17 Nɛ ewui afɛtaalɛ mɛɛ, budekelĩɛ zikpè tɔɖɔ kesiakpa nabha, kɛlɛ gɛ buliɛ zikpe tɔɖɔɔ, bufeke aɖaka nɔ wunɔ nɛ kesiakpa nabha. 18 Buliɛ ebekpè kɛlɛ buyukù nɛ kesiakpa nabha, kɛlɛ aɖaka nɔ alɔasra nɛ budekelĩ nabha.

23 Agã kanyiaka ɛdi gɛ azã kesiakpa nabhaa ebetsí, banɔdzrame nɛ̀ baagaã nɛ̀ baagã gɛetsì nɛ kesiakpa nabha nɛ̀ bɔzhɔɛ nɔ gɛ kpasɛ kɛlɛɛ nɔ mɛ betsí nɛ kesiakpa nabha. Noa nɛ̀ bagɛ bazã yɛɔbha nɛ aɖaka nɔ mɛ yɛete balɛ atɔ.

3 Kɛbɔɛbɔɛ bulĩɛ batsì nɛ kesiakpa nabha. Nɛ ewui alafa zɛzɛ nɛ̀ afɛeti edeɛ, buliɛ bazhyi kesi, 4 kɛlɛ nɛ kiwui gegenemiɛ nɛ woele gegenemiɛ nabhaa, aɖaka nɔ abadɔ Aɖaɖat beetu nabha.

6 Nɛ ewui afɛtaalɛ edeɛ, Noa adalɛ fɛsrɛ nɔ gɛ ebu nɛ aɖaka nɔ shuɔ 7 kɛlɛ ebu kipleke asɛsɛ, kɛlɛ ezepruru pɛ avɛ pɛ aba ɔvɛnɔ ɔsɛ gɛ bulĩɛ batsì nɛ kesiakpa nabha. 8 Kɛlɛ sɛsɛ abronimɛ tɛ̀ etì asɛ bulĩɛ titsì beke nɛ kesiakpa nabha dza. 9 Pɔ gɛ abronimɛ nɔ agɛmɔ ɔkɔ nanà tɛ̀ edzu yɛtsɛɖɛ, ɔmɔsɛ bulĩɛ yukù kesiakpa petee abha, klisoɔ etsyina aba Noa ɔkɔ nɛ aɖaka nɔ mɛ. Akpɛ yɛɔhɔɛ asɛsɛ pɛ anyanà abronimɛ nɔ kɛlɛ edzinì yɛ amanà yɛɔbhà nɛ aɖaka ohu nɔ mɛ. 10 Noa azã epo ewui tegegene aplɛnɔ, kɛlɛ aza sɛsɛ abronimɛ nɔ odenɔ aɖaka nɔ mɛ. 11 Gɛ abronimɛ nɔ etsyina aba yɛɔkɔ nɛ ɔwlagoɔ mɛɛ, bɔbɔ busi kɛwɔlakpa gɛ bapɔ̃ avɔvɔɔ azã yɛolugbùɔ mɛ! Ɛkɛlɛ Noa ebetì asɛ buliɛ titsì beke nɛ kesiakpa nabha. 12 Azã epo ewui tegegene aplɛnɔ kɛlɛ ewuli aza sɛsɛ abronimɛ nɔ, pɔ kibelɛ xɔnɔɔ egetsyina aba yɛɔkɔ.

13 Nɛ kiwuiɛ gɛiputɔ nɛ woele nɔ gɛeputɔ nɛ Noa yɛagɔ alafa teehlo nɛ̀ toliɛ nabhaa, buliɛ tsì nɛ kesiakpa nabha. Kɛlɛ Noa akpà bɔdɔɔ̃ gɛ alɔkɔ edere aɖaka ohuɔ mɛɛ ɛkɛlɛ yɛamɔ asɛ kesiakpa nabha atɛ kpaá.

15 Kidegbaa, Owusoso Akaa etseɖe Noa asɛ, 16 "Koeyì nɛ aɖaka ohuɔ mɛ, wɔ nɛ̀ woedzini, wɔ beyianyɛ nɛ̀ balɛ edzini alɛ. 17 Bu ɛkpã baagã kanyiaka gɛ alɛ wɔbha oyinɔ-bɔzhɔɛ nɔ, baagã nɛ̀ baagã petee gɛetsì nɛ kesiakpa nabha-sɛ tɛ beyuku nɛ kesiakpa nabha tɛ bamɔ be eyi tɛ bekpè atɔɖɔ."

8 Kidegbaa, Owusoso Akaa etseɖe Noa nɛ̀ yɛ beyianyɛ gɛazã yɛɔbha asɛ: 9 "Otsialɛ ɛbhɛtɛ mɛ olugbù nyanyã nɛ̀ wɔnɔ nɛ̀ wɔnɔ bɔmɔɔ gɛ baba nɛ̀ wɔnɔ kihui nɔ 10 nɛ̀ ɛkpã agã kanyiaka gɛazã wɔnɔ ɔbha-bɔzhɔɛ nɔ, kepi baagã, nɛ̀ ayakpa mɛ ayɛ tsyɛ petee, baagã alɛ petee gɛ bekoeyi aplɛnɔ wɔnɔ nɛ aɖaka ohuɔ mɛ-agã kanyiaka gɛ alɛ nɛkpã nɛ kesiakpa nabha. 11 Ɛbhɛtɛ mɛ olugbù nyanyã ɔlɛ nɛ wɔnɔ asɛ; kɛzakà ba ɛlɛ mɛ oɖi ɔsɛ bebè bhui ɛkpã petee abha ɔganà budekelĩ yiyí mɛ; kɛza baɛlɛ mɛ oɖi ɔsɛ budekeli bazĩ kesiakpa."

13 Ɛtɛkpɛ mɛ enegeɛ nɛ ɔmɔlɔɔ̃ nɔ mɛ̀, kɛlɛ badzì kɛwɔ̃ ɔkɔ olugbù nyanyã nɛ mɛ nɛ̀ kesiakpa nɛishi.