1 Kɛlɛ Apaleteɛ etseɖe Noa asɛ, "Tsoku aɖaka nɔ mɛ, wɔ nɛ̀ wɔ bɔpaã ɔmɔsɛ ɛmɔ wɔ anɔ gɛ aabhɛtɛ kibui nɛ kɛlɛ ɔzãkɔ nɛ oboeyiɛ nɛishi. 2 Lɔkɔ agã kanyiaka gɛ yɛishu bhuiɛ balɛ tegegene, enye nɛ̀ adzɛ, nɛ̀ bagã kanyiaka gɛ balɛ ishu gɛibhuiɛ tsyɛ, enye nɛ̀ adzɛ, 3 lɔkɔ bɔzhɔɛ kanyiaka tsyɛ edi tegegene, enye nɛ̀ adzɛ tɛ balɛ idiɛ bazã nɛkpã ɔflanɔ nɛ kanɔnɔ mɛ petee. 4 Ewui tegegene edeɛ odenɔ otsiɛ nɔ, ɛba sɛsɛ subhà nɛ kesiakpa nabha gɛ abadɔ ewui afɛtaalɛ nɛ̀ elishi afɛtaalɛ, kɛlɛ ɛbabu agã kanyiaka ɛdi gɛ ɛbhɛtɛ nɛ kesiakpa nabha petee ɛkpã oyinɔ."

5 Kɛlɛ Noa abhɛtɛ kɛkanyiaka asɛ gɛ Apaleteɛ akɔ yɛɔsha ana.

6 Noa atɛŋã agɔ alafa teehlo nɛ kibeɛ gɛ budekelĩɛ ba kesiakpa nabha. 7 Kɛlɛ Noa nɛ̀ yɛ beyianyɛ nɛ̀ yɛedziniɛ nɛ̀ yɛ beyianyɛ balɛ edzinì alɛ betsoku aɖaka nɔ mɛ tɛ bebu balɛ ɛkpã eyinɔ nɛ budekeliɛ mɛ. 8 Bagã gɛ balɛ ishu bhui nɛ̀ bagɛ balɛ ishuɔ gɛibhui taabha, gɛenu bɔzhɔɛ nɛ̀ bagã kanyia ka ɛdi gɛetsì nɛ kesiakpa nabha, 9 enyè nɛ̀ adzɛ baba Noa ɔkɔ kɛlɛ betsoku aɖaka nɔ mɛ asɛ gɛ Owusoso Akaa akɔ Noa ɔsha ana. 10 Kɛlɛ nɛ ewui tegegene edeɛ, budekelĩɛ ba kesiakpa nabha.

11 Nɛ Noa yɛagɔ alafa teehloɔ mɛ nɛ yɛkpã mɛɛ, nɛ woele bhalà yɛ kiwui lɔfɔ nɛ̀ tegegeneɛ nabhaa-nɛ kiwui ɛlɛ nabha beelĩɛ gɛ akpasɛ tisiɛ mɛ epú ekoeyi, kɛlɛ badãlɛ budekelĩ budulũɔ nɛ kititíɛ tsyɛ. 12 Kɛlɛ subha adɔ nɛ kesiakpa nabha ewui afɛtaalɛ nɛ̀ elishi afɛtaalɛ.

13 Nɛ kiwui ɛlɛ nabha ɖii Noa yɛ beyianyɛ gɛenu Shɛm, Xam nɛ̀ Yafɛti, nɛ̀ yɛedziniɛ nɛ̀ yɛ beyianyɛ taata balɛ edzinì alɛ betsoku aɖaka nɔ mɛ. 14 Bayakpa mɛ baagã kanyiaka nɛ balɛ ediedi mɛ, kepi baagã kanyiaka nɛ balɛ ediedi mɛ, bagã kanyiaka ɛdi gɛ beetsì nɛ kesiakpa, nɛ̀ bɔzhɔɛ kanyiaka nɛ bɔlɛ ediedi mɛ, kɛkanyiaka gɛ bɔsɛ lɛ kɛlɛ ahɔɛ. 15 Baagã petee gɛ ɛkpã ɔfɔfuiã ɔkpasɛ alɛ mɛ edi taabha baba Noa ɔbhà kɛlɛ betsoku aɖaka nɔ mɛ. 16 Baagã ediediɛ gɛ betsokuɔ edzì enyè nɛ̀ badzɛ odenɔ baagã gɛ balɛ nɛkpã asɛ gɛ Owusoso Akaa atɔɖɔ akɔ Noa ana. Kɛlɛ Apaleteɛ adã opupuɔ akpii.

17 Nɛ ewui afɛtaalɛ mɛɛ, budekelĩɛ zikpè tɔɖɔ kesiakpa nabha, kɛlɛ gɛ buliɛ zikpe tɔɖɔɔ, bufeke aɖaka nɔ wunɔ nɛ kesiakpa nabha. 18 Buliɛ ebekpè kɛlɛ buyukù nɛ kesiakpa nabha, kɛlɛ aɖaka nɔ alɔasra nɛ budekelĩ nabha. 19 Budekelĩɛ ebeyukù esiakpa nabha, kɛlɛ beetu ɖaɖama petee gɛ balɛ kitití niesiɛ bayala eku. 20 Beeliɛ ebeyukù adã beetúɔ gɛ tidzudzuɔ mɛ bakpè ɔdɛ bɔtsɛkpɔ afɛtaabha. 21 Agã kanyiaka ɛdi gɛazã nɛkpã nɛ kesiakpa nabha ɛkpã bakoeyì-bɔzhɔɛ nɔ, kepi baagã, ayakpa mɛ baagã, baagã petee gɛazã azaamɛ nɛ kesiakpa nabha, nɛ̀ banɔdzrameɛ petee etsí. 22 Kɛdɔ kanyiaka ɛdi gɛzã kesiakpa kpakpaa nabha pɛ kɛlɛ ɛkpã ɔfɔfuiã nɔ okoeyi odenɔ balɛ kɛnyɔtɔ mɛɛ betsí. 23 Agã kanyiaka ɛdi gɛ azã kesiakpa nabhaa ebetsí, banɔdzrame nɛ̀ baagaã nɛ̀ baagã gɛetsì nɛ kesiakpa nabha nɛ̀ bɔzhɔɛ nɔ gɛ kpasɛ kɛlɛɛ nɔ mɛ betsí nɛ kesiakpa nabha. Noa nɛ̀ bagɛ bazã yɛɔbha nɛ aɖaka nɔ mɛ yɛete balɛ atɔ.

24 Budekeliɛ zã kesiakpa nabha yɛanà ewui alafa zɛzɛ nɛ̀ afɛeti.