Kesikpɛkpɛ 30

1 Gɛ Ratsɛl amɔ̃ asɛ atɛamɔ eyi nanà akɔ Yakɔbuɔ, alɔkɔ kawɔ̃dzã nɛ yɛada shu. Kliso etseɖe Yakɔb asɛ, "Kɔmɛ beeyi, onu gɛnanaa, ɛba tsí!"

2 Yakɔb abakpɛ ɔmɔpɔɛ nɛishu pɛ aɖɔ asɛ, "Mɛlɛ Owusoso Akaa ɔzãkɔ pɛ ɛdã kidzo kɔ wɔeyi mɔmɔ dza?"

3 Kɛlɛ aɖɔ asɛ, " Bilxa gɛenu mɛ adzɛ axɔɛdɛ naalɛ. Wɔsɔ̃ nɛ̀ yɛ tɛ amɔ beyi akɔmɛ sɛ tɛ ganà yɛabha mɛtsyɛ bakpɛ kigbogbo."

4 Kliso alɔkɔ yɛaxɔɛdɛ Bilxa akɔɛ asɛ yɛedzini ana. Yakɔb awɔsɔ̃ nɛyɛ, 5 kɛlɛ emunù ɛya pɛ amɔ eyianyɛ akɔɛ. 6 kɛlɛ Ratsɛl aɖɔ asɛ, "Owusoso, Akaa ebu bɔtsyɔa akɔ mɛ, ataatɔ̃ nɛ̀ mɛ kɛtakpu kɔkɔɔ pɛ akɔmɛ eyianyɛ." Nɛ kibui ɛlɛ shu soɔ, akɔ yɛinye asɛ Ɖan.

7 Ratsɛl yɛaxɔɛdɛ Bilxa ezemunũ ɛya kɛlɛ amɔ eyianyɛ bhalà akɔ Yakɔb. 8 Kɛlɛ Ratsɛl aɖɔ asɛ, "Kawlɔãkɛ gbagbla eku mɛ nɛ̀ mɛada ɛshi, kɛlɛ ɛŋã kabha." Kliso akɔ yɛinye asɛ Naftali.

9 Kibeɛ gɛ Leya amɔ asɛ ebhui bɔmɔ̃ɔ, alɔkɔ yɛaxɔɛdɛ Zilpa akɔ Yakɔb asɛ tɛ edzi yɛedzinì. 10 Leya yɛaxɔɛdɛ Zilpa amɔ́ eyianyɛ akɔ Yakɔb. 11 Kɛlɛ Leya aɖɔ asɛ, "Kibui gbangbã ɖuwoe lu nɛlɛ!" Kliso akɔ yɛinye asɛ Gad.

12 Leya yɛaxɔɛdɛ Zilpa amɔ́ eyianyɛ bhalà akɔ Yakɔb. 13 Kɛlɛ Leya aɖɔ asɛ, "Same ɖuwoe lu gɛ eku mɛ ana! Baadzɛ bebe kulu mɛ asɛ same." Kliso Akɔ yɛinye asɛ Asha.

14 Nɛ agɔlɛ́ kɛpɔbeɛ, Reubɛn avɛ ayakpa mɛ kɛlɛ adɛmɔ bɔmɔ̃mɔtɛwɔa, gɛ apɔ̃ teli amanà yɛelĩ Leya. Ratsɛl etseɖe Leya asɛ, "Ɛkɔ wɔɛtakpu, kɔmɛ wɔ eyianyɛ yɛ bɔmɔ̃mɔtɛwɔa teli."

15 Pɔ etseɖe yɛasɛ, "Kɛka kpè kɔwɔ gɛ ɔyɛkɛ mɛenyineɛ ɔshɛnɔ dza? Ɔbɔ yɛkɛ mɛeyianyɛ bɔmɔ̃mɔtɛwɔa tsyɛ dza?"

Ratsɛl aɖɔ asɛ, "Abɔ ana, abalà wɔsɔ̃ nɛ̀ wɔ obuɔ elishi tɛ mɛ yɛkɛ wɔeyianyɛ bɔmɔ̃mɔtɛwɔa tuli kpɛ kɛlɛ ulũ."

16 Kliso kibeɛ gɛ Yakɔb ede ayakpamɛ aba ɔwlago ɔlɛɛ, Leya ekoeyi adɛ tsyana yɛ pɛ aɖɔ asɛ, "Kɛlɛ ɔsɛ tɛ ɔwɔsɔ̃ nɛ̀ mɛ. Ɛlɔkɔ mɛeyianyɛ bɔmɔ̃mɔtɛwɔa lɔkɔ buia kɛbhɛ nɛ wɔ tɛwɔwɔsɔ̃ nɛ mɛ kɛtakpu." Kliso awɔsɔ̃ nɛ̀ yɛ elishi alɛ.

17 Owusoso Akaa ataatɔ̃ nɛ̀ Leya kibuiɛ kɛlɛ emunù ɛya kɛlɛ amɔ̃ eyianyɛ trimiɛ akɔ Yakɔb. 18 Kɛlɛ Leya aɖɔ asɛ, "Owusoso Akaa abuia kɛlɛ ɛbhɛ akpɛ kɛlɛ ulũ akɔmɛ gɛ ɛlɔkɔ mɛaxɔɛdɛ kɔ mɛenyineɛ." Kliso akɔ yɛinye asɛ Isaka.

19 Leya eze munu ɛya kɛlɛ amɔ eyianyɛ hlomiɛ akɔ Yakɔb. 20 Kɛlɛ Leya aɖɔ asɛ, "Owusoso Akaa akɔ mɛ gɛ yɛkɛ kedzi otsialɛ, mɛenyineɛ ababhɛtɛ mɛ piapii, ɔmɔsɛ ɛmɔ beyianyɛ teehlo akɔɛ." Kliso akɔ yɛinye asɛ Zebulɔn.

21 Kibe teli ideɛ, amɔ́ eyiadzɛ kɛlɛ akɔ yɛinye asɛ Ɖina.

22 Kɛlɛ Owusoso Akaa abakà Ratsɛl; ataatɔ̃ niyɛ kɛlɛ adãlɛ yɛ kamɔmɔ̃vũ nulũ. 23 Emunũ ɛya kɛlɛ amɔ̃ eyianyɛ, kɛlɛ aɖɔ asɛ, "Owusoso Akaa alɔkɔ mɛ awuĩ nɔ ashɛnɔ." 24 Akɔ yɛinye asɛ Yosɛf kɛlɛ aɖɔ asɛ, "Tɛ Apaleteɛ ewuli akɔmɛ eyianyɛ bhlatɔ aplɛnɔ."

Yakɔb Baagã Bekpè Atɔɖɔ

25 Gɛ Ratsɛl amɔ́ Yosɛf ebekeɛ, Yakɔb etseɖe Laban asɛ, "Kpɛ mɛidzo tɛ itsyina vɛ mɛepi. 26 Lɔkɔ mɛedzini alɛ nɛ̀ mɛeyialɛ gɛ balɛ shu mɛdɛ axɔɛ akɔwɔ kɔmɛ tɛ mɛtɔnɔ kidzo. Onyi kɛxɔɛ gɛ ɛwɔa kɔwɔ kɛlɛ tikpèkpe mɛ."

27 Pɔ Laban etseɖe yɛasɛ, "Onupɛ iku awɔ̃ nɛ wɔ anhũɔ mɛ, ɛkɔ wɔɛtakpu tɛ ɔzã. Ɛmɔ odenɔ bɔdɔ̃ bibisi mɛ ɔsɛ Apaleteɛ eyula akɔmɛ nɛ wɔɛtakpu." 28 Aɖɔ aplɛnɔ asɛ, "Tseɖe mɛ wɔaxɔɛ wɔawɔà abhɛɛ, tɛ mɛbuia alɛ."

29 Yakɔb etseɖe yɛasɛ, "Onyi kana gɛ ɛwɔà axɔɛ kɔwɔ, nɛ̀ kana gɛ wɔaagã apɛ̃ akɔ wɔ ɔganà mɛ bɔdɔ̃abha ɖiɖi mɛ. 30 Baagã bhlui nɔ gɛ bazã wɔahɔɛ flogo pɛ ɛbaa bekpe atɔɖɔ, kɛlɛ Apaleteɛ eyulà akɔwɔ nɛ ɔkɔnyiakɔ gɛ ɛdɛ. Pɔ otsiɛ nɔ, kibe ɖuwoe lu mɛba babhɛtɛ kibui teli akɔ mɛtsyɛ mɛɔpã?"

31 Ebisi asɛ, "Kiɖe mɛbà kɔwɔ?"

Yakɔb ebuiliulũ asɛ, "Tɛkɔ mɛ kɛdɔ̃ nanà. Pɔ onupɛ ɔbɔ bhɛtɛ kibui tenikpo ɛlɛ ɔkɔ mɛ, ɛbavɛ ɛlɛ abha zɛ gbanà wɔ baagã pɛ ɛba ziɖi alɛ abha: 32 Kɔ mɛ nyɔ̃ wɔ baagã petee mɛ obuɔ tɛ ibu ibhoshi kanyiaka gɛ ɛlɛ ishuɔ idzi wlãwlã, pɛnɔsɛ ɛgɛ kpɛ ebì, obhoshi eyi tutũ kanyiaka nɛ̀ bepigya kanyiaka gɛ akpɛ ebì pɛnɔsɛ bedzì wlãwlã. Balɛ ebedzi mɛbhɛ babuià. 33 Kɛlɛ mɛ ɛkpã gbangbã babu mɛulũ kivũ mɛ, kibenyiabe gɛ oɖi kɛbhɛ gɛ ɔbuia kɔmɛ. Bɔbà lɔkɔ ɛlɛ ɔsɛ epigya kanyiaka gɛ alɛ mɛɔkɔ pɛ etidzì wlãwlã pɛnɔsɛ ebì amã alɛ shu pɛnɔsɛ nɛ̀ obhoshi kanyiaka gɛ lɔgɛ nɔ, babà lɔkɔ alɛ asɛ bezuɖu alɛ."

34 Laban aɖɔ asɛ, "Ɛdɛmɛ, kɔ kɛzã asɛ kana gɛ ɔɖɔ." 35 Kiwui ɛlɛ ɖii Laban edibu bepigyanyeɛ petee gɛ bedzi wlãwlã pɛnɔsɛ bakpɛ ebì, nɛ̀ bepigyadzɛɛ tsyɛ petee gɛ bedzì wlãwlã pɛnɔsɛ bakpɛ ebì (bagɛ adɔ ebì fufuɔ petee) nɛ̀ ibhoshi eyi tutũɔ petee, kɛlɛ alɔkɔ alɛ akpɛ yɛ beyianyɛ ahɔɛ. 36 Kɛlɛ ebu ewui taata kidzo gagã nɛ yɛ nɛ̀ Yakɔb ishi, gɛ Yakɔb azã ɛlɛ abha pɛ ezeɖi Laban yɛaagã gɔgɔɛ nabha.

37 Pɔ, Yakɔb, edibhui beesiusiwɔɛ wɔwɔ odenɔ pɔpla, almɔnɖ nɛ pleyne beesi shu, kɛlɛ ebu idi fufu nɛ ɛlɛishu gɛ akpà balɛakɔlɔ pɛ ebu balɛ kɛmɛɛ ofufúɔ ɔkɔ akasɛ. 38 Kɛlɛ alɔkɔ busiwɔɛ nɔ gɛ akpà akɔlɔ nɛ bɔlɛ shuɔ akpɛ ɛzɔɔ nɔ mɛ gɛ akpɛ bulĩɛ akɔ baagã, tɛ bazã balɛ otugbà gɛ baba sɛ tɛ bawɔ̃ɛ bulĩɛ. Kibeɛ gɛ bagãa bekù kevudeɛ pɛ babà bulĩ ɔwɔɛkɔɔ, 39 beewu bagɔlɔ abha nɛ busiwɛ nɔ otugbà. Kɛlɛ bamɔ̃ beyi gɛ idì lɛ balɛ ishu pɛnɔsɛ pɛ bedzi wlãwlã pɛnɔsɛ bakpɛ ebi. 40 Yakɔb ebu bagãa gɛ bekesheɛ elu ɔtɔ nɛ balɛ ishu ahɔɛ mɛ, pɔ akɔ bagɔgɔ̃ betsyinà bamɛ akpɛ Laban baagã gɛ idiɛ lɛ balɛ pɛenɔ́ betutũɔ. Kliso ebu baagã ɔtɔ akɔ yɛishu kɛlɛ agɛ lɔkɔ alɛ akpɛ Laban yɛagãa mɛ. 41 Kibenyiabe gɛ baagã dzɛɛ gɛalɛ ishumɛ gagalĩ eku kevudeɛ, bebeewu balɛ abha nɛ busiwɔɛ nɔbha, 42 pɔ onupɛ baagã balɛ ishumɛ gɛ gagãlĩɛ, agɛza lɔkɔ balɛ akpɛ ɛkɛlɛ. Klisoɔ baagã gɛ balɛ ishumɛ gɛ gagãlĩɛ avɛ Laban ɔkɔ kɛlɛ bagɛ balɛishumɛ gagalĩɛ bavɛ Yakɔb ɔkɔ. 43 Nɛ kidzo ɛlɛ nabhaa, anyɛ amɔ́ atɔɖɔ nɛ ehoeyi mɔmɔ̃ mɛ nyagãa, kɛlɛ ibhoshiza gbagbla, baadzɛ axɔ̃ɛdɛ nɛ̀ baanyɛ axɔɛdɛ, nɛ kipuasɔɔ nɛ̀ badiku babazã yɛahɔɛ.