1 Sara azã nɛkpã aŋã agɔ kɛkpã zɛzɛ nɛ̀ afɛtaabha nɛ̀ tegegene. 2 Etsí nɛ Kiɖiat Aba (gɛenu Hɛbrɔn) nɛ Kana kesiakpa nabha, kɛlɛ Abraham avɛ adɛ wɔà ɔwɔnyɔnɔ̃ akɔ Sara kɛlɛ ebieyò akɔɛ.

3 Kɛlɛ Abraham ashɛ nɛ ekpúɔ ɔbhà kɛlɛ aɖɔaɖɔ akɔ Xitianɛ. Aɖɔ asɛ, 4 kesiakpa bhlatɔ abha anɔ nɛ̀ efu mɛinu nɛ́ wɔnɔɛshi. Nɔdɛ wɔnɔ kesiakpa tieli asɛ ɔvɔbɔ ɔkɔ kɔmɛ nɛ ɛkɛlɛ tɛ ɛbalà vɔbɔ mɛ bekpúɔ."

5 Xitianɛ ebuiliulũ akɔ Abraham asɛ, 6 "Apalete, taatɔ̃ nɛ̀ bɔlɔ. Ekusieyi gɛ ohumi ɔlɛ yɛahɔɛ wɔonu nɛ bɔlɔɛshi. Vɔbɔ wɔekpúɔ nɛ bɔlɔ idzeɖe gbangbã ɔdɛ mɛ. Bɔlɔ ɔmayɛmɛ anɔnyianɔ atɛ baɖɔ asɛ agɛ dɛmɛ asɛ ɔtɛ vɔbɔ wɔekpú nɛ yɛ odzeɖe mɛ."

7 Kɛlɛ Abraham alɔ pɛ ezhyi ekumũ akɔ kesiakpa eleteɛ, gɛenu Xitianɛ. 8 Etseɖe balɛ asɛ, "Onupɛ nɔdɛmɛ ɔsɛ ɛvɔbɔ mɛ bekpúɔ, kɛlɛ nɔtaatɔ̃ nɛ̀ mɛ tɛ nɔɖɔ kibui ɛlɛ otseɖe Efrɔn gɛenu Zoha yɛeyianyɛ nɛ mɛinye mɛ, 9 sɛ tɛ adɛ Makipela aklagbu ozĩɛ gɛonu yɛɔyɛ pɛ lɔlɛ yɛ kesiakpa bɔwɔatɔɔ akɔ mɛ. Notseɖe yɛ tɛ adɛ ɔlɛ akɔ mɛ kedziɛ petee asɛ kana gɛ nɔdɛ ɔvɔbɔkɔ akɔ wɔnɔ shu."

10 Efrɔn gɛenu Xitieyiɛ azã kesi nɛ yɛ banɔnɔ nɛishi, kɛlɛ ebuiliulũ akɔ Abraham asɛ tɛ Xitianɛ petee gɛaba ɔmã gbagbla niedulũɔ tsyɛ elũ. 11 Aɖɔ asɛ, "Oho, mɛ apalete. Taatɔ̃ nɛ mɛ; gɛ ɛkɔwɔ kesiakpa koɔ, ɛkɔwɔ aklagbu ozĩɛ tsyɛ gɛ lɔkpasɛ kalɛ mɛ. Ɛlɔkɔ ɛkɔwɔ̀ nɛ mɛ banɔnɔ naamɛ. Vɔbɔ wɔ bekpúɔ."

12 Abraham ezezhyi ekumũ nɛ kesiakpa eleteɛ naamɛ 13 kɛlɛ etseɖe Efrɔn tɛ elũ asɛ, "Nɔtaatɔ̃ nɛ̀ mɛ, onupɛ nɔdɛmɛ. Ɛbabuià kesiakpa nɛbhɛ. Yɛkɛ kɛbhɛ nɛ mɛahɔɛ mɛ, tɛ ɛbalà mɛ bekpúɔ vɔbɔ nɛ ɛkɛlɛ."

14 Efrɔn ebuiliulũ akɔ Abraham asɛ, 15 "Taatɔ̃ nɛ̀ mɛ, mɛ apalete; kesiakpa niedzi kalɛ enu shekel sikãfufu kɛkpã zɛzɛ, pɔ kibui ɖuwoe gɛka kpasɛ mɛ nɛ wɔɛshi? Vɔbɔ wɔ bekpúɔ."

16 Abraham adɛmɛ atɔɖɔ Efrɔn yɛebui nabha kɛlɛ akɔ yɛ kedziɛ gɛ etseɖe yɛ nɛ kibeɛ gɛ Xitianɛ aza taatɔ̃ nɛ yɛ: gɛenu shekɛl sikafufu akpã taalɛ, nɛ bupùɔ gɛzã yɛmɛ nɛ kibe ɛlɛ budzigãlete nɛishi.

17 Kliso Efrɔn kesiakpa nɛ Makipela gɛ etso ɔplɛnɔ Mamrɛ-kesiakpa nɛ̀ aklagbu ozĩɛ nɛ kalɛ abhà, nɛ̀ besiɛ petee nɛ kesiakpa mɛ nɛ kalɛ bubòɔ mɛ bashɛnɛ ahɔɛ nɛ ɔshà nulũ 18 akɔ Abraham sɛ tɛ kedzì yɛayɛ nɛ Xitianɛ petee gɛaba ɔmã niedulũɔ naamɛ. 19 Kidegbaa, Abraham avɔbɔ yɛedzini Sara nɛ aklagbu ozĩɛ nɛ Makipela kesiakpa gɛetso aplɛnɔ Mamrɛ (gɛɔlɛ Hebrɔn) nɛ Kana kesiakpa nabha. 20 Klisoɔ kesiakpa nɛ̀ aklagbu ozĩɛ gɛɔkpasɛ kalɛ mɛ edzi gɛdɔ̀ gɛ Xitianɛ alɔkɔ akɔ Abraham asɛ ɔvɔbɔkɔ ana.