Kesikpɛkpɛ 44

Yosɛf Efeke Yɛadzalɛ Eɖi

1 Otsinɔ Yosɛf akɔ agɛ yɛepo yɛɔpã ɔsha asɛ, "Kpɛ bɔŋaŋã buyukù baanyɛ ɛkpɛtɛɛ as kana gɛ babala etuku, tɛ ɔlɔkɔ balɛ anɔkanyiaka yɛ ehoeyi akpɛ yɛɔkpɛtɛ nulũ. 2 Kɛlɛ́ɛ lɔkɔ mɛ sikãfufù kayintse nɔ ɔkpɛ ebhulibhuli nɔ yɛ ɔkpɛtɛ nulũ, ɔplɛnɔ yɛehoeyiɛ gɛ abuià akɔ bɔdɔ̃eyiɛ." Kɛlɛ abhɛtɛ asɛ kana gɛ Yosɛf aɖɔ.

3 Gɛ keliɛ mapɔ̃ɔ, bakpɛ baanyɛ nɛidzo nɛ̀ balɛ adikuɔ. 4 Begiku odzlolo ɔkɔ odenɔ ɔma gbagbla mɛ flogo pɛ Yosɛf etseɖe agɛ yɛepo yɛɔpã asɛ, "Kpatɔnɔ baanyɛ odunũ ɔlɛ, kɛlɛ onupɛ ɔtɔnɔ balɛ, tseɖe balɛ asɛ, 'Kiɖeso pɛ nɔlɔkɔ kibui kpa buia kɛbhɛ̃ akɔ kɛgbangbã dza? 5 Gɛnɛ mɛ apaleteɛ yɛ kayintse nɔ gɛ aawuɛ̃ bulĩɛ nɔ pɛ alɔkɔ ebisi bɔdɔ̃ nɔ naalɛ? Kɛtakpumɛ gagãlĩ kibui nɛlɛ nɔbhɛtɛ.' "

6 Gɛ atɔnɔ alɛɛ, edzinì kibuiɛ gɛ etseɖe yɛɛ etseɖe alɛ. 7 Pɔ betseɖe yɛasɛ, "Kliso pɛ bɔlɔ apalete abaɖɔ ebui kidi? Kitso ɔvɛ nɛ wɔ baxɔɛdɛ ɔbhà sɛtɛ babhɛtɛ kibui teli ana! 8 Budzinì ehoeyi gɛ bɔmɔ nɛ bɔlɔ ɛkpɛtɛ nulũ tsyɛ manà wɔ odenɔ Kana kesiakpa. Kliso kiɖeso pɛ bɔba zuɖu sikãfufú pɛnɔsɛ sikãdzadzã odenɔ wɔ apalete bɔpã mɛ dza? 9 Onupɛ bɔmɔɛ nɛ wɔaxɔɛdɛɛ teli ɔkɔɔ, ebetsí; kɛlɛ bɔlɔ agɔagɔ̃ɔ ebedzì bɔlɔ apalete yɛanɔdzidzi."

10 Aɖɔ asɛ, "Apɛ ana, otsiɛ, kɛzã asɛ kana gɛ ɔɖɔ. Anɔnyianɔ ahɔɛ gɛ bɔmɔɛɛ bedzi mɛanɔ dzidzi; wɔnɔ baagɔgɔ̃ɔ balà shɛ̃ nɛ kɛpɔmabumabu mɛ."

11 Akanyiaka ezhyini yɛ ɔkpɛtɛ kesi pɛ adãlɛ ɔlɛ. 12 Kɛlɛ bɔpã epopoelete avɛ kɛlɛ abha tɛ apɛ bɔdɔ̃, odenɔ ebhulibhuli naabha odɛkpɛnɔ esheshe naabha. Kɛlɛ amɔ kayintse nɔ nɛ Bɛndzamin yɛ ɔkpɛtɛ mɛ. 13 Gɛ kɛba kɛlɛmɛ ana, batsyɔɛ balɛ akpɛkpɛ. Kɛlɛ balɛ nyɔɔ anya balɛ etukuɔ atɔɖɔ balɛ adiku nabha kɛlɛ betsyina avɛ ɔma gbagbla mɛ.

14 Yosɛf ewlui azã bɔpã mɛ flogo pɛ Yuɖa nɛ yɛadzya alɛɛ ebeku, kɛlɛ bedzyi ekumu kesi akɔɛ. 15 Yosɛf etseɖe balɛ asɛ, "Keɖe nɛlɛ gɛ nɔbhɛtɛ? Notinyi ɔsɛ anyɛ asɛ mɛ ana ɛɛmɔ bɔdɔ̃ nɛ bɔdɔ̃ bibisi mɛ?"

16 Yuɖa ebuiliulũ asɛ, "Keɖe bɔbala aɖɔ mɛ apalete? Kɛ́lɛ bɔbala kasɛ bɔlɔ ishubhuibhui? Owusoso Akaa efeke bɔdɔ̃ nɛ wɔ axɔɛdɛ balɛ kɛpɔbubu abha. Otsiɛ budzi mɛ apalete banɔdzidzi-bɔlɔ nɛ anɔnɔ gɛ yɛahɔɛ bamɔ kayintse nɔ."

17 Pɔ Yosɛf aɖɔ asɛ, "Kitso vɛ nɛ mɛishu sɛ ɛba bhɛtɛ kibui ɛlɛ nɛidi! Anɔnɔ gɛ yɛahɔɛ bamɔ kayintse nɔ yete yɛebedzi mɛ anɔdzidzi. Wɔnɔ bagɔgɔ̃ɔ xɔnɔ, notsyina vɛ wɔnɔ akaa yɛɔkɔ nɛ ishu yɔyɔ mɛ.

18 Kɛlɛ Yuɖa etso avɛ yɛɔbha kɛlɛ aɖɔ asɛ: "Ɛkɔ wɔɛtakpu, mɛ apalete, kɔ wɔ axɔɛdɛ aɖɔ kibui tinikpo mɛ apalete. Tɛkpɛ ɔmɔpɔɛ nɛ wɔ axɔɛdɛ ishu, kɔ wɔaxɔɛdɛ aɖɔ kibui tenikpo akɔ mɛ apalete, gɛ wɔ nɛ Faɖawo nɔshɔ̃. 19 Mɛ apalete ebisi yɛaxɔɛdɛ asɛ, 'Aka pɛnɔsɛ adza alɛ wɔnɔ ahɔɛ dza?' 20 Kɛlɛ bubuiliulũ asɛ, 'Aka gɛenu anɔsheshe alɛ bɔlɔ ahɔɛ, kɛlɛ anyɛanuvɔ gɛ bamɔ akɔ yɛ nɛ yɛ tisheshe mɛ tsyɛ alɛ. Yɛadzya etsí, kɛlɛ yɛete yɛenu yɛelĩeyiɛ anyɛ gɛ atɔ, kɛlɛ yɛaka dɛmɛ yɛibui.'

21 "Kɛlɛ wɔɖɔ tseɖe wɔaxɔɛdɛ asɛ, 'Nozhyini yɛ ɔmana tɛ mɛ mɔ yɛakɔ mɛishu.' 22 Kɛlɛ butseɖe mɛ apalete asɛ, anyɛnuvɔɛ nɔ atɛ balà ashɛ nɛ yɛaka ɔbhà, ɔmɔ ashɛ̃ nɛ yɛɔbhaa, yɛaka obetsi.' 23 Pɔɔ otseɖe wɔ axɔɛdɛ asɛ, 'Odɛkpɛnɔ gɛ wɔnɔ adzya bhuli nɔ ezhyi aba nɛ bɔlɔɔ, bɔzɛba mɔ wɔamɛ ɖi.' 24 Gɛ butsyina vɛ wɔ axɔɛdɛ bɔlɔ aka yɛɔkɔ, butseɖee kɛgɛ mɛ apaleteɛ aɖɔ.

25 "Kɛlɛ bɔlɔ aka aɖɔ asɛ, 'Notsyina vɛ tɛ nodeodzi bɔŋaŋã teli mana.' 26 Pɔ bɔɖɔ asɛ, 'Bɔtɛ bala zhi ɔvɛ. Onupɛ bɔlɔ adzya bhuli nɔ aplɛnɔ bɔlɔ kɛlɛ bɔbavɛ. Bɔtɛ bala mɔ anyɛ nɔ baamɛ odɛkpɛnɔ sɛ bɔ gbana bɔlɔ adzya bhuli nɔ aplɛnɔ bɔlɔ.'

27 "Wɔaxɔɛdɛ mɛaka etseɖe bɔlɔ asɛ, 'Nonyi sɛ mɛedzini amɔ beyianyɛ taabha akɔ mɛ. 28 Tenikpo ashɛ̃ nɛ mɛɔbha, kɛlɛ mɛɖɔsɛ, "Batsyɔɛ yɛakpɛ bɔpɛ̃ mɛ kɛgbã." Kɛlɛ ɛkaa mɔ yɛ oɖi. 29 Ɔgbana yɛalɛ tsyɛ ɔshɛ̃ nɔ pɛ kɛdɔ̃ zĩzĩ bhɛtɛ yɛ, nobo zhyini mɛ kɛtakpu fufuliɛ akpɛ odzeɖe mɛ nɛ ɔwɔ̃nyɔnɔ mɛ.'

30 "Kliso otsiɛ nɔ, onupɛ anyɛnuvɔɛ nɔ agɛ plɛnɔ bɔlɔ pɛ itsyina vɛ wɔaxɔɛdɛ mɛ aka yɛɔkɔ, kɛlɛ onu mɛakpã gɛ yɛkpã bhɛtɛ tenikpo nɛ anyɛnuvɔɛ nɛkpã, 31 amɔ asɛ anyɛnuvɔɛ nɔ ama ɛkɛlɛ́ɛ, ebetsí. Wɔ axɔɛdɛ ebe zhyinɔ bɔlɔ aka yɛ kɛtakpu fufuliɛ akpɛ odzeɖe mɛ nɛ ɔwɔ̃nyɔnɔ mɛ. 32 Wɔ axɔɛdɛ yɛalɔkɔ anyɛnuvɔɛ nɔ yɛ ɛ́kpã akpɛ ishuahɔɛ mɛ akɔ mɛaka. Ɛɖɔ sɛ, 'Mɛaka onupɛ ɛgidzini yɛ mana wɔ, ɛbayɛkɛ kɛpɔɔ tɔɖɔ mɛishu abha, nɛ mɛ ɛ́kpã mɛ petee!'

33 "Otsinɔ, ɛ́kɔ wɔɛtakpu kɔ wɔ axɔɛdɛ azã ɛkɛlɛ asɛ mɛ apalete yɛanɔ dzidzi nɛ anyɛnuvɔɛ nɔ kinye mɛ, tɛ ɔkɔ anyɛnuvɔɛ etsyina avɛ nɛ yɛadzalɛ. 34 Kɛ́lɛ́ batsyina vɛ mɛ aka yɛɔkɔ gɛ anyɛnuvɔɛ nɔ ama mɛɔbha? Oho! Tɛkɔ mɛmɔ ɔwɔnyɔnɔɔ gɛ lɔbɔba mɛaka abha."